រុស្ស៊ី បន្តបាញ់ផ្លោងលើរោងចក្រដែក Azovstal ភ្លាមៗបន្ទាប់ពីការជម្លៀសជនស៊ីវិល ត្រូវបញ្ឈប់

មេបញ្ជាការកងពលតូចឆ្មាំជាតិអ៊ុយក្រែន លោក Denys Shlega បាននិយាយនៅក្នុងបទសម្ភាសន៍តាមទូរទស្សន៍ថា ការបាញ់ផ្លោងបានបន្តនៅរោងចក្រដែក Azovstal ភ្លាមៗនៅពេលដែលក្រុមជួយសង្គ្រោះ បញ្ឈប់ការជម្លៀសជនស៊ីវិល។

យោងតាមលោក Shlega, ការជម្លៀសយ៉ាងហោចណាស់មួយជុំទៀត គឺត្រូវការជាចាំបាច់ ដើម្បីជួយជនស៊ីវិលចេញពីរោងចក្រនេះ។

លោកនិយាយថា កុមារតូចៗរាប់សិបនាក់នៅតែស្ថិតក្នុងលេណដ្ឋានខាងក្រោមរោងចក្រដែកនេះ ក៏ដូចជាជនស៊ីវិលរាប់រយនាក់ ទាហានជិត៥០០នាក់ដែលរងរបួស និងសាកសពជាច្រើននាក់ទៀតផងដែរ។

ការបាញ់ផ្លោងនេះកើតឡើង បន្ទាប់ពីក្រសួងការពារជាតិរុស្ស៊ីនិយាយថា ជនស៊ីវិលចំនួន ៨០ នាក់ ត្រូវបានជម្លៀសចេញពីរោងចក្រដែក Azovstal ក្នុងទីក្រុង Mariupol។ យ៉ាងណាក្តី ប្រធានាធិបតីអ៊ុយក្រែន លោក Zelenskyy បានដាក់តួលេខអ្នកជម្លៀសប្រហែល ១០០ នាក់។

ក្រសួងត្រូវបានដកស្រង់សម្តីថា អ្នកជម្លៀសទាំងនោះដែលចង់ទៅតំបន់គ្រប់គ្រងដោយអ៊ុយក្រែន គឺត្រូវបានប្រគល់ទៅឲ្យតំណាងអង្គការសហប្រជាជាតិ និងគណៈកម្មាធិការ កាកបាទក្រហមអន្តរជាតិ៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ រុស្ស៊ីប្រាប់ថា ប្រជាជនម៉ុលដាវី គួរតែព្រួយបារម្ភអំពីអនាគតរបស់ពួកគេ