កូរ៉េខាងជើង អួតថា អាចបាញ់មីស៊ីលទៅ អាមេរិក អង្រួនពិភពលោក

កូរ៉េខាងជើងបាននិយាយថា ខ្លួនអាច “អង្រួនពិភពលោក” ដោយការបាញ់មីស៊ីលទៅកាន់សហរដ្ឋអាមេរិក ហើយបានអះអាងទៀតថា ប្រទេសនេះមានគ្រាប់បែកអ៊ីដ្រូសែន មីស៊ីលផ្លោងអន្តរទ្វីប និងមីស៊ីលល្បឿនលឿនជាងសំឡេង ដោយយកមកប្រើពេលណាក៏បាន ។

ក្រសួងការបរទេសកូរ៉េខាងជើងបាននិយាយកាលពីថ្ងៃអង្គារថា “នៅក្នុងពិភពលោកសព្វថ្ងៃនេះ ប្រទេសជាច្រើនខ្ជះខ្ជាយពេលវេលាក្នុងការដោះស្រាយជាមួយសហរដ្ឋអាមេរិកជាមួយនឹងការចុះចូល និងស្តាប់បង្គាប់ដោយងងឹតងងុល ហើយមានតែប្រទេសរបស់យើងប៉ុណ្ណោះនៅលើភពផែនដីនេះ ដែលអាចអង្រួនពិភពលោកដោយការបាញ់មីស៊ីលទៅកាន់ដីគោករបស់សហរដ្ឋអាមេរិកក្នុងរយៈចម្ងាយណាមួយ” ។

ក្រសួងបាននិយាយទៀតថា “មានប្រទេសជាង ២០០ នៅលើពិភពលោក ប៉ុន្តែមានតែប្រទេសមួយចំនួនប៉ុណ្ណោះដែលមានគ្រាប់បែកអ៊ីដ្រូសែន មីស៊ីលផ្លោងអន្តរទ្វីប និងមីស៊ីលល្បឿនលឿនជាងសំឡេង” ។

ឆ្លើយតបនឹងសេចក្តីថ្លែងការណ៍នេះ អ្នកនាំពាក្យក្រសួងការបរទេសអាមេរិកបានប្រាប់សារព័ត៌មាន The Hill ថា ទីក្រុងវ៉ាស៊ីនតោនមើលឃើញថា ទីក្រុងព្យុងយ៉ាងជា “ការគំរាមកំហែងដល់សន្តិភាព និងសន្តិសុខអន្តរជាតិ និងជារបបមិនរីកចម្រើនជាសកល” ប៉ុន្តែបានទទូចថា សហរដ្ឋអាមេរិក “គ្មានចេតនាអរិភាព” ចំពោះប្រទេសឯកោមួយនេះនោះទេ ។

គួរបញ្ជាក់ថា ប្រទេសកូរ៉េខាងជើងបានធ្វើការសាកល្បងកាំជ្រួចមីស៊ីលចំនួន ៧ គ្រាប់រួចមកហើយត្រឹមដើមខែនេះដែលភាគច្រើនត្រូវបានបាញ់ឆ្ពោះទៅសមុទ្រជប៉ុន ខណៈកាលពីសប្តាហ៍មុនបានបាញ់សាកល្បងមីស៊ីលផ្លោងរយៈចម្ងាយមធ្យម Hwasong-12 ជាលើកដំបូង ចាប់តាំងពីឆ្នាំ ២០១៧ ហើយកាំជ្រួចមីស៊ីលនេះត្រូវបានគេជឿថា មានសមត្ថភាពវាយប្រហារលើកោះហ្គាំនៃទឹកដីរបស់អាមេរិក ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ អាមេរិក ឲ្យរង្វាន់ ១០ លានដុល្លារ បើអ្នកណាជួយចាប់មេដឹកនាំក្រុម ISIS-K (មានវីដេអូ)