លោក បៃដិន នឹងសង្កត់ធ្ងន់លើបញ្ហានេះដាក់ ពូទីន នៅឯកិច្ចប្រជុំកំពូលទល់មុខគ្នាខែក្រោយ

ប្រធានាធិបតីសហរដ្ឋអាមេរិកលោក ចូ បៃដិន បាននិយាយថា លោកគ្រោងនឹងដាក់សម្ពាធសមភាគីរុស្ស៊ី លោក វ្ល៉ាឌីមៀ ពូទីន ស្តីពីសិទ្ធិមនុស្សក្នុងកិច្ចប្រជុំកំពូលមួយ នៅទីក្រុងហ្សឺណែវនៅខែក្រោយ ។

ក្នុងសុន្ទរកថាមួយ ដើម្បីរំឭកដល់ថ្ងៃឈប់សម្រាក នៃទិវាចងចាំ កាលពីថ្ងៃអាទិត្យ លោក បៃដិន បាននិយាយថា លោកនឹងធ្វើឲ្យច្បាស់ក្នុងអំឡុងកិច្ចប្រជុំថា “យើងនឹងមិនអនុញ្ញាតឲ្យគាត់រំលោភសិទ្ធិទាំងនោះឡើយ” ។

លោក បៃដិន និងលោក ពូទីន នឹងបើកកិច្ចប្រជុំកំពូលទល់មុខគ្នាជា លើកដំបូងរបស់ខ្លួនក្នុងទីក្រុងហ្សឺណែវ ប្រទេសស្វីសនៅថ្ងៃទី ១៦ ខែមិថុនា ។

ទន្ទឹមនោះ អ្នកនាំពាក្យសេតវិមាន លោកស្រី Jen Psaki បាននិយាយនៅក្នុងសេចក្តីថ្លែងការណ៍មួយ កាលពីសប្តាហ៍មុនថា “មេដឹកនាំទាំងពីរ នឹងពិភាក្សាគ្នាអំពីបញ្ហាបន្ទាន់ទាំងអស់ ខណៈពេលដែលយើង ស្វែងរកការស្តារភាពអាចព្យាករណ៍បាន និងស្ថិរភាពឡើងវិញ សម្រាប់ទំនាក់ទំនងសហរដ្ឋអាមេរិក–រុស្ស៊ី” ។

ចំណែកវិមានក្រឹមឡាំងបាននិយាយ នៅក្នុងសេចក្តីថ្លែងការណ៍មួយថា លោក បៃដិន និងលោក ពូទីន ក៏នឹងពិភាក្សាគ្នា អំពីទំនាក់ទំនងទ្វេភាគី បញ្ហាដែលទាក់ទងនឹងស្ថេរភាពនុយក្លេអ៊ែរ និងបញ្ហាផ្សេងទៀត រួមទាំងកិច្ចសហប្រតិបត្តិការ ក្នុងការប្រយុទ្ធប្រឆាំងនឹងជំងឺកូវីដ ១៩ និងជម្លោះក្នុងតំបន់ ជាដើម ។

កិច្ចប្រជុំកំពូលទល់មុខគ្នារបស់មេដឹកនាំទាំងពីរនេះ កើតឡើងនៅពេលដែលទំនាក់ទំនងរវាងទីក្រុងវ៉ាស៊ីនតោន និងទីក្រុងមូស្គូ មានភាពតានតឹងជុំវិញបញ្ហាមួយចំនួន រួមមានការវាយលុកតាមអ៊ីនធឺណិតរបស់រុស្ស៊ី ប្រឆាំងសហរដ្ឋអាមេរិក និងការឃុំឃាំងលោក Alexey Navalny អ្នករិះគន់វិមានក្រឹមឡាំង ។

ស្របពេលជាមួយគ្នានេះ កិច្ចប្រជុំកំពូលខាងលើ ក៏នឹងក្លាយជាជំនួបផ្ទាល់មុខលើកដំបូង របស់លោក បៃដិន ជាមួយលោក ពូទីន ក្នុងនាមជាប្រធានាធិបតី ។

បន្ថែមពីនេះ លោក បៃដិន បាននិយាយកាលពីដើមខែនេះថា លោករំពឹងជួបជាមួយលោក ពូទីន ក្នុងអំឡុងពេលធ្វើដំណើរ ទៅទ្វីបអឺរ៉ុបនៅខែមិថុនា នៅពេលលោកចូលរួមកិច្ចប្រជុំកំពូល នៃក្រុមប្រទេសទាំងប្រាំពីរ ក្នុងចក្រភពអង់គ្លេស បន្ទាប់មកគឺក្នុងកិច្ចប្រជុំកំពូលណាតូ នៅទីក្រុងព្រុចសែល ប្រទេសបែលហ្ស៊ិក ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ បៃដិន និង ពូទីន កំណត់ថ្ងៃជួបទល់មុខគ្នា ជាលើកដំបូង

ចុចអាន ៖ អាមេរិក រកឃើញថ្នាំមួយប្រភេទ ជួយដល់ការព្យាបាលអ្នកជំងឺកូវីដ និងវីរុសបំប្លែងខ្លួន