វិបត្តិ​ទីផ្សារ​ទុរេន​ថៃ ក្នុងស្រុក​ចិន ៖ ចិនបង្កើន​កា​រធ្វើតេស្ត និង​រឹតបន្តឹ​ងការនាំចូល ព្រោះ​តែជ្រលក់​សារធាតុគីមី

ទោះបីជាប្រទេសចិនគឺជាទីផ្សារនាំចូលទុរេនធំបំផុតរបស់ថៃក៏ដោយ ប៉ុន្តែក្នុងរយៈពេលចុងក្រោយនេះគឺនៅក្នុងឆ្នាំ​២០២៦​នេះតែម្ដង អ្នកនាំចេញទុរេនថៃកំពុងប្រឈមមុខនឹងវិបត្តិ​ទីផ្សារ​យ៉ាងធ្ងន់ធ្ងរ បន្ទាប់ពីអាជ្ញាធរគយចិន (GACC) បានដាក់ចេញនូវវិធានការត្រួតពិនិត្យយ៉ាងតឹងរ៉ឹងបំផុតលើ​សារ​ធាតុគីមី​​ ដែលបណ្តាលឲ្យទុរេនរាប់រយកុងតឺន័រ ត្រូវបានបដិសេធឲ្យចូល​ទីផ្សារ​ចិន​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពីសារព័ត៌មាន khaosodenglish ចំពោះមូលហេតុចម្បងដែលបង្កឲ្យមានការផ្អាកនាំចូល និងការត្រួតពិនិត្យកាន់តែយូរជាងមុន​បែបនេះ​ ដោយសារ​តែ​ការរកឃើញសំណល់នៃសារធាតុពណ៌ Auramine O ដែល​បង្កជំងឺមហារីក​​នៅក្នុងផ្លែទុរេន។

សារធាតុនេះគឺជាថ្នាំជ្រលក់ពណ៌សម្រាប់ឧស្សាហកម្មក្រណាត់ និងក្រដាស ដែលត្រូវបានអង្គការសុខភាពពិភពលោក (WHO) ចាត់ថ្នាក់ជាសារធាតុបង្កមហារីក។ អាជ្ញាធរចិន បានរកឃើញថា ឈ្មួញមួយចំនួនបានប្រើប្រាស់សារធាតុនេះដើម្បីជ្រលក់សំបកទុរេនឲ្យមានពណ៌លឿងស្អាត ដើម្បីទាក់ទាញភ្នែកអ្នកទិញយកទៅទៅទទួលទាន។

ចាប់តាំងពីថ្ងៃទី១០ ខែមករា ឆ្នាំ២០២៥ មកម្ល៉េះ ចិនបានតម្រូវឲ្យរាល់ការនាំចូលទុរេនទាំងអស់ពី​ប្រទេស​ថៃ ត្រូវតែមានវិញ្ញាបនបត្របញ្ជាក់ពីមន្ទីរពិសោធន៍ ថាគ្មានសារធាតុ Auramine O និងសារធាតុ កាដមីញ៉ូម (Cadmium) ជាដាច់ខាត។

ជាវិធានការក្តៅ អាជ្ញាធរថៃ បានសម្រេចបិទ និងផ្អាកអាជ្ញាប័ណ្ណអ្នកនាំចេញ ជាង ២៦ កន្លែង បន្ទាប់ពីរកឃើញការរំលោភបំពានស្តង់ដារអនាម័យ និងការប្រើប្រាស់ថ្នាំពណ៌ហាមឃាត់។ ទន្ទឹមនឹងនេះ គយចិនក៏បានបង្កើនការធ្វើតេស្តដោយចៃដន្យ លើសពី ៥០% នៃទំនិញសរុប ដែលធ្វើឲ្យការបញ្ចេញទំនិញមានភាពយឺតយ៉ាវយ៉ាងខ្លាំង។

គិតត្រឹមពាក់កណ្តាលឆ្នាំ ២០២៦ នេះ រដ្ឋាភិបាលថៃតាមរយៈក្រសួងកសិកម្ម និងសហករណ៍ បាននិងកំពុងរឹតបន្តឹងការត្រួតពិនិត្យតាំងពីក្នុងចម្ការ (GAP) រហូតដល់រោងចក្រវេចខ្ចប់ (GMP)។ ទោះបីជាការនាំចេញបានចាប់ផ្តើមកើនឡើងវិញខ្លះក៏ដោយ (កើនឡើង ៦៧% ក្នុងខែមករា ២០២៦) ប៉ុន្តែអាជ្ញាធរនៅតែបន្តប្រមានដល់កសិករ និងឈ្មួញកណ្តាលឲ្យចៀសវាងការនាំចេញទុរេនខ្ចីដែលមិនទាន់គ្រប់អាយុ និងការប្រើប្រាស់សារធាតុគីមីហាមឃាត់ ដើម្បីរក្សាកេរ្តិ៍ឈ្មោះទុរេនថៃនៅលើឆាកអន្តរជាតិ។

ទោះជាយ៉ាងណាក៏ដោយ ដោយសារតែបញ្ហាគុណភាពនេះ បានក្លាយជាឱកាសប្រកួតប្រជែងសម្រាប់ប្រទេសគូប្រជែងដូចជា វៀតណាម និង ម៉ាឡេស៊ី។ យោងតាម ប្រភពពី HSBC Global Research បង្ហាញថា វៀតណាមបានដណ្ដើមចំណែកទីផ្សារពីថៃ បានរហូតដល់ ៤០% ក្នុងរយៈពេលត្រឹម ៣ ឆ្នាំប៉ុណ្ណោះ៕

អត្ថបទ៖ សាង ស្រីល័ក្ខ

ហេតុអ្វី ទុរេន ចាល់ទីផ្សារ តែថៃ និង​​វៀតណាម នៅតែ​សម្រុកដាំ និងមានទិន្នផលកើនឡើងខ្លាំង?