លោក ត្រាំ ត្រូវបានសន្តិសុខនាំខ្លួនចេញជាបន្ទាន់ ក្រោយមានការបាញ់​ប្រហារ ក្នុង​ពិធី​ជប់លៀងមួយ

នៅក្នុងឱកាសពិធីជប់លៀងប្រចាំឆ្នាំរបស់សមាគមអ្នកឆ្លើយឆ្លងព័ត៌មានសេតវិមាន ដែលជាការជួបជុំដ៏ធំរវាងអ្នកសារព័ត៌មាន និងមន្ត្រីជាន់ខ្ពស់នៅទីក្រុងវ៉ាស៊ីនតោន កាលពីយប់ថ្ងៃទី២៥ ខែមេសា ឆ្នាំ២០២៦ មានហេតុការណ៍ដ៏គួរឲ្យតក់ស្លុតមួយបានកើតឡើង។

យោងតាម​សារព័ត៌មាន TRT World ខណៈពេលដែលកម្មវិធីកំពុងប្រព្រឹត្តទៅយ៉ាងរលូន ស្រាប់តែមានសូរសំឡេងផ្ទុះខ្លាំងៗជាបន្តបន្ទាប់បានបន្លឺឡើងនៅក្នុងសាលពិធី ដែលបង្កឲ្យមានការភ្ញាក់ផ្អើល និងចលាចលពេញបន្ទប់តែម្តង។

ភ្លាមៗនោះ ក្រុមភ្នាក់ងារការពារសុវត្ថិភាព បានស្ទុះទៅការពារលោកប្រធានាធិបតី ដូណាល់ ត្រាំ និងបាននាំលោកចាកចេញពីវេទិកា រួចជម្លៀសចេញពីទីតាំងពិធីជប់លៀងនោះយ៉ាងលឿនបំផុត ដើម្បីធានាសុវត្ថិភាព។ ការរំខានដោយសារបញ្ហាសន្តិសុខដ៏មិននឹកស្មានដល់នេះ បានធ្វើឲ្យកម្មវិធីទាំងមូលត្រូវផ្អាកភ្លាមៗ ខណៈដែលអាជ្ញាធរកំពុងធ្វើការត្រួតពិនិត្យយ៉ាងយកចិត្តទុកដាក់ ដើម្បីស្វែងរកប្រភពនៃសំឡេងផ្ទុះនោះ និងការពារគ្រោះថ្នាក់ជាយថាហេតុណាមួយ ដែលអាចកើតមានឡើង៕

ប្រែសម្រួល៖ ឈាង