សភា ថៃ ប្រកាសថ្ងៃបោះឆ្នោតជ្រើសរើសនាយករដ្ឋមន្ត្រីជុំបន្ទាប់

សម័យប្រជុំរួមគ្នានៃរដ្ឋសភា និងព្រឹទ្ធសភាថៃដើម្បីបោះឆ្នោតជ្រើសរើសនាយករដ្ឋមន្ត្រីទី ៣០ របស់ប្រទេស អាចនឹងប្រព្រឹត្តទៅចន្លោះថ្ងៃទី១៨ ឬថ្ងៃទី១៩ ខែសីហា ពោលរយៈពេល ៣ ថ្ងៃ ក្រោយតុលាការធម្មនុញ្ញធ្វើសេចក្ដីសម្រេចលើញត្តិទាក់ទងនឹងការបន្ត ឬដកសិទ្ធិលើមេដឹកនាំចលនាឆ្ពោះទៅមុខ លោក Pita Limjaroenrat ។

ប្រធានសភាថៃលោក Wan Muhamad Noor Matha បាននិយាយកាលពីថ្ងៃអាទិត្យថា នៅថ្ងៃទី១៦ ខែសីហា តុលាការធម្មនុញ្ញនឹងសម្រេចថាតើពិចារណាលើញត្តិទាក់ទងនឹងការបន្តតែងតាំង ឬដកសិទ្ធិមេដឹកនាំចលនាឆ្ពោះទៅមុខរូបនេះ លែងឲ្យធ្វើជានាយករដ្ឋមន្ត្រីឬយ៉ាងណា ដូច្នេះសភាគ្រោងនឹងកោះប្រជុំសមាជិកសភាឡើងវិញក្នុងរយៈពេល ៣ ថ្ងៃបន្ទាប់ពីសេចក្ដីសម្រេចនោះ ដើម្បីបោះឆ្នោតជ្រើសរើសនាយករដ្ឋមន្ត្រីជុំបន្ទាប់ ។

ថ្លែងនៅមុនពេលចាកចេញទៅចូលរួមមហាសន្និបាតអន្តរសភាអាស៊ានក្នុងប្រទេសឥណ្ឌូណេស៊ី លោក Wan Muhamad បានរំលឹកឡើងវិញថា សភាគួរតែរង់ចាំការសម្រេចរបស់តុលាការធម្មនុញ្ញសិន មុននឹងធ្វើការសកម្មភាពណាមួយទាក់ទងនឹងតំណែងនាយករដ្ឋមន្ត្រី ។

ពាក់ព័ន្ធនឹងបញ្ហានេះដែរ សម័យប្រជុំរួមគ្នានៃរដ្ឋសភា និងព្រឹទ្ធសភាដើម្បីបោះឆ្នោតជ្រើសរើសនាយករដ្ឋមន្ត្រីបានបន្តអាក់ខានជាច្រើនលើកច្រើនសាមកហើយ ជាក់ស្ដែងកាលពីថ្ងៃសុក្រ លោក Wan Muhamad ក៏បានបញ្ជាឲ្យលើកពេលបន្ថែមទៀតផងដែរ បន្ទាប់ពីសមាជិកសភាគណបក្សចលនាឆ្ពោះទៅមុខ បានទាមទារឲ្យសភាពិចារណាឡើងវិញនូវសេចក្តីសម្រេចលើលោក Pita កាលពីថ្ងៃទី១៩ ខែកក្កដា ។

គួរបញ្ជាក់ថា សមាជិកសភាមកពីបក្សចលនាឆ្ពោះទៅមុខ បានដាក់ញត្តិទៅតុលាការធម្មនុញទាក់ទងនឹងសេចក្តីសម្រេចរបស់សភាកាលពីថ្ងៃទី១៩ ខែកក្កដា ដែលបោះឆ្នោតទម្លាក់លោក Pita លែងឲ្យឈរឈ្មោះជានាយករដ្ឋមន្ត្រី ហើយជាលទ្ធផល ការពិភាក្សាលើសំណើដែលស្នើឡើងដោយបក្សឈ្នះឆ្នោតមួយនេះ បានអូនបន្លាយពេលកិច្ចប្រជុំសភាជុំបន្ទាប់ម្ដងជាពីរដង ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ លោក ថាក់ស៊ីន ប្រាប់មូលហេតុដែលពន្យារពេលវិលចូលស្រុកនៅថ្ងៃទី១០ ខែសីហានេះ

ចុចអាន ៖ លោក Pita និយាយរឿងលទ្ធិប្រជាធិបតេយ្យ ថៃ ក្រោយបាត់ឱកាសមាស ធ្វើជានាយករដ្ឋមន្ត្រី