អ៊ីស្រាអែល ដាក់សម្ពាធ​​ទាំង​ការទូត និងយោធា ដើម្បីរំសាយ​អាវុធពី​ក្រុមហេសបូឡា

រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz បាននិយាយនៅថ្ងៃអង្គារទី២១មេសានេះថា យុទ្ធនាការរបស់អ៊ីស្រាអែលនៅក្នុងប្រទេសលីបង់គឺពឹងផ្អែកលើ «សម្ពាធយោធា និង​សម្ពាធការទូត» ដើម្បីធ្វើឲ្យក្រុមហេសបូឡាដែលជាសម្ព័ន្ធមិត្តដ៏ស្មោះត្រង់របស់អ៊ីរ៉ង់ បាត់បង់សមត្ថភាពប្រយុទ្ថ​​ទាំងស្រុង។ នេះបើយោងតាមការចុះផ្សាយពីទីភ្នាក់ងារ alarabiya។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Katz បាននិយាយក្នុងពិធីរំលឹកទិវាជាតិរំលឹកដល់ទាហានដែលបានស្លាប់ និងជនរងគ្រោះនៃភេរវកម្ម ថា «គោលដៅចម្បងនៃយុទ្ធនាការនៅក្នុងប្រទេសលីបង់ គឺដើម្បីដកហូតអាវុធពីក្រុមហេសបូឡា និងលុបបំបាត់ការគំរាមកំហែងដល់សហគមន៍ភាគខាងជើង (នៃអ៊ីស្រាអែល) តាមរយៈការរួមបញ្ចូលគ្នានៃវិធានការ២គឺ ទាំងយោធា និងការទូត។

រដ្ឋមន្ត្រីក្រសួងការពារជាតិរូបនេះថែមទាំងគូសបញ្ចាក់បន្ថែមថា «យើងនឹងអនុវត្តវិធានការដូចគ្នា ចំពោះការបាញ់ប្រហារក្នុងគន្លងខ្ពស់ (សំដៅមកលើប្រទេសអ៊ីស្រាអែល) ដែលចេញមកពីតំបន់ភាគខាងជើងនៃទន្លេលីតានី (Litani) និងពីទូទាំងប្រទេសលីបង់»។ ការលើកឡើងនេះ សំដៅទៅលើទន្លេលីតានី ដែលជាចំណុចសញ្ញាសម្គាល់ធម្មជាតិកាត់ទទឹង​ភាគ​ខាងត្បូងលីបង់ ហើយជាតំបន់ដែលអ៊ីស្រាអែលមិនចង់ឲ្យមានវត្តមានក្រុមហេសបូឡាទៀតឡើយ។

ទោះបីជា បទឈប់បាញ់រវាងអ៊ីស្រាអែល និងលីបង់ បានចូលជាធរមាននៅថ្ងៃសុក្រក៏ដោយ កងទ័ពអ៊ីស្រាអែលនៅតែមានវត្តមាន និងការ​ប្រយុទ្ធយ៉ាងសកម្មជាមួយពួកសកម្មប្រយុទ្ធហេសបូឡានៅភាគខាងត្បូងលីបង់ ដោយ លោក Katz បាននិយាយ កាលពីថ្ងៃអាទិត្យថា កងទ័ពនឹងប្រើប្រាស់ «កម្លាំងពេញលេញ» ប្រសិនបើត្រូវបានគំរាមកំហែង។

ទោះជាយ៉ាងណាក៏ដោយ នៅថ្ងៃព្រហស្បតិ៍សប្តាហ៍នេះ លីបង់ និងអ៊ីស្រាអែល នឹងត្រូវត្រៀម​ចរចាជាថ្មីក្រោមក្រសែភ្នែកតាមដានពី​ហេសបូឡា។ កិច្ចពិភាក្សានេះត្រូវបានរៀបចំឡើងដោយក្រសួងការបរទេសអាមេរិក ដែលនឹងនាំយកអង្គទូតនៃប្រទេសទាំងពីរមកអង្គុយតុជាមួយគ្នា ដើម្បីពិភាក្សាអំពីលទ្ធភាពក្នុងការបន្តបទឈប់បាញ់ ដែលនឹងត្រូវផុតកំណត់នៅថ្ងៃអាទិត្យខាងមុខ បន្ទាប់ពីបានអនុវត្តតាំងពីថ្ងៃសុក្រសប្តាហ៍មុន៕

អត្ថបទ៖ សាង ស្រីល័ក្ខ

អ៊ីស្រាអែល បដិសេធ​​ការ​វិលត្រឡ​ប់​របស់​​ប្រជាជន​លីបង់ ទៅ​ភូមិឋាន​ជិតតំបន់ព្រំដែន ទោះបី​មាន​បទ​ឈប់បាញ់​