ព័ត៌មានអន្ដរជាតិ

យន្តហោះបង្វឹកលោតឆ័ត្រយោងធ្លាក់នៅបារាំង សម្លាប់មនុស្ស១១នាក់ រួមទាំងគ្រូបង្វឹក៥នាក់ មិនធ្លាប់មានជាង៣០ឆ្នាំ

បានផុស

២ ម៉ោង មុន

នៅ

ថ្ងៃចន្ទ ២៩ មិថុនា ២០២៦

ដោយ

យន្តហោះលោតឆ័ត្រយោងមួយគ្រឿង កំពុងហោះចេញពីអាកាសយានដ្ឋាន ក្បែរអគារនិងផ្ទះរបស់ពួកគេបានត្រឹមប៉ុន្មានគីឡូម៉ែត្រ ស្រាប់តែធ្លាក់ភ្លាមៗនៅភាគឦសានប្រទេសបារាំង កាលពីថ្ងៃអាទិត្យ ដោយសម្លាប់មនុស្សទាំងអស់ចំនួន ១១នាក់នៅក្នុងយន្តហោះ។ នេះបើយោងតាមអាជ្ញាធរក្នុងតំបន់ និងចុះផ្សាយដោយភ្នាក់ងារសារព័ត៌មាន AP នៅថ្ងៃទី២៩ ខែមិថុនា ឆ្នាំ២០២៦ ។

រដ្ឋមន្ត្រីក្រសួងមហាផ្ទៃ លោក Laurent Nunez បានឲ្យដឹងថា ក្នុងចំណោមអ្នកស្លាប់ទាំងនោះ រួមមានគ្រូបង្វឹកលោតឆ័ត្រយោងចំនួន ៥នាក់ អ្នកលោតឆ័ត្រយោងថ្មីថ្មោង ៥នាក់ និងអ្នកបើកយន្តហោះ។

ធ្លាក់យន្តហោះlលោតឆ័ត្រយោងនៅបារាំង។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Nunez បន្ថែមថា៖ « ក្រុមគ្រួសារជនរងគ្រោះមួយចំនួនបានឃើញយន្តហោះធ្លាក់ដោយផ្ទាល់ភ្នែក។ ដូច្នេះអារម្មណ៍អាចតក់ស្លុត និងរបួសផ្លូវចិត្តធ្ងន់ធ្ងរ»។

លោកបដិសេធ មិនធ្វើការប៉ាន់ស្មានពីហេតុការណ៍ដែលបណ្តាលឱ្យមានការធ្លាក់យន្តហោះនោះទេ ប៉ុន្តែថាយន្តហោះនោះបានធ្លាក់ពីលើមេឃភ្លាមៗ។

លោកបន្ថែមថា៖ « វាទើបតែហោះឡើងពីអាកាសយានដ្ឋាន Nancy-Essey ជាយក្រុង Nancy ពេលវាបានធ្លាក់មកចម្ងាយប្រហែល ៣០០ម៉ែត្រពីផ្លូវរត់។

ដោយឡែក រដ្ឋមន្ត្រីក្រសួងដឹកជញ្ជូនបារាំង លោក Philippe Tabarot បាននិយាយថា វាជាគ្រោះថ្នាក់អាកាសចរណ៍ដ៏ធំបំផុតរបស់ប្រទេសបារាំង ដែលពាក់ព័ន្ធនឹងការលោតឆ័ត្រយោងក្នុងរយៈពេលប្រហែល ៣០ឆ្នាំ។

ចំណែក លោក Yves Séguy អភិបាលខេត្ត Meurthe-et-Moselle លើកឡើងថា៖ « យន្តហោះនេះបានជួបប្រទះបញ្ហាដំណើរការខុសប្រក្រតី ហើយធ្លាក់ ស្ទើរតែដល់តំបន់មនុស្សរស់នៅ។ ប្រសិនបើវាកើតឡើងនៅចម្ងាយត្រឹមតែពីរបីម៉ែត្រពីផ្ទះដែលមានមនុស្សរស់នៅ គ្រោះថ្នាក់នេះអាចបណ្តាលឱ្យមានអ្នកស្លាប់និងរបួសផ្សេងទៀត»។

គួរបញ្ជាក់ថា យន្តហោះបានផ្អៀងទៅខាងឆ្វេងបន្ទាប់ពីហោះឡើង ហើយធ្លាក់ក្នុងរយៈពេលមិនដល់មួយនាទីក្រោយមក នៅជិតផ្ទះអ្នកស្រុក។ នេះបើយោងតាមសេវាតាមដានជើងហោះហើរ Flightradar24 ។

ទីតាំងតាមដានជើងហោះហើរបានកំណត់អត្តសញ្ញាណយន្តហោះនោះថាជាយន្តហោះ Pilatus PC-6 ម៉ាស៊ីនតែមួយ ជាយន្តហោះដឹកជញ្ជូនទំនិញ អ្នកដំណើរ និងអ្នកលោតឆ័ត្រយោង៕

សម្រួល៖ ណឺ មិនា