អ៊ីរ៉ង់ ប្រកាស មិនចុះញ៉មដាច់ខាត ទោះលោក ត្រាំ បិទខ្ទប់ផ្លូវទឹក យូរយ៉ាងណាក៏ដោយ

ឆ្លើយតបទៅលោក ដូណាល់ ត្រាំ ដែលប្រកាន់ជំហម៉ឺងម៉ាត់ ពង្រីកការបិទខ្ទប់ផ្លូវទឹកអ៊ីរ៉ង់, ទីក្រុងតេហេរ៉ង់ បានប្រកាសក្តែងៗថា ខ្លួនមិនចុះញ៉មដាច់ខាត ចំពោះវិធានការរបស់អាមេរិក នេះ។

សារព័ត៌មានរដ្ឋអ៊ីរ៉ង់ IRIB បានដកស្រង់សម្តីទីប្រឹក្សាកំពូល នៃយោធាអ៊ីរ៉ង់លោក Mohsen Rezaei ​ដែលថ្លែងក្នុងបទសម្ភាសមួយ ផ្សាយនៅថ្ងៃព្រហស្បតិ៍ ទី៣០ ខែមេសា ឆ្នាំ២០២៦ ថា៖ «បើការបិទខ្ទប់នៅតែបន្ត អ៊ីរ៉ង់នឹងឆ្លើ​យតបហើយ។ ទីក្រុងតេហេរ៉ង់ មិនចុះញ៉មដាច់ខាត ទោះអាមេរិក ពង្រីកការបិទខ្ទប់ ផ្លូវទឹកយូរយ៉ាងណាក៏ដោយ»។

លោកអះអាងថា ការបិទផ្លូវទឹកបែបនេះ គ្មានសម្រេចបានលទ្ធផលអ្វីនោះទេ។ មហាសមុទ្រឥណ្ឌា មានវិសាលភាពធំធេងណាស់ ហើយទីក្រុងតេហេរ៉ង់ អាចឆ្លងកាត់វាបានយ៉ាងងាយស្រួល។ អ៊ីរ៉ង់ ធ្វើរឿងនេះរួចរាល់អស់ទៅហើយ។

សេចក្តីប្រកាសនេះ កើតឡើង បន្ទាប់ពីលោកត្រាំ បង្ហើបថា នឹងពង្រីកការបិទខ្ទប់ ផ្លូវទឹកអ៊ីរ៉ង់ ដើម្បីដាក់សម្ពាធទីក្រុងតេហេរ៉ង់ ឲ្យវិលមកកាន់តុចរចាវិញ។

លោកបង្គាប់ឲ្យមន្ត្រីទាំងឡាយ រៀបចំផែនការសម្រាប់ «ការបិទខ្ទប់រយៈពេលវែង» លើកំពង់ផែអ៊ីរ៉ង់ បន្ទាប់ពីកិច្ចចរចាសន្តិភាព មិនទទួលបានលទ្ធផល ដោយលោកជឿថា ការប្រើសម្ពាធសេដ្ឋកិច្ចតាមផ្លូវទឹក គឺមានប្រសិទ្ធភាព ជាងការវាយប្រហារតាមអាកាស។

រឿងនោះទៀតសោត កើតឡើង ក្រោយពេល ប្រធានាធិបតីអាមេរិក បដិសេធសំណើចុងក្រោយរបស់អ៊ីរ៉ង់ ក្នុងការបើកច្រក Hormuz ឡើងវិញ ដោយសារសំណើនោះ មិនបានដាក់បញ្ចូល ការជជែកគ្នាលើកម្មវិធីនុយក្លេអ៊ែររបស់អ៊ីរ៉ង់៕

អត្ថបទ៖ សុខ សុវណ្ណ