អាមេរិក ជំរុញពលរដ្ឋរបស់ខ្លួន ឲ្យចាកចេញពី អ៊ុយក្រែន ជាបន្ទាន់ (មានវីដេអូ)

រដ្ឋាភិបាលសហរដ្ឋអាមេរិក កំពុងជំរុញឲ្យជនជាតិអាមេរិកនៅអ៊ុយក្រែន ត្រូវចាកចេញពីប្រទេសនេះជាបន្ទាន់ ដោយព្រមានថា រុស្ស៊ីកំពុងបង្កើនកិច្ចខិតខំប្រឹងប្រែង ដើម្បីបើកការវាយប្រហារលើហេដ្ឋារចនាសម្ព័ន្ធស៊ីវិល និងទីតាំងរដ្ឋាភិបាលក្នុងរយៈពេលប៉ុន្មានថ្ងៃខាងមុខនេះ។

សេចក្តីប្រកាសផ្នែកសន្តិសុខ នៅលើគេហទំព័ររបស់ស្ថានទូតបាននិយាយថា “ស្ថានទូតអាមេរិក សូមជំរុញឲ្យពលរដ្ឋអាមេរិក ចាកចេញពីអ៊ុយក្រែនឥឡូវនេះ ដោយប្រើមធ្យោបាយដឹកជញ្ជូនតាមផ្លូវគោកជាលក្ខណៈឯកជន ប្រសិនបើមានសុវត្ថិភាព”។

សេចក្តីប្រកាសបន្តថា “ស្ថានភាពសន្តិសុខនៅទូទាំងប្រទេសអ៊ុយក្រែន មានភាពប្រែប្រួលខ្លាំង ហើយលក្ខខណ្ឌអាចនឹងកាន់តែយ៉ាប់យ៉ឺនដោយគ្មានការព្រមានជាមុន”។

ការព្រមានជាថ្មីរបស់សហរដ្ឋអាមេរិក កើតឡើងខណៈការលុកលុយរបស់រុស្ស៊ីលើអ៊ុយក្រែន ឈានចូលដល់ខែទី៦ ហើយកើតឡើង បន្ទាប់ពីការព្រមានស្រដៀងគ្នាពីប្រធានាធិបតីអ៊ុយក្រែនលោក Volodymyr Zelensky និងមន្ត្រីដទៃទៀត ដែលថា ទីក្រុងមូស្គូអាចនឹងធ្វើការវាយប្រហារខ្លាំងៗ រួមទាំងការបាញ់មីស៊ីលផងដែរនៅថ្ងៃពុធ ស្អែកនេះ។

លោក Zelensky បាននិយាយនៅក្នុងសារជាវីដេអូមួយកាលពីចុងសប្តាហ៍ថា “យើងទាំងអស់គ្នាចាំបាច់ត្រូវតែដឹងថា ក្នុងសប្តាហ៍នេះ រុស្ស៊ីអាចព្យាយាមធ្វើអ្វីដែលអាក្រក់ ជាពិសេសអ្វីដែលអាក្រក់ជាទីបំផុត”៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNN

ចុចអាន៖ កម្របំផុត! មេទ័ពអ៊ុយក្រែន ទម្លាយតួលេខទាហានរបស់ខ្លួន ដែលត្រូវ រុស្ស៊ី សម្លាប់