ក្រោយស្ថានភាពស្ងប់ស្ងាត់ សំបុត្រយន្តហោះ រុស្ស៊ី​ ចុះមកតម្លៃធម្មតាវិញ បន្ទាប់ពីឡើងដល់ ១ ពាន់ភាគរយ

​តម្លៃសំបុត្រហោះហើរ​ពីរុស្ស៊ីទៅក្រៅប្រទេស បានធ្លាក់ចុះមកនៅតម្លៃធម្មតា​វិញកាលពីថ្ងៃទី២៥ ខែមិថុនា បន្ទាប់ពីតម្លៃបានហក់ឡើងខ្ពស់គុណ ១,០០០ ភាគរយ​នៃតម្លៃដើម ​ដោយសារតែ​ស្ថានភាពរដ្ឋប្រហាររបស់ក្រុមទាហានស៊ីឈ្នួលក្នុងប្រទេសរុស្ស៊ី ។

អំឡុងពេលស្ថានភាពច្របូកច្របល់នេះ ក្រុមហ៊ុនអាកាសចរណ៍បានលក់សំបុត្រហោះហើរពីទីក្រុងមូស្គូទៅទីក្រុង Yerevan ប្រទេសអាមេនី ក្នុងតម្លៃប្រហែល ២,៣៥២ ដុល្លារ ដែលលើសពីតម្លៃ​ធម្មតាដល់ទៅ ១០០០ ភាគរយឯណោះ ខណៈសំបុត្រហោះទៅទីក្រុងឌូបៃមានតម្លៃជាង ៤ ​ពាន់ដុល្លារ ។

បើទោះបីជាតម្លៃហក់ឡើងខ្ពស់យ៉ាងនេះក្ដី ក៏សំបុត្រហោះហើរដោយផ្ទាល់ទៅកាន់ទីក្រុង Istanbul របស់ប្រទេសតួកទី, ទីក្រុង Astana នៃប្រទេសកាហ្សាក់ស្ថាន និងទីក្រុង Tbilisi របស់ប្រទេសហ្សកហ្ស៊ី ក៏លក់ដាច់គ្មានសល់ផងដែរ ។

ដោយឡែក បន្ទាប់ពីស្ថានភាពរដ្ឋប្រហារត្រូវបានស្ងប់ស្ងាត់ តម្លៃ​សំបុត្រ​ហោះហើរ​បានធ្លាក់ចុះមកតម្លៃធម្មតាវិញ ដោយការហោះហើរទៅកាន់ទីក្រុង​ Yerevan ប្រទេសអាមេនី មានតម្លៃជាង ២៨៩ ដុល្លារ ​ហើយទៅឌូបៃ​ មានតម្លៃ ៥៥៦ ដុល្លារប៉ុណ្ណោះកាលពីថ្ងៃទី២៥​ ខែមិថុនា ខណៈតម្លៃ​សំបុត្រនេះ ក៏អាចកាន់តែចុះថែមទៀតផងដែរនៅក្នុងសប្តាហ៍នេះ ។

គួរបញ្ជាក់ថា កាលពីថ្ងៃទី២៤​ ខែមិថុនា មេក្រុមទាហ៊ានស៊ីស្នួល Wagner Group បានដឹកនាំការបះបោល​ប្រដាប់អាវុធ​នៅរុស្ស៊ី ខណៈលោក Dmitry Medvedev អនុប្រធានក្រុមប្រឹក្សាសន្តិសុខរុស្ស៊ីបញ្ជាក់ថា វាគឺជាប្រតិបត្តិការមួយដែលរៀបចំឡើងដោយមានការគិតគូរយ៉ាងលម្អិតដើម្បីកាន់អំណាច ៕

ប្រែសម្រួល៖​ នាង​ រតនៈ

ប្រភព ៖ Russian Market

ចុចអាន ៖ លោក Medvedev ប្រាប់ពីគោលបំណងរបស់ក្រុមបះបោរប្រដាប់អាវុធនៅ រុស្ស៊ី