អាល្លឺម៉ង់ ប្រឹងប្រែង​ផលិតអាវុធរចនាដោយ អាមេរិក ក្នុងទឹកដីខ្លួន ដើម្បីពង្រឹងវិស័យការពារជាតិណាតូ

អាល្លឺម៉ង់កំពុងសង្ឃឹមថា នឹងពង្រីកទំនាក់ទំនងឧស្សាហកម្មការពារជាតិជាមួយសហរដ្ឋអាមេរិក និងផលិតអាវុធដែលរចនាដោយទីក្រុងវ៉ាស៊ីនតោនបន្ថែមទៀត នៅតាមរោងចក្រ​ផលិត​អាវុធ​នានាក្នុងប្រទេសរបស់ខ្លួន។ នេះបើតាមការថ្លែងរបស់រដ្ឋមន្ត្រីការពារជាតិ​អាល្លឺម៉ង់​ លោក Boris Pistorius កាលពីថ្ងៃទី១ ខែកក្កដា ឆ្នាំ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារ​ព័ត៌មាន​ euractiv បានផ្សាយថា លោក Pistorius បានប្រាប់អ្នកយកព័ត៌មាន​​ក្នុង​ពេល​អមដំណើរ​អធិការ​បតី លោក Friedrich Merz និងអគ្គលេខាធិការណាតូ លោក Mark Rutte ដែលត្រូវបានអញ្ជើញឲ្យចូលរួមក្នុងកិច្ចប្រជុំគណៈរដ្ឋមន្ត្រីនៅទីក្រុងប៊ែកឡាំងថា «យើងដឹងថា សមត្ថភាពផលិតរបស់អាមេរិកមានកម្រិត ហើយមានតម្រូវការបន្ទាន់ក្នុងការពង្រីក»។

លោក Pistorius បានបន្ថែមថា «នោះហើយជាមូលហេតុដែលយើងមានការចាប់អារម្មណ៍យ៉ាងខ្លាំងក្នុងការផលិតប្រព័ន្ធអាវុធមួយចំនួន ឬសមាសធាតុនៃប្រព័ន្ធអាវុធទាំងនោះ នៅទីនេះក្នុងប្រទេសអាល្លឺម៉ង់»។

តម្រូវការអាវុធសំខាន់ៗរបស់អាមេរិក ជាពិសេស​ប្រភេទ​កាំជ្រួចមីស៊ីល និងប្រព័ន្ធស្ទាក់ចាប់ដូចជាប្រព័ន្ធ Patriot បានកើនឡើងយ៉ាងខ្លាំង ចំពេលមានសង្រ្គាម និងវិបត្តិសកល ហើយស្តុកអាវុធទាំងនោះកំពុងមានកម្រិតទាប ដោយសារការប្រើប្រាស់យ៉ាងធ្ងន់ធ្ងរនៅក្នុងប្រទេសអ៊ុយក្រែន និងមជ្ឈិមបូព៌ា។

ក្នុងពេលជាមួយគ្នានេះ អាល្លឺម៉ង់ និងសម្ព័ន្ធមិត្តណាតូអឺរ៉ុបផ្សេងទៀត កំពុងស្វែងរកការអភិវឌ្ឍបន្ថែមទៀតនូវឧស្សាហកម្មអាវុធផ្ទាល់ខ្លួន និងកាត់បន្ថយការពឹងផ្អែកលើឧបករណ៍ដែលផលិតដោយអាមេរិក។

ការផ្លាស់ប្តូរនេះត្រូវបានជំរុញមួយផ្នែកដោយការចោទសួរញឹកញាប់របស់លោកត្រាំ លើការប្តេជ្ញាចិត្តសន្តិសុខរបស់អាមេរិកចំពោះអឺរ៉ុប ក៏ដូចជាជម្លោះកាន់តែខ្លាំងឡើង ដូចជាយុទ្ធនាការដំឡើងពន្ធគយរបស់លោកត្រាំ និងការគំរាមកំហែងដណ្តើមយកទឹកដី Greenland របស់ដាណឺម៉ាក។

លោក Pistorius បានសង្កត់ធ្ងន់ថា «គ្មាននរណាម្នាក់ នៅពេលអំពាវនាវឲ្យមានឯករាជ្យភាពកាន់តែខ្លាំង បាននិយាយថា យើងចង់បោះបង់ចោលប្រព័ន្ធអាវុធអាមេរិកនោះទេ»។ លោកអះអាងថា មានអាវុធផលិតដោយអាមេរិកដែលអឺរ៉ុបមិនបានផលិត ប៉ុន្តែយើងត្រូវការជាចាំបាច់ក្នុងរយៈពេល ៥ ទៅ ១០ ឆ្នាំខាងមុខ។

ដោយឡែក មេដឹកនាំណាតូ Mark Rutte ក៏បានចេញមុខស្វាគមន៍ចំពោះកិច្ចខិតខំប្រឹងប្រែងរបស់អាល្លឺម៉ង់ ក្នុងការជម្រុញយោធា និងសមត្ថភាពផលិតអាវុធរបស់ខ្លួន។ លោកបានលើកឡើងដែរថា កិច្ចប្រជុំកំពូលណាតូ នឹងផ្តោតលើការបំប្លែងការចំណាយបន្ថែមឲ្យទៅជាសមត្ថភាពត្រៀមខ្លួនប្រយុទ្ធ និងការបង្កើនទំហំឧស្សាហកម្មការពារជាតិរបស់យើងឲ្យបានកម្រិតខ្ពស់។ បើទោះបីជាសង្រ្គាមនៅអ៊ុយក្រែនបញ្ចប់ក៏ដោយ តែរុស្ស៊ីនឹងនៅតែជាការគំរាមកំហែងរយៈពេលវែងដល់សន្តិសុខអឺរ៉ុប-អាត្លង់ទិក។

សូមបញ្ជាក់ដែរថា ការដេញថ្លៃនេះធ្វើឡើងនៅមុនកិច្ចប្រជុំកំពូលដ៏សំខាន់របស់អង្គការណាតូ ដែលគ្រោងធ្វើឡើងនៅថ្ងៃទី៧ ដល់ ៨ ខែកក្កដា នៅក្នុងប្រទេសទួកគី។ នៅក្នុងកិច្ចប្រជុំនោះ ការពង្រីកយោធាអឺរ៉ុបនឹងនៅតែជាចំណុចផ្តោតសំខាន់ ខណៈដែលប្រធានាធិបតីអាមេរិក លោក ដូណាល់ ត្រាំ កំពុងដាក់សម្ពាធលើសម្ព័ន្ធមិត្ត ឲ្យបង្កើនការចំណាយបន្ថែមទៀត៕

អត្ថបទ ៖ សាង ស្រីល័ក្ខ

ហេតុអ្វី រដ្ឋមន្ត្រីការពារជាតិ អាល្លឺម៉ង់ ហ៊ាន​បរិហារ​​ទម្លាក់​កំហុស​លើ​លោក ត្រាំ?