ត្រាំ ចង់ឃើញ ពូទីន មកប្រជុំ G20 នៅ Miami ចុងឆ្នាំនេះ

ប្រធានាធិបតីអាមេរិក ដូណាល់ ត្រាំ បានឲ្យដឹងថា លោកពិតជាចង់ឃើញមេដឹកនាំរុស្ស៊ី វ្ល៉ាឌីមៀរ ពូទីន មកទីក្រុង Miami ដើម្បីចូលរួមក្នុងកិច្ចប្រជុំកំពូល G20 នៅចុងឆ្នាំនេះណាស់។

និយាយដោយឥតលាក់លៀម ប្រមុខសេតវិមានប្រាប់ទៅអ្នកសារព័ត៌មានកាលពីថ្ងៃព្រហស្បតិ៍ទី២៣ខែមេសាឆ្នាំ២០២៦ និងផ្សាយបន្តដោយ RT ថា៖ «ខ្ញុំមិនទាន់ដឹងអ្វីទាំងអស់អំពីការអញ្ជើញជាផ្លូវការណាមួយនៅឡើយទេ ប៉ុន្តែ ប្រសិនបើពូទីនមកមែន វានឹងក្លាយជារឿងដ៏ល្អបំផុត។ តាមទស្សនៈខ្ញុំ យើងត្រូវតែនិយាយជាមួយមនុស្សគ្រប់គ្នា។ ខ្ញុំមិនមែនជាប្រភេទមនុស្ស ដែលនិយាយថា អូ! កុំទៅនិយាយជាមួយគាត់អី នោះឡើយ»។

យ៉ាងណា ប្រធានាធិបតីអាមេរិក បង្ហើបថា លោកសង្ស័យថា ប្រមុខវិមានក្រឹមឡាំង ប្រហែលជាមិនមកនោះទេ។

ជុំវិញរឿងនេះដែរ ភាគីរុស្ស៊ី ប្រកាសថា ខ្លួនពិតជាបានទទួលការអញ្ជើញរួចហើយមែន ឲ្យទៅចូលរួមកិច្ចប្រជុំកម្រិតខ្ពស់នៅរដ្ឋ Florida ប៉ុន្តែខ្លួនមិនទាន់សម្រេចចិត្តទេថា តើនឹងបញ្ជូននរណាទៅ ឬត្រូវចូលរួមដែរឬក៏អត់។ 

សូមជម្រាបថា កិច្ចប្រជុំ G20 គ្រោងប្រព្រឹត្តធ្វើឡើងក្នុងទីក្រុង Miami រដ្ឋ Florida សហរដ្ឋអាមេរិក នៅថ្ងៃទី១៤-១៥ខែធ្នូឆ្នាំ២០២៦ នៅរមណីយដ្ឋានវាយកូនហ្គោលផ្ទាល់ខ្លួនរបស់លោកត្រាំ គឺ Trump National Doral។

ប្រមុខរដ្ឋាភិបាលទីក្រុងវ៉ាស៊ីនតោន បានបញ្ជាក់យ៉ាងច្បាស់ថា លោកចង់ឲ្យកិច្ចប្រជុំនេះ ក្លាយជាវេទិកាសម្រាប់ដោះស្រាយជម្លោះធំៗលើពិភពលោក។

ចំពោះប្រធានាធិបតីរុស្ស៊ី, លោក ពូទីន មិនបានអញ្ជើញចូលរួមកិច្ចប្រជុំកំពូល G20 ដោយផ្ទាល់នោះទេ ចាប់តាំងពីឆ្នាំ ២០១៩ មក ដោយដំបូងឡើយគឺដោយសារតែបញ្ហាមហន្តរាយជំងឺរាតត្បាតកូវីដ-១៩ ហើយក្រោយមកទៀត គឺចំពេលមានផលវិបាកដែលបណ្ដាលមកពីសង្គ្រាមនៅអ៊ុយក្រែនក្នុងឆ្នាំ ២០២២៕

អត្ថបទ៖ សុខ សុវណ្ណ