តើសកម្មភាពដុតកំហឹងរបស់ ហេសបូឡា និងទង្វើជ្រុលនិយមអ៊ីស្រាអែល កំពុងបំផ្លាញឱកាសសន្តិភាព?

សកម្មភាពវាយប្រហារបាញ់ស្រោចរ៉ុកកែតកាន់តែខ្លាំងឡើងៗពីសំណាក់ក្រុមហេសបូឡា ចេញពីទឹកដីលីបង់ និងចំណាត់ការជ្រុលនិយមរបស់កងទ័ពអ៊ីស្រាអែលទៅលើនាវាដឹកជញ្ជូនជំនួយមនុស្សធម៌ Global Sumud Flotilla កំពុងតែរួមចំណែកយ៉ាងខ្លាំងក្នុងការបំផ្លាញឱកាសសន្តិភាពនៅក្នុងតំបន់មជ្ឈិមបូព៌ាដូចគ្នា ដោយរុញច្រានតំបន់ទាំងមូលឲ្យធ្លាក់ចូលទៅក្នុងវដ្តនៃអំពើហិង្សាដែលគ្មានទីបញ្ចប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពីសារព័ត៌មាន aljazeera ការសម្រេចចិត្តរបស់ក្រុមសកម្មប្រយុទ្ធហេសបូឡា ក្នុងការបង្កើនយុទ្ធនាការយោធា និងការបាញ់ផ្លោងឥតឈប់ឈរឆ្លងដែនចូលទៅក្នុងទឹកដីភាគខាងជើងអ៊ីស្រាអែល មិនត្រឹមតែជាការដុតកំហឹងសត្រូវប៉ុណ្ណោះទេ ប៉ុន្តែវាបានធ្វើឲ្យកិច្ចខិតខំប្រឹងប្រែងផ្នែកការទូតរបស់សហគមន៍អន្តរជាតិជួបភាពទាល់ច្រក។

សកម្មភាពបង្កហេតុតាមព្រំដែននេះ បានបង្ខំឲ្យពលរដ្ឋអ៊ីស្រាអែលរាប់ម៉ឺននាក់ត្រូវជម្លៀសខ្លួនចេញពីផ្ទះសម្បែង ដែលស្ថានភាពនេះបានបង្កើតជាសម្ពាធនយោបាយយ៉ាងធ្ងន់ធ្ងរដល់រដ្ឋាភិបាលទីក្រុង Tel Aviv ក្នុងការបើកប្រតិបត្តិការសឹកទ្រង់ទ្រាយធំតបតវិញ ដែលអាចនឹងធ្វើឲ្យប្រទេសលីបង់ទាំងមូលធ្លាក់ចូលក្នុងសង្គ្រាមវិនាសកម្ម។

ទន្ទឹមនឹងនេះដែរ ទង្វើជ្រុលនិយមរបស់យោធាអ៊ីស្រាអែល តាមរយៈការស្ទាក់ចាប់ វាយប្រហារ ឬរារាំងដល់នាវាដឹកជញ្ជូនជំនួយមនុស្សធម៌អន្តរជាតិ ដែលព្យាយាមនាំយកស្បៀងអាហារ និងសម្ភារៈវេជ្ជសាស្ត្រទៅឲ្យប្រជាជនស៊ីវិលដែលកំពុងរងគ្រោះ ក៏កំពុងរងការថ្កោលទោសយ៉ាងខ្លាំងពីពិភពលោក។

ចំណាត់ការដ៏តឹងរ៉ឹងហួសហេតុទៅលើសកម្មភាពមនុស្សធម៌នេះ ក៏បានធ្វើឲ្យប៉ះពាល់ដល់មុខមាត់របស់អ៊ីស្រាអែលលើឆាកអន្តរជាតិ និងធ្វើឲ្យប្រទេសដែលធ្លាប់ជាមិត្តជិតស្និទ្ធ ឬប្រទេសអារ៉ាប់ដែលកំពុងចរចាចង់បង្កើតទំនាក់ទំនងការទូតជាមួយអ៊ីស្រាអែល ត្រូវដកថយមកវិញ។ បញ្ហានេះបានកាត់ផ្តាច់ផ្លូវចរចាសន្តិភាព ព្រោះសហគមន៍អន្តរជាតិយល់ថា អ៊ីស្រាអែលមិនបានបង្ហាញឆន្ទៈក្នុងការបន្ធូរបន្ថយវិបត្តិមនុស្សធម៌ និងមិនគោរពច្បាប់អន្តរជាតិឡើយ។

ជាលទ្ធផល សកម្មភាពដុតកំហឹងខាងយោធារបស់ហេសបូឡា និងទង្វើមិនយោគយល់លើផ្នែកមនុស្សធម៌របស់អ៊ីស្រាអែល បានក្លាយជាកត្តាជម្រុញឲ្យភាគីទាំងសងខាងយក «កំហឹងទល់នឹងកំហឹង»។ នៅពេលដែលហេសបូឡាបន្តបាញ់រ៉ុកកែត អ៊ីស្រាអែលកាន់តែមានលេសក្នុងការរឹតបន្តឹង និងវាយប្រហារ ហើយនៅពេលដែលអ៊ីស្រាអែលធ្វើបាបជនស៊ីវិល ឬរារាំងជំនួយ វាក៏ក្លាយជាឬសគល់សម្រាប់ក្រុមហេសបូឡាយកមកឃោសនាដុតកំហឹងប្រជាជន និងស្វែងរកភាពស្របច្បាប់ក្នុងការបន្តសង្គ្រាម។

យ៉ាងណាមិញ វដ្តនៃការសងសឹកគ្នាទៅវិញទៅមកនេះ បានធ្វើឲ្យសំឡេងនៃអ្នកចង់បានសន្តិភាព និងការចរចាត្រូវលិចបាត់ទៅវិញ ដោយបន្សល់ទុកតែភាពតានតឹងកាន់តែស្រួចស្រាល និងហានិភ័យខ្ពស់នៃការផ្ទុះសង្គ្រាមតំបន់ទ្រង់ទ្រាយធំតែប៉ុណ្ណោះ៕

អត្ថបទ ៖ សាង ស្រីល័ក្ខ

៨ប្រទេស ថ្កោលទោស អ៊ីស្រាអែល ដែល​ធ្វើបាបសកម្មជន​ដឹក​ជំនួយ ប៉ង​ចូល​ហ្គាហ្សា