អ៊ីស្រាអែល បដិសេធ​​ការ​វិលត្រឡ​ប់​របស់​​ប្រជាជន​លីបង់ ទៅ​ភូមិឋាន​ជិតតំបន់ព្រំដែន ទោះបី​មាន​បទ​ឈប់បាញ់​

កងទ័ពអ៊ីស្រាអែល កាលពីថ្ងៃចន្ទទី២០មេសា បានបដិសេធ​​ការ​វិល​ត្រឡប់​​ទៅកាន់​លំនៅឋាន​នៅជិតតំបន់ព្រំដែន និងភូមិមួយចំនួន របស់​ប្រជាជន​លីបង់​នៅ​ភាគីខាងត្បូង ដោយលើកឡើងពីសកម្មភាពយោធាដែលបង្កហានិភ័យនៃជម្លោះ ទោះបីជាមានបទឈប់បាញ់ក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការបង្ហោះមួយនៅលើបណ្តាញ​​ផ្សព្វផ្សាយសង្គម X អ្នកនាំពាក្យយោធា​អ៊ីស្រាអែល​ លោក Avichay Adraee បាននិយាយថា ជនស៊ីវិលត្រូវបាន «ហាមឃាត់មិនឲ្យធ្វើដំណើរទៅភាគខាងត្បូង» នៃខ្សែបន្ទាត់មួយដែលគ្របដណ្តប់ភូមិ​ជាច្រើន និងតំបន់ជុំវិញ ដោយរាយបញ្ជីទីតាំងជាច្រើននៅទូទាំងភាគខាងត្បូងប្រទេសលីបង់។

លោក ក៏បានព្រមានប្រជាជនកុំឲ្យចូលទៅជិតទន្លេ Litani ជ្រលងភ្នំ Salhani និងតំបន់ Slouq ដោយលើកផែនទីដែលបានបោះពុម្ពផ្សាយបង្ហាញពីភូមិចំនួន ២១ មានទីតាំងនៅក្នុងតំបន់ហាមឃាត់ រួមជាមួយនឹងភូមិជាង ៥០ ផ្សេងទៀត ដែលប្រជាជនមិនគួរវិលត្រឡប់ទៅទីនោះវិញឡើយ។

អ្នកនាំពាក្យយោធាបានបញ្ចាក់ទៀតថា កងកម្លាំងនៅតែរក្សាវត្តមានរបស់ខ្លួននៅភាគខាងត្បូងប្រទេសលីបង់ ដើម្បីដោះស្រាយសកម្មភាពដែលពួកគេចាត់ទុកថាគំរាមកំហែងពីក្រុមហេសបូឡា។ នេះបើយោងតាមការចុះផ្សាយទីភ្នាក់ងារសារព័ត៌មាន Anadolu ​របស់​តួកគី​ ។

ចាប់តាំងពីថ្ងៃទី២ ខែមីនាមក អ៊ីស្រាអែលបានធ្វើការវាយលុកនៅក្នុងប្រទេសលីបង់ ដែលបានសម្លាប់មនុស្សប្រហែល ២,៣០០ នាក់ របួសជាង ៧,៥០០ នាក់ និងបានធ្វើឲ្យមនុស្សជាង ១ លាននាក់ផ្លាស់ទីលំនៅ នេះបើយោងតាមអាជ្ញាធរលីបង់ចេញការបញ្ចាក់។

បទឈប់បាញ់រយៈពេល ១០ថ្ងៃ ដែលសម្របសម្រួលដោយសហរដ្ឋអាមេរិកបានចូលជាធរមាន ដែលរួមចំណែកដល់ការកាត់បន្ថយការប្រយុទ្ធគ្នារវាងអ៊ីស្រាអែល និងហេសបូឡា ដែលជាកងកម្លាំងគាំទ្រដោយអ៊ីរ៉ង់។ ទោះជាយ៉ាងណាក៏ដោយ ស្ថានភាពនៅតែផុយស្រួយ ខណៈដែលភាគីទាំងពីរបន្តរក្សាជំហរដ៏រឹងមាំ។ ហេសបូឡាបញ្ជាក់ថា ខ្លួននៅតែរក្សាសិទ្ធិក្នុងការប្រឆាំងនឹងវត្តមានយោធារបស់អ៊ីស្រាអែល៕

អត្ថបទ៖ សាង ស្រីល័ក្ខ