អាមេរិក អាចបញ្ចប់ការផ្ដល់ជំនួយឲ្យ អ៊ុយក្រែន បើរឿងទាំងនេះកើតឡើង

សារព័ត៌មាន Axios បានរាយការណ៍ថា ជំនួយដ៏ច្រើនលើសលប់ដែលសហរដ្ឋអាមេរិកផ្ដល់ឲ្យអ៊ុយក្រែន ចំពេលមានជម្លោះជាមួយរុស្ស៊ី អាចត្រូវបានកាត់បន្ថយ ឬបញ្ចប់ ប្រសិនបើគណបក្សសាធារណរដ្ឋឈ្នះអាសនៈសភានៅក្នុងការបោះឆ្នោតពាក់កណ្តាលអាណត្តិនៅថ្ងៃទី ៨ ខែវិច្ឆិកាខាងមុខ ។

ជំនួយការសេតវិមានបានប្រាប់សារព័ត៌មាន Politico កាលពីថ្ងៃពុធថា យ៉ាងណា រដ្ឋបាលលោក បៃដិន មិនបានព្រមានដល់ទីក្រុងកៀវអំពីលទ្ធភាពនៃការដល់ទីបញ្ចប់សម្រាប់ជំនួយរបស់សហរដ្ឋអាមេរិក នៅក្នុងព្រឹត្តិការណ៍ដែលគណបក្សសាធារណរដ្ឋឈ្នះអាសនៈសភា បន្ទាប់ពីការបោះឆ្នោតនោះទេ ប៉ុន្តែក្រុមមន្ត្រីនៅទីក្រុងកៀវ ដឹងថា រឿងនេះពិតជាអាចកើតឡើង ។

ដោយឡែកនៅក្នុងការអត្ថាធិប្បាយទៅកាន់សារព័ត៌មាន Axios, សមាជិកសភាលោក Jim Banks ដែលជាប្រធានគណៈកម្មាធិការសិក្សាមកពីគណបក្សសាធារណៈរដ្ឋបានចង្អុលបង្ហាញថា គណបក្សរបស់គាត់នឹងផ្តោតលើបញ្ហាក្នុងប្រទេសជាចម្បង បន្ទាប់ពីការបោះឆ្នោតពាក់កណ្តាលអាណត្តិ ។

លោក Jim Banks ជឿថា អ្នកមិនអាចផ្ដល់ជំនួយឲ្យបរទេសបានទេ នៅពេលដែលអ្នកធ្លាក់ខ្លួនខ្សោយខ្លាំងនៅក្នុងការដឹកនាំប្រទេសខ្លួនឯងនោះ ។ យើងត្រូវធ្វើឲ្យអាមេរិកត្រឡប់មកវិញ ជាពិសេសគឺការដោះស្រាយការចំណាយថាមពល និងអតិផរណា” ។

សហរដ្ឋអាមេរិកគឺជាអ្នកគាំទ្រដ៏ធំបំផុតរបស់អ៊ុយក្រែន ចាប់តាំងពីការផ្ទុះឡើងនៃជម្លោះរបស់ខ្លួនជាមួយរុស្ស៊ីកាលពីចុងខែកុម្ភៈ ដោយបានផ្តល់ជំនួយយោធាជាង ១៦.៨ ពាន់លានដុល្លារដល់ទីក្រុងកៀវ រួមទាំងប្រព័ន្ធបាញ់កាំភ្លើងធំចល័តខ្ពស់ HIMARS, កាំភ្លើងយន្ត M777 និងយន្តហោះដ្រូនប្រយុទ្ធជាដើម ។

ពាក់ព័ន្ធនឹងបញ្ហានេះដែរ ទីក្រុងមូស្គូបាននឹងកំពុងបដិសេធចំពោះការចែកចាយសព្វាវុធទាំងនោះពីសំណាក់សហរដ្ឋអាមេរិក ដោយនិយាយថា ពួកគេកាន់តែអូសបន្លាយការប្រយុទ្ធ និងបង្កើនហានិភ័យនៃការប្រឈមមុខដាក់គ្នាដោយផ្ទាល់រវាងរុស្ស៊ី និងអង្គការណាតូ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ក្រុមហ៊ុនអាមេរិក Lockheed Martin ប្រាប់ទំហំប្រាក់ចំណូលការលក់អាវុធ ក្នុងត្រីមាសទី ៣ នៃឆ្នាំនេះ