ព័ត៌មានអន្ដរជាតិ

Karine ជាស្ត្រីស្បែកខ្មៅដំបូងកាន់តួនាទីរដ្ឋមន្ត្រីព័ត៌មានសេតវិមាន

បានផុស

២ years មុន

នៅ

ថ្ងៃសុក្រ ៦ ឧសភា ២០២២

ដោយ

ប្រធានាធិបតីសហរដ្ឋអាមេរិក លោក ចូ បៃដិន បានជ្រើសរើសលោកស្រី Karine Jean-Pierre ឲ្យកាន់តួនាទីជារដ្ឋមន្ត្រីព័ត៌មានប្រចាំសេតវិមានបន្តពីលោកស្រី Jen Psaki ដែលបានលាឈប់ និងបានក្លាយជាស្ត្រីស្បែកខ្មៅ និងស្រឡាញ់ភេទដូចគ្នាដំបូងគេបង្អស់កាន់តួនាទីនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Psaki ដែលនឹងចាកចេញពីតួនាទីនៅថ្ងៃទី១៣ ខែឧសភា ធ្លាប់បាននិយាយកាលពីដំបូងនៅក្នុងរដ្ឋបាលប្រធានាធិបតី ចូ បៃដិន ដែលចូលកាន់តំណែងកាលពីខែមករា ឆ្នាំ២០២១ថា លោកស្រីមានគម្រោងកាន់តួនាទីជារដ្ឋមន្ត្រីព័ត៌មានប្រហែលជាមួយឆ្នាំប៉ុណ្ណោះ។

លោកស្រី Jean-Pierre អាយុ៤៤ឆ្នាំបានបម្រើការងារជាអនុរដ្ឋមន្ត្រីព័ត៌មានចាប់តាំងពីអាណត្តិរបស់លោក បៃដិន បានចូលកាន់អំណាច។ លោកស្រីបានធ្វើការក្នុងយុទ្ធនាការណ៍ឃោសនាបោះឆ្នោតប្រធានាធិបតីឆ្នាំ២០២០ និងក្នុងសេតវិមានរបស់អតីតប្រធានាធិបតី Barack Obama ព្រមទាំងធ្លាប់ជាប្រធានការិយាល័យកិច្ចការសាធារណៈប្រចាំ MoveOn.org ជាក្រុមតស៊ូមតិ។

លោក បៃដិន បានសន្យាដាក់មន្ត្រីកំពូល សមាជិកគណៈរដ្ឋមន្ត្រី និងចៅក្រមដែលឆ្លុះបញ្ចាំងពីភាពចម្រុះនៃពលរដ្ឋអាមេរិកដែលប្រជាជនស្បែកសមានតិចជាង៦០%នៃពលរដ្ឋអាមេរិក ប៉ុន្តែតាំងពីដើមមកភាគច្រើនបំផុតជនស្បែកសកាន់តំណែងកំពូលៗក្នុងជួររដ្ឋាភិបាល។

«Karine មិនត្រឹមតែនាំមកនូវបទពិសោធ ទេពកោសល្យ និងភាពស្មោះត្រង់ចំពោះការងារដ៏លំបាកប៉ុណ្ណោះទេ ប៉ុន្តែលោកស្រីនឹងបន្តដឹកនាំក្នុងការទំនាក់ទំនងអំពីការងារនៃរដ្ឋបាលបៃដិន-ហារីស ក្នុងនាមប្រជាជនអាមេរិក»។ លោក ចូ បៃដិន មានប្រសាសន៍ក្នុងសេចក្តីថ្លែងការណ៍។

ក្រសួងព័ត៌មានគឺជាកន្លែងការងារដែលប្រឈមនឹងសាធារណៈដ៏លំបាកខ្លាំងបំផុតនៅក្នុងសេតវិមាន។

លោកស្រី Jean-Pierre មានប្រសាសន៍ក្នុងការបង្ហាញខ្លួននៅសាលព័ត៌មានសេតវិមានថា ៖«នេះជាពេលវេលាប្រវត្តិសាស្ត្រ ហើយខ្ញុំមិនចាញ់ទេ។ វាជាកិត្តិយស និងឯកសិទ្ធិមួយដែលស្ថិតនៅពីក្រោយវេទិកានេះ»។

លោកស្រី Dee Dee Meyers បានក្លាយជាស្ត្រីដំបូងគេកាន់តំណែងរដ្ឋមន្ត្រីព័ត៌មាននៅសេតវិមានក្នុងទសវត្សរ៍ឆ្នាំ១៩៩០ក្រោមអាណត្តិអតីតប្រធានាធិបតី Bill Clinton៕

ប្រែសម្រួល៖ វីរបុត្រ
ប្រភព៖ Reuters

Related Topics:សហរដ្ឋអាមេរិក