សំរាមនៅទីក្រុងបាងកកកំពុងគរដូចភ្នំ ទោះមានឡានដឹកជាង ១ ពាន់គ្រឿងក៏ដោយ

នៅក្រុងបាងកក សំរាមគរពាសពេញដីដូចភ្នំ​ ទោះបីអភិបាលក្រុ​ងជួលឡានដឹកសំរាមពីក្រុមហ៊ុនឯកជនជាង ១ ពាន់គ្រឿងមកដឹក ក៏មិនអាចបំពេញតាមតម្រូវការបានផងដែរ ។

អភិបាលក្រុងបាងកក លោក Chadchart Sittipunt បានត្អូញត្អែរថា រដ្ឋបាលក្រុងចំណាយប្រហែល ៨ ពាន់លានបាតក្នុងមួយឆ្នាំសម្រាប់តែការគ្រប់គ្រងសំរាមប៉ុណ្ណោះ ប៉ុន្តែទោះបីជាយ៉ាងណា វាហាក់ដូចជាការគ្រប់គ្រងនេះមិនមានប្រសិទ្ធភាពសោះ ។

ចំពោះមូលហេតុវិញ រដ្ឋបាលក្រុងបាងកកបានរកឃើញថា រថយន្តជួលទាំងនេះ ជាមធ្យមធ្វើការតិចជាងពាក់កណ្តាលនៃពេលវេលាដែលបានបញ្ជាក់នៅក្នុងកិច្ចសន្យាជួល ។​

លោក Chadchart បានបន្ថែមថា រដ្ឋបាលក្រុងគួរតែជួលឡានដឹកសំរាមទាំងអស់ឲ្យដំណើរការងារពេញ ១៦ ម៉ោងក្នុងមួយថ្ងៃ ដែលធ្វើឲ្យវាកាន់តែមានប្រយោជន៍បំផុតសម្រាប់ប្រជាពលរដ្ឋក្នុងទីក្រុងបាងកក។

បើសិនជាក្រុមហ៊ុនប្រមួលសំរាមធ្វើការ ១៦ ម៉ោង នោះនឹងអាចប្រមូលសំរាមបានច្រើន ហើយលើសពីនេះ អភិបាលក្រុងបាងកក ចង់ឲ្យមានការប្រមូលសំរាម ២ ដងក្នុងមួយសប្តាហ៍ ខណៈអ្នកប្រមួល​សំរាម​​ភាគ​ច្រើន​ទទួល​បាន​ប្រាក់​ខែ​តិច ស្របពេលពួកគេ​កំពុងចង់រកចំណូលបន្ថែម ៕

ប្រែសម្រួល៖ នាង រតនៈ

ប្រភព៖ Thai PBS