ព័ត៌មានអន្ដរជាតិ

ទូរទស្សន៍ តៃវ៉ាន់ ផ្សាយខុសថា ចិន បើកការវាយប្រហារលើក្រុងតៃប៉ិ និងចេញមុខសុំទោសភ្លាមៗ

បានផុស

២ years មុន

នៅ

ថ្ងៃពុធ ២០ មេសា ២០២២

ដោយ

ស្ថានីយទូរទស្សន៍មួយដែលគាំទ្រដោយរដ្ឋាភិបាលតៃវ៉ាន់បានចេញមកសុំទោស និងជំរុញប្រជាជនកុំឲ្យមានការភិតភ័យ បន្ទាប់ពីបានរាយការណ៍ច្រឡំថា ចិនបើកការវាយប្រហារលើទីក្រុងតៃប៉ិ ចំពេលមានភាពតានតឹងផ្នែកយោធាកំពុងកើនឡើងជាមួយទីក្រុងប៉េកាំង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលនៃការផ្សាយព័ត៌មានផ្ទាល់នៅព្រឹកថ្ងៃពុធនេះ ស្ថានីយ៍ទូរទស្សន៍ CTS បានច្រឡំបង្ហាញព័ត៌មាននៅពីក្រោមអេក្រង់ថា នាវាយោធា និងហេដ្ឋារចនាសម្ព័ន្ធសំខាន់ៗនៅជិតទីក្រុងតៃប៉ិកំពុងរងការវាយប្រហារដោយមីស៊ីលរបស់ចិន ។

ក្រោយមក នៅក្នុងសារដែលច្រឡំផ្សាយនៅម៉ោង ១០ ព្រឹកនោះត្រូវបានខាងស្ថានីយ៍ទូរទស្សន៍ចេញមុខសុំទោស ហើយបកស្រាយថា សារនោះគឺសម្រាប់ការហាត់សមជាមួយនាយកដ្ឋានពន្លត់អគ្គីភ័យនៅទីក្រុងតៃប៉ិកាលពីថ្ងៃអង្គារ ប៉ុន្តែបានចេញផ្សាយខុស ដោយសារតែកំហុសបច្ចេកទេស ហើយបានប្រាប់ប្រជាពលរដ្ឋសូមកុំភ័យស្លន់ស្លោផងដែរ ។

កន្លងមក ប្រទេសចិនមិនដែលបោះបង់ការប្រើប្រាស់កម្លាំងយោធាដើម្បីនាំយកតៃវ៉ាន់មកក្រោមការគ្រប់គ្រងរបស់ខ្លួនវិញឡើយ ហើយបានបង្កើនសកម្មភាពយោធានៅក្បែរនោះក្នុងរយៈពេល ២ ឆ្នាំចុងក្រោយនេះ ដើម្បីជំរុញកោះនេះឲ្យទទួលយកការទាមទារអធិបតេយ្យភាពរបស់ទីក្រុងប៉េកាំង ។

ទន្ទឹមនោះ តៃវ៉ាន់ក៏បានបង្កើនកម្រិតប្រកាសអាសន្នរបស់ខ្លួន ចាប់តាំងពីរុស្ស៊ីចូលលុកលុយលើអ៊ុយក្រែន ដោយព្រួយបារម្ភថា ចិនអាចនឹងធ្វើសកម្មភាពស្រដៀងគ្នានេះ បើទោះជារដ្ឋាភិបាលតៃវ៉ាន់មិនបានបង្ហាញពីសញ្ញាណាមួយថានឹងមានការវាយប្រហារកើតឡើងក៏ដោយ ៕