ត្រាំ ឲ្យ​សម្ព័ន្ធមិត្ត បង្កើតសម្ព័ន្ធភាពថ្មីមួយ ជួយគ្នាដោះស្រាយវិបត្តិនៅច្រកសមុទ្រ​ហ័រមូស

ខណៈដែលការធ្វើចរាចរណ៍តាមកប៉ាល់ដឹកជញ្ជូននៅច្រកសមុទ្រ​ហ័រមូស នៅតែបន្តជាប់គាំង ដោយសារជម្លោះរវាងអាមេរិក និងអ៊ីរ៉ង់ រដ្ឋបាលរបស់លោក ដូណាល់ ត្រាំ បានចាប់ផ្ដើមស្វែងរកការគាំទ្រពីអន្តរជាតិ ដើម្បីបង្កើតសម្ព័ន្ធភាពថ្មីមួយ ក្នុងការបើកផ្លូវទឹកដ៏សំខាន់នេះឡើងវិញ។

យោងតាម​ការ​ចុះផ្សាយ​របស់ TRT World នា​ថ្ងៃទី​៣០ ខែមេសា ឆ្នាំ​២០២៦ វ៉ាស៊ីនតោនបានណែនាំ​ឲ្យ​អ្នកការទូតរបស់ខ្លួន នៅតាមបណ្ដាប្រទេសនានា ជំរុញ​ឲ្យ​រដ្ឋាភិបាលបរទេសចូលរួមក្នុងសម្ព័ន្ធភាពមួយ ដែលមានឈ្មោះថា «Maritime Freedom Construct» ឬហៅ​ថា «រចនាសម្ព័ន្ធសេរីភាពនាវាចរណ៍»។

គោលបំណងធំនៃសម្ព័ន្ធភាពថ្មីនេះ គឺដើម្បីសម្របសម្រួលការចែករំលែកព័ត៌មានសម្ងាត់ ពង្រឹងកិច្ចប្រឹងប្រែងផ្នែកការទូត និងការអនុវត្តទណ្ឌកម្មផ្សេងៗ សំដៅធ្វើយ៉ាងណាឲ្យ​ច្រកសមុទ្រនេះ អាចដំណើរការបានធម្មតាវិញ។ នៅក្នុងសារលិខិតផ្ទៃក្នុងរបស់ក្រសួងការបរទេសអាមេរិក បានបញ្ជាក់យ៉ាងច្បាស់ទៅកាន់បណ្ដាប្រទេសជាមិត្តថា ការចូលរួមរបស់ពួកគេ នឹងជួយពង្រឹងសមត្ថភាពរួមគ្នា ក្នុងការស្ដារសេរីភាពនៃការធ្វើនាវាចរណ៍ និងការពារសេដ្ឋកិច្ចពិភពលោកទាំងមូល។ មន្ត្រីជាន់ខ្ពស់ម្នាក់របស់រដ្ឋបាលលោក ត្រាំ ក៏បានបញ្ជាក់ដែរថា គំនិតផ្ដួចផ្ដើមនេះ គឺជាជម្រើសមួយ ក្នុងចំណោមជម្រើសការទូតជាច្រើន ដែលលោកប្រធានាធិបតីកំពុងមាននៅក្នុងដៃ។

ការប្រកាសបង្កើតសម្ព័ន្ធភាពនេះ បានកើតឡើងតែប៉ុន្មានសប្ដាហ៍ប៉ុណ្ណោះ បន្ទាប់ពីលោក ដូណាល់ ត្រាំ បានអះអាងនៅលើបណ្ដាញសង្គមថា ច្រកសមុទ្រនេះ បានបើកចំហទាំងស្រុងសម្រាប់អាជីវកម្ម ប៉ុន្តែការពិតជាក់ស្ដែង ការដឹកជញ្ជូនតាមកប៉ាល់នៅតែមិនទាន់អាចដំណើរការទៅមុខរួចនៅឡើយ។ ភាពជាប់គាំងនេះ បណ្ដាលមកពីភាគីទាំងសងខាង ដោយខាងអ៊ីរ៉ង់ព្យាយាមដាក់មីន និងវាយប្រហារលើនាវាទាំងឡាយណា ដែលឆ្លងកាត់ដោយគ្មានការអនុញ្ញាតពីខ្លួន ចំណែកឯខាងអាមេរិកវិញ ក៏បានដាក់ពង្រាយកម្លាំងបិទខ្ទប់រាល់នាវា ដែលធ្វើដំណើរចេញចូលកំពង់ផែរបស់អ៊ីរ៉ង់ដូចគ្នា។

បច្ចុប្បន្ន ជោគវាសនានៃច្រកសមុទ្រហ័រមូស បានក្លាយជាចំណុចចម្រូងចម្រាសបំផុត នៅក្នុងការចរចាសន្តិភាព ដែលកំពុងជាប់គាំង។ លោក ត្រាំ ថែមទាំងបានប្រាប់ទៅកាន់ក្រុមការងាររបស់លោកកាលពីថ្ងៃចន្ទថា ឲ្យ​ត្រៀមលក្ខណៈសម្រាប់ការបិទខ្ទប់ផ្លូវទឹកនេះក្នុងរយៈពេលវែង បន្តទៅទៀត រហូតទាល់តែប្រទេសអ៊ីរ៉ង់យល់ព្រមបោះបង់ចោលកម្មវិធីអាវុធនុយក្លេអ៊ែររបស់ខ្លួនជាដាច់ខាត៕

ប្រែសម្រួល៖ ឈាង