បៃដិន និង ពូទីន កំណត់ថ្ងៃជួបទល់មុខគ្នា ជាលើកដំបូង

សេតវិមានបាននិយាយកាលពីថ្ងៃអង្គារថា ប្រធានាធិបតីអាមេរិក លោក ចូ បៃដិន និងប្រធានាធិបតីរុស្ស៊ីលោក វ្ល៉ាឌីមៀរ ពូទីន នឹងបើកកិច្ចប្រជុំកំពូលទល់មុខគ្នាជា លើកដំបូងរបស់ខ្លួនក្នុងទីក្រុងហ្សឺណែវ ប្រទេសស្វីសនៅថ្ងៃទី ១៦ ខែមិថុនា។

សេតវិមានបាននិយាយនៅក្នុងសេចក្តីថ្លែងការណ៍ខ្លីមួយថា “មេដឹកនាំទាំងពីរ នឹងពិភាក្សាគ្នាអំពីបញ្ហាបន្ទាន់ទាំងអស់ ខណៈពេលដែលយើង ស្វែងរកការស្តារភាពអាចព្យាករណ៍បាននិងស្ថិរភាពឡើងវិញ សម្រាប់ទំនាក់ទំនងសហរដ្ឋអាមេរិក – រុស្ស៊ី”។

វិមានក្រឹមឡាំងក៏បានបញ្ជាក់ពីកិច្ចប្រជុំនេះផងដែរ នៅក្នុងសេចក្តីថ្លែងការណ៍ដាច់ដោយឡែកមួយ។

វានឹងក្លាយជាជំនួបផ្ទាល់មុខលើកដំបូង របស់លោក បៃដិន ជាមួយលោក ពូទីន ក្នុងនាមជាប្រធានាធិបតី។

លោក បៃដិន បាននិយាយកាលពីដើមខែនេះថា លោករំពឹងថានឹងជួបជាមួយលោក ពូទីន ក្នុងអំឡុងពេលធ្វើដំណើរទៅទ្វីបអឺរ៉ុបនៅខែមិថុនា នៅពេលលោកចូលរួមកិច្ចប្រជុំកំពូលនៃក្រុមប្រទេសទាំងប្រាំពីរ ក្នុងចក្រភពអង់គ្លេស បន្ទាប់មកគឺក្នុងកិច្ចប្រជុំកំពូលណាតូនៅទីក្រុងព្រុចសែល ប្រទេសបែលហ្ស៊ិក៕

ប្រែសម្រួល៖ Vann Vann

ប្រភព៖ Xinhua

ចុចអាន៖ បៃដិន បញ្ជូន B-1 ៤គ្រឿងទៅន័រវែស ជាសារគំរាម ពូទីន