សៀវភៅខ្នាតតូច បាត់ខ្លួនរាប់ទសវត្សរ៍ បង្ហាញខ្លួននៅញូវយ៉ក មានតម្លៃកប់ពពក

សៀវភៅកំណាព្យខ្នាតតូចដែលសរសេរដោយក្មេងអាយុ ១៣ឆ្នាំ Charlotte Bronte ត្រូវបានដាក់បង្ហាញក្នុងទីក្រុងញូវយ៉ក សហរដ្ឋអាមេរិក កាលពីថ្ងៃព្រហស្បតិ៍ បន្ទាប់ពីលាក់ទុកជាងមួយសតវត្សរ៍កន្លងមក។

សៀវភៅមួយក្បាលនេះ សរសេរលើសន្លឹកចំនួន ១៥ទំព័រ ក្នុងកំលុងឆ្នាំ១៨២៩។ ទំហំរបស់វា​តូចជាងសន្លឹកបៀមួយសន្លឹកទៅទៀត ហើយវាសរសេរជាកម្រងកំណាព្យចំនួន ១០បទ ដែលមិនទាន់បោះពុម្ពនោះទេ។

សៀវភៅនេះបានបាត់វត្តមានជាសាធារណៈតាំងពីខែវិច្ឆិកា ឆ្នាំ១៩១៦មកម្ល៉េះ ដែលកាលណោះត្រូវបានដាក់លក់ដេញថ្លៃ នៅទីក្រុងញូវយ៉ក ក្នុងតម្លៃ ៥២០ដុល្លារអាមេរិក។

យ៉ាងណាមិញ ថ្មីៗនេះ សៀវភៅដ៏តូចនេះ បានបង្ហាញខ្លួនម្ដងទៀត និងត្រូវបានដាក់លក់នៅក្នុងពិព័រណ៍សៀវភៅបុរាណអន្តរជាតិញូវយ៉ក ជាមួយនឹងតម្លៃដេញថ្លៃចាប់ពី ១.២៥លានដុល្លារអាមេរិក។ ទោះយ៉ាងណា មកទល់នឹងថ្ងៃសោរ៍ ទី២៣ ខែមេសានេះ វាមិនទាន់លក់ចេញនៅឡើយទេ ខណៈពិព័រណ៍នឹងបញ្ចប់នៅថ្ងៃអាទិត្យ ទី២៤​ ខែមេសា ឆ្នាំ២០២២៕

ប្រែសម្រួល៖ សន្យា

ចុចអាន៖ ត្បូងពេជ្រខ្មៅ ធំបំផុតលើពិភពលោក លក់ដាច់ហើយ តម្លៃរាប់លានដុល្លារ