លោក Zelensky ទទួលស្គាល់ថា ប្រតិបត្តិការវាយបករបស់អ៊ុយក្រែន យឺតយ៉ាវខ្លាំងណាស់

ប្រធានាធិបតី Volodymyr Zelensky បានទទួលស្គាល់ថា វឌ្ឍនភាពនៅសមរភូមិគឺយឺតជាងការចង់បាន បន្ទាប់ពីអ៊ុយក្រែន បើកការវាយបកកាលពីប៉ុន្មានសប្តាហ៍មុន ដើម្បីដណ្តើមយកមកវិញ នូវតំបន់ដែលកាន់កាប់ដោយរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់ BBC ថា “មនុស្សមួយចំនួនជឿថា នេះគឺជាភាពយន្តហូលីវូដ ហើយរំពឹងថានឹងទទួលបានលទ្ធផលនៅពេលនេះ។ ប៉ុន្តែអ្វីដែលសំខាន់គឺជីវិតមនុស្ស”។

មុននេះ អ៊ុយក្រែន​និយាយ​ថា ការ​វាយ​លុក​របស់​ខ្លួន​ បាន​ដណ្តើម​យក​ភូមិ​ចំនួន៨ មក​វិញ​នៅ​ក្នុង​តំបន់​ភាគ​ខាង​ត្បូង Zaporizhzhia និងនៅ Donetsk ​ភាគ​ខាង​កើត។

លោក Zelensky លើកឡើងថា ប្រតិបត្តិការយោធាមិនងាយស្រួលទេ ព្រោះផ្ទៃដីអ៊ុយក្រែនប្រមាណ ២០ម៉ឺនគីឡូម៉ែត្រការ៉េ ត្រូវបានកងកម្លាំងរុស្ស៊ី ដាក់ពង្រាយមីន។

ទន្ទឹមនោះ មេដឹកនាំអ៊ុយក្រែន បានលើកឡើងជាថ្មីម្តងទៀត អំពីលទ្ធភាពទទួលយន្តហោះចម្បាំង F-16 ដែលផលិតដោយសហរដ្ឋអាមេរិក ហើយនិយាយថា លោកជឿថា ភីឡុតអាចចាប់ផ្តើមការហ្វឹកហាត់ភ្លាមៗក្នុងខែសីហា ហើយយន្តហោះដំបូង អាចបញ្ជូនមកដល់ក្នុងរយៈពេលប្រាំមួយឬប្រាំពីរខែ។

គួរបញ្ជាក់ថា ការកត់សម្គាល់របស់លោក Zelensky ទៅកាន់ BBC គឺកើតឡើងចំពេលនៃសន្និសីទស្តីពីការស្តារអ៊ុយក្រែនឡើងវិញ ដែលកំពុងប្រារព្ធធ្វើឡើងនៅក្នុងទីក្រុងឡុងដ៍ ចក្រភពអង់គ្លេស។

សេដ្ឋកិច្ចរបស់ប្រទេសអ៊ុយក្រែន បានធ្លាក់ចុះ២៩,២% ក្នុងឆ្នាំ២០២២ ហើយនៅដើមឆ្នាំនេះ ធនាគារពិភពលោកបានប៉ាន់ប្រមាណថា ថ្លៃចំណាយលើការកសាង និងស្តារឡើងវិញ គឺមានប្រមាណ៤១១ពាន់លានដុល្លារអាមេរិក៕

ប្រែសម្រួល៖ Vann Vann

ប្រភព៖ BBC

ចុចអាន៖ មីស៊ីលរុស្ស៊ីប្រភេទថ្មី អាចបំពាក់ក្បាលគ្រាប់នុយក្លេអ៊ែរចំនួន១០ នឹងបញ្ចេញទៅប្រយុទ្ធឆាប់ៗ