CNN៖ ឃ្លាំងអាវុធធំៗអាមេរិក​ស្រកចុះជិត​៥០% ក្រោយសង្គ្រាមជាមួយអ៊ីរ៉ង់

យោងតាមការវាយតម្លៃផ្ទៃក្នុងរបស់ក្រសួងការពារជាតិអាមេរិក និងការវិភាគពីអ្នកជំនាញ ដែល​ត្រូវ​បាន​យក​ទៅ​ចុះផ្សាយ​ដោយ​សារព័ត៌មាន CNN កាល​ពីថ្ងៃទី​២១ខែមេសា​ឆ្នាំ​២០២៦ កងទ័ព​អាមេរិកកំពុងធ្លាក់ចូលក្នុងស្ថានភាពប្រកាសអាសន្ន ដោយសារឃ្លាំង​គ្រាប់មីស៊ីលសំខាន់ៗបានស្រក​ចុះ​យ៉ាងខ្លាំងក្នុងអំឡុងពេលសង្គ្រាមជាមួយប្រទេសអ៊ីរ៉ង់។

ស្ថានភាពនេះបានបង្កើត​ឲ្យ​មាន «ហានិភ័យក្នុងរយៈពេលខ្លី» ដែលអាមេរិកអាចនឹងខ្វះខាតគ្រាប់រំសេវសម្រាប់ប្រើប្រាស់ ប្រសិនបើមានជម្លោះថ្មីណាមួយផ្ទុះឡើងក្នុងពេលឆាប់ៗខាងមុខ ជាពិសេសគឺការត្រៀមខ្លួនទប់ទល់នឹងមហាអំណាចដូចជាប្រទេសចិនជាដើម។

ក្នុងរយៈពេលត្រឹមតែ៧​សប្តាហ៍នៃសង្គ្រាមកន្លងទៅនេះ អាមេរិកបានបាញ់ប្រើប្រាស់អស់នូវ​ប្រភេទ​គ្រាប់មីស៊ីលវាយប្រហារ​រហូតដល់ ៤៥% និងគ្រាប់មីស៊ីលសម្រាប់ប្រព័ន្ធការពារ THAAD ជិតពាក់កណ្តាលនៃស្តុកដែលមានស្រាប់។ មិនតែប៉ុណ្ណោះ គ្រាប់មីស៊ីលសម្រាប់ប្រព័ន្ធការពារអាកាស Patriot ដែលជាខែលការពារដ៏សំខាន់ ក៏ត្រូវបានប្រើប្រាស់អស់ជិត ៥០% ផងដែរ។ ដ្បិត​មន្ទីរបញ្ចកោណបានចុះកិច្ចសន្យាពង្រីកការផលិតបន្ថែមមែន ប៉ុន្តែអ្នកជំនាញបានព្រមានថា គេត្រូវចំណាយពេលពី​៣ទៅ​៥​ឆ្នាំ ទើបអាចផលិតគ្រាប់ទាំងនោះមកបំពេញក្នុងស្តុកឲ្យ​បានដូចដើមវិញ។

អ្នកវិភាគបានលើកឡើងថា បច្ចុប្បន្នអាមេរិកនៅតែមានគ្រាប់បែក និងមីស៊ីលគ្រប់គ្រាន់សម្រាប់បន្តប្រតិបត្តិការយោធាប្រឆាំងនឹងអ៊ីរ៉ង់ ទោះ​កិច្ចព្រមព្រៀងឈប់បាញ់ត្រូវរលាយក៏ដោយ តែ​ចំនួនគ្រាប់ដែលនៅសេសសល់មិនមានកម្រិតខ្ពស់គ្រប់គ្រាន់សម្រាប់ប្រឈមមុខនឹងសង្គ្រាមទ្រង់ទ្រាយធំជាមួយប្រទេសចិនឡើយ។ នេះគឺជាចន្លោះប្រហោងដ៏គ្រោះថ្នាក់មួយនៅតំបន់ប៉ាស៊ីហ្វិកខាងលិច ដែលអាចត្រូវចំណាយពេលច្រើនឆ្នាំដើម្បីស្ដារឡើងវិញ។

ផ្ទុយទៅវិញ លោកប្រធានាធិបតី ដូណាល់ ត្រាំ ហាក់ដូចជាបានបង្ហាញភាពជឿជាក់ថា សហរដ្ឋអាមេរិកមិនមានការខ្វះខាតអាវុធឡើយ ទោះបីជាលោកបានស្នើសុំកញ្ចប់ថវិកាបន្ថែមសម្រាប់ទិញគ្រាប់មីស៊ីលក៏ដោយ។ លោកបានបញ្ជាក់ថា ការស្នើសុំថវិកាបន្ថែមនេះ គឺដើម្បីធានាថាអាមេរិកនៅតែស្ថិតក្នុងចំណុចកំពូលជានិច្ច។ យ៉ាង​ណាមិញ សមាជិកសភាខាងគណបក្សប្រជាធិបតេយ្យបានសម្ដែងការព្រួយបារម្ភយ៉ាងខ្លាំង ដោយលើកឡើងថា ខណៈដែលអ៊ីរ៉ង់មានសមត្ថភាពផលិតដ្រូន និងមីស៊ីលបានយ៉ាងច្រើន សំណួរដ៏សំខាន់នោះគឺថា តើអាមេរិកនឹងអាចទៅរកគ្រាប់មីស៊ីលការពារអាកាសពីណាមកបំពេញបន្ថែមឲ្យ​ទាន់ពេលវេលា បើសង្គ្រាមនៅតែបន្តអូសបន្លាយបែបនេះ?

ប្រែសម្រួល៖ ឈាង