ព័ត៌មានអន្ដរជាតិ

សម្តេចប៉ាប Leo ខកចិត្តខ្លាំងក្នុងសង្គ្រាមអាមេរិក-អ៊ីរ៉ង់ ដែលចរចាមិនត្រូវគ្នា

បានផុស

២ ខែ មុន

នៅ

ថ្ងៃសុក្រ ២៤ មេសា ២០២៦

ដោយ

ម្ចាស់វិមានបុរីវ៉ាទីកង់ សម្តេចប៉ាបលីអូ ទី១៤ (Leo XIV) នៅថ្ងៃទី ២៣ ខែមេសា បានបង្ហាញកង្វល់ និងសម្តែងនូវការខកចិត្តដែលមេដឹកនាំសហរដ្ឋអាមេរិក និងអ៊ីរ៉ង់ មិនទាន់អាចរកវិធីបញ្ចប់សង្គ្រាមតាមផ្លូវការទូត ខណៈដែលជនស៊ីវិលជាច្រើនកំពុងរងទុក្ខវេទនា។ នេះបើយោងតាមការចុះផ្សាយពីទីភ្នាក់ងារសារព័ត៌មាន nbcnews ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ថ្ងៃខ្លះអ៊ីរ៉ង់ឆ្លើយថា «ព្រម» តែអាមេរិកបែរជាឆ្លើយថា «ទេ» ហើយថ្ងៃស្អែកវាផ្ទុយពីនេះ។ យើងមិនដឹងថាបញ្ហានេះនឹងនាំទៅដល់ទីណានោះទេ ដែលវាបានបង្កឲ្យមានស្ថានភាពវឹកវរជាថ្មីម្តងទៀត ហើយនេះគឺជាសញ្ញាអាសន្នដ៏ធ្ងន់ធ្ងរសម្រាប់សេដ្ឋកិច្ចពិភពលោក។» នេះជាការលើកឡើងរបស់សម្តេចប៉ាប លីអូ ដែលបានថ្លែងប្រាប់ក្រុមអ្នកសារព័ត៌មាន នៅលើជើងហោះហើរត្រឡប់ទៅកាន់បុរីវ៉ាទីកង់វិញ បន្ទាប់ពីបានបញ្ចប់ដំណើរសាសនទូត រយៈពេល ១១ថ្ងៃ នៅទ្វីបអាហ្វ្រិក។

មេដឹកនាំបុរីវ៉ាទីកង់ បានថ្លែងឡើងក្នុងបរិបទដែលកិច្ចព្រមព្រៀងឈប់បាញ់ រវាងសហរដ្ឋអាមេរិក និងអ៊ីរ៉ង់ ដែលកំពុងត្រូវបានសាកល្បងដោយសារការប្រឈមមុខដាក់គ្នាដោយផ្ទាល់ នៅជុំវិញតំបន់យុទ្ធសាស្ត្រច្រកសមុទ្រ Hormuz ។ សម្តេចប៉ាប បានសម្តែងការខកចិត្ត ដែលកិច្ចខិតខំប្រឹងប្រែងផ្នែកការទូតមិនអាចបញ្ចប់ភាពទាល់ច្រកនេះបាន ខណៈដែល ប្រជាជនអ៊ីរ៉ង់ទូទាំងប្រទេស និងមនុស្សស្លូតត្រង់ជាច្រើន កំពុងរងទុក្ខវេទនាដោយសារតែសង្គ្រាម។

នៅពេលត្រូវបានសួរអំពីសេចក្តីរាយការណ៍ដែលថា របបដឹកនាំរឹងរូសរបស់អ៊ីរ៉ង់កំពុងប្រហារជីវិតក្រុមអ្នកប្រឆាំងនយោបាយ សម្តេចប៉ាប លីអូ បានឆ្លើយតបថា ព្រះអង្គថ្កោលទោសចំពោះទោសប្រហារជីវិត។

សម្តេចប៉ាប បន្តថា «ដូច្នេះនៅពេលដែលរបបមួយ ឬប្រទេសមួយធ្វើការសម្រេចចិត្តដែលដកហូតជីវិតអ្នកដទៃដោយអយុត្តិធម៌ វាច្បាស់ណាស់ថាពួកគេត្រូវការថ្កោលទោស»។

ទោះជាយ៉ាងណាក៏ដោយ កាលពីពេលថ្មីៗនេះ ការអត្ថាធិប្បាយរបស់សម្តេចប៉ាប បានធ្វើឲ្យលោកត្រាំ ខឹងសម្បារយ៉ាងខ្លាំង តាមរយៈការចេញមុខអំពាវនាវឲ្យបញ្ចប់សង្គ្រាមជាមួយអ៊ីរ៉ង់។ ជម្លោះពាក្យសម្តីជាសាធារណៈនេះ បានបិទបាំងនូវភាពលេចធ្លោនៃដំណើរបំពេញទស្សនកិច្ចរបស់ទ្រង់ទៅកាន់ប្រទេសចំនួន៤ក្នុងទ្វីបអាហ្វ្រិក ដែលបានបញ្ចប់កាលពីថ្ងៃព្រហស្បតិ៍៕

អត្ថបទ៖ សាង ស្រីល័ក្ខ