ហ្វីលីពីន ពិចារណាទិញប្រេងពី រុស្ស៊ី ទោះមានការប្រឆាំងពីលោកខាងលិច

រដ្ឋាភិបាលហ្វីលីពីនកំពុងពិចារណាទិញប្រេងពីប្រទេសរុស្ស៊ី ទោះបីជាមានការប្រឆាំងពីបណ្តាប្រទេសលោកខាងលិចក៏ដោយ ។

ប្រទេសហ្វីលីពីនពឹងផ្អែកខ្លាំងលើប្រេងឥន្ធនៈនាំចូល ប៉ុន្តែតម្លៃបានកើនឡើង ដោយសារតែជម្លោះនៅអ៊ុយក្រែន និងការធ្លាក់ថ្លៃប្រាក់ប៉េសូជាដើម ។

លោកប្រធានាធិបតី Ferdinand Marcos Junior បាននិយាយកាលពីថ្ងៃទី ៥ ខែតុលាថា ប្រទេសរបស់លោកបើកចំហរក្នុងការទិញប្រេងពីរុស្ស៊ី ដើម្បីកាត់បន្ថយសម្ពាធសេដ្ឋកិច្ច ខណៈស្ថានទូតរុស្ស៊ីនៅទីក្រុងម៉ានីលក៏បានស្វាគមន៍ចំពោះការលើកឡើងនេះផងដែរ ។

ពាក់ព័ន្ធនឹងបញ្ហានេះដែរ មន្ត្រី​ហ្វីលីពីន​គ្រោង​ចរចា​ជាមួយ​រុស្ស៊ី​នៅ​ក្រៅ​វេទិកា​សហប្រតិបត្តិការ​សេដ្ឋកិច្ច​អាស៊ី​ប៉ាស៊ីហ្វិក (APEC) ​នាខែវិច្ឆិកានៅក្នុង​ប្រទេស​ថៃ ។

ទោះយ៉ាងណា ក្រុមប្រទេស G7 ទំនងជាប្រឆាំងនឹងពាណិជ្ជកម្មណាមួយរបស់ហ្វីលីពីន ក្រោយពេលដែលក្រុមប្រទេសទាំងនេះបានយល់ព្រមកំណត់តម្លៃលើប្រេងរុស្ស៊ី ដើម្បីកាត់បន្ថយលទ្ធភាពរបស់វិមានក្រឹមឡាំងក្នុងការផ្គត់ផ្គង់ដល់សង្គ្រាមលុកលុយលើអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី បញ្ជូនឥន្ធនៈនុយក្លេអ៊ែរទៅប្រទេសមួយនៅអាស៊ី