ព្រះចៅស៊ុលតង់ ព្រុយណេ ទ្រង់ពាក់ស្បែកជើងខុសគេ ពេលប្រជុំ អាស៊ាន នៅ កម្ពុជា

ព្រះចៅស៊ុលតង់ Haji Hassanal Bolkiah Muizzaddin Waddaulah ព្រះមហាក្សត្រនៃប្រទេសព្រុយណេ ត្រូវបានគេប្រទះឃើញទ្រង់ពាក់ព្រះសុពណ៌បាទ ក វែង (ស្បែកជើង ក វែង) ខុសពីមេដឹកនាំប្រទេសអាស៊ានដទៃទៀតទាំងអស់ អំឡុងពេលប្រជុំអាស៊ាន និងយាងគាល់ព្រះបាទ​សម្ដេច​ព្រះបរមនាថ នរោត្ដម សីហមុនី ព្រះមហាក្សត្រកម្ពុជា នៅព្រះបរមរាជវាំង នាថ្ងៃទី១០ ខែវិច្ឆិកានេះ ។

ទោះយ៉ាងណា នេះមិនមែនជាលើកទី ១ ទេដែលស្ដេចស៊ុលតង់អង្គនេះ ទ្រង់ពាក់ព្រះសុពណ៌បាទ ក វែង (ស្បែកជើង ក វែង) បែបនេះយាងជួបមេដឹកនាំកំពូលៗនោះ ពោលកាលពីខែមីនា ឆ្នាំ២០១៣ ព្រះចៅស៊ុលតង់ Hassanal Bolkiah បានយាងជួបជាមួយលោក Barack Obama អតីតប្រធានាធិបតីសហរដ្ឋអាមេរិក ដើម្បីពិភាក្សាពីការសម្រុះសម្រួលនៃជម្លោះដែនសមុទ្ររវាងប្រទេសអាស៊ីមួយចំនួន ។

ដោយឡែកនៅខែមេសា ឆ្នាំ ២០២១ ទ្រង់ពាក់ព្រះសុពណ៌បាទ ក វែង (ស្បែកជើង ក វែង) នេះទៀត យាងជួបជាមួយនឹងលោក Pham Minh Chinh នាយករដ្ឋមន្ត្រីវៀតណាម ក្នុងកិច្ចព្រមព្រៀងបង្កើនតម្លៃពាណិជ្ជកម្មទ្វេភាគីរហូតដល់ ៥០០ លានដុល្លារដុល្លារ នៅខាងក្រៅកិច្ចប្រជុំមេដឹកនាំអាស៊ាននៅទីក្រុងហ្សាកាតាប្រទេសឥណ្ឌូណេស៊ី ។

ចំណែកនៅខែសីហា ឆ្នាំ ២០២២ នេះ ព្រះចៅស៊ុលតង់ Hassanal Bolkiah ទ្រង់ពាក់ព្រះសុពណ៌បាទ ក វែង (ស្បែកជើង ក វែង) ដដែល យាងជួបជាមួយលោក Lee Hsien Loong នាយករដ្ឋមន្ត្រីសិង្ហបុរី ក្នុងព្រះរាជដំណើរទស្សនិច្ចផ្លូវរដ្ឋដើម្បីទំនាក់ទំនងទ្វេភាគីរវាងព្រុយណេ និងសិង្ហបុរី ។

គួរបញ្ជាក់ថា ព្រះចៅស៊ុលតង់ Hassanal Bolkiah ព្រះមហាក្សត្រនៃប្រទេសព្រុយណេ បានយាងមកដល់ព្រះរាជាណាចក្រកម្ពុជាកាលពីថ្ងៃទី៩ ខែវិច្ឆិកា ដើម្បីចូលរួមកិច្ចប្រជុំកំពូលអាស៊ានលើកទី៤០ និង ៤១ ក៏ដូចជាកិច្ចប្រជុំពាក់ព័ន្ធ ៕

ដោយ ៖ ជីវ័ន្ត

ចុចអាន ៖ ព្រះចៅស៊ុលតង់ ព្រុយណេ យាងបើកយន្តហោះដោយអង្គឯងផ្ទាល់ ចូលរួម​កិច្ចប្រជុំអាស៊ាននៅ កម្ពុជា