អាមេរិក​ជំរុញឲ្យចិន ​បន្ធូរបន្ថយ​ច្បាប់​កូវីដ សម្រាប់​អ្នកការទូត

សហរដ្ឋអាមេរិកបាននិយាយកាលពីថ្ងៃព្រហស្បតិ៍ទី២៧ខែមករាថា ខ្លួនកំពុងស្នើសុំឲ្យចិនបន្ធូរបន្ថយច្បាប់ធ្វើចត្តាឡីស័កសម្រាប់អ្នកការទូត បន្ទាប់ពីទីក្រុងប៉េកាំងបានចោទប្រកាន់ទីក្រុងវ៉ាស៊ីនតោនថា កំពុងព្យាយាមបំផ្លិចបំផ្លាញព្រឹត្តិការណ៍កីឡាអូឡាំពិករដូវរងា។

ប្រទេសចិនដែលកំពុងបន្តអនុវត្តគោលនយោបាយសូន្យកូវីដ បានដាក់អាណត្តិធ្វើចត្តាឡីស័កយ៉ាងតិច១៤ថ្ងៃ សម្រាប់អ្នកដំណើរដែលចូលមកប្រទេស និងបានបិទតំបន់សំខាន់ៗម្តងហើយម្តងទៀត។

អ្នកនាំពាក្យក្រសួងការបរទេសអាមេរិកលោក Ned Price បាននិយាយថា សហរដ្ឋអាមេរិកបានពិភាក្សាជាមួយចិន ជុំវិញការធ្វើចត្តាឡីស័កនិងច្បាប់ ដែលដំណើរការប្រឆាំងនឹងសិទ្ធិនិងអភ័យឯកសិទ្ធិការទូត។

លោក Price បានប្រាប់អ្នកយកព័ត៌មានថា “យើងបានផ្តល់អនុសាសន៍នូវអ្វីដែលយើងគិតថាជាជម្រើសសមហេតុផលជាច្រើន ដែលស្របជាមួយនឹងវិធានការកាត់បន្ថយកូវីដ និងស្របតាមបទដ្ឋានការទូតអន្តរជាតិ”។ 

យ៉ាងណាក្តី លោកបន្តថា ​មិន​មាន​ការ​ផ្លាស់​ប្តូរ​ស្ថានភាព​ប្រតិបត្តិការ​របស់​ស្ថានទូត​ក្នុង​ទីក្រុង​ប៉េកាំង​ទេ ​បើ​ទោះ​បី​ជា​មាន​ការ​ព្រួយ​បារម្ភ​ក៏​ដោយ។

មុននេះ កាសែត Global Times គ្រប់គ្រងដោយរដ្ឋរបស់ប្រទេសចិន បានព្រមានប្រឆាំងក្រសួងការបរទេសអាមេរិក ដែលផ្តល់ការអនុញ្ញាតឲ្យបុគ្គលិក ឬក្រុមគ្រួសារចាកចេញពីប្រទេសចិន។

ការចាកចេញបែបនេះ បានត្រឹមតែបង្កឲ្យមានការភ័យស្លន់ស្លោ បង្កាច់បង្ខូចការងារប្រឆាំងរោគរាតត្បាតរបស់ប្រទេសចិន និងរំខានដល់ការធ្វើម្ចាស់ផ្ទះកីឡាអូឡាំពិករដូវរងាដោយជោគជ័យរបស់ ចិនប៉ុណ្ណោះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន ប្រាប់ឲ្យកាត់បន្ថយការទិញទំនិញពីបរទេស ប្រយ័ត្នឆ្លងកូវីដ