ព័ត៌មានអន្ដរជាតិ

រដ្ឋាភិបាល ហ្វីលីពីន និងក្រុមឧទ្ទាមកុម្មុយនីស្ត បន្តកិច្ចចរចាសន្តិភាពឡើងវិញ

បានផុស

១ year មុន

នៅ

ថ្ងៃពុធ ២៩ វិច្ឆិកា ២០២៣

ដោយ

រដ្ឋាភិបាលហ្វីលីពីន និងក្រុមឧទ្ទាមកុម្មុយនីស្តរបស់ប្រទេសនេះកាលពីថ្ងៃអង្គារបានព្រមព្រៀងគ្នាបន្តកិច្ចចរចាសន្តិភាពឡើងវិញក្នុងគោលបំណងបញ្ចប់ជម្លោះប្រដាប់អាវុធដ៏យូរបំផុតមួយនៅអាស៊ី ក្រោមការសម្របសម្រួលរបស់ប្រទេសន័រវេស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីទាំងពីរបាននិយាយនៅក្នុងសេចក្ដីថ្លែងការណ៍រួមមួយថា ពួកគេបានចុះហត្ថលេខាលើកិច្ចព្រមព្រៀងសន្តិភាពនៅទីក្រុងអូស្លូ លើតម្រូវការក្នុងការរួបរួមដើម្បីដោះស្រាយបញ្ហាប្រឈម និងដោះស្រាយហេតុផលនៃជម្លោះប្រដាប់អាវុធ ជាពិសេសបានយល់ព្រមលើ “ដំណោះស្រាយជាគោលការណ៍ និងសន្តិភាព” ។

ទីប្រឹក្សាសន្តិភាពរបស់ប្រធានាធិបតីហ្វីលីពីនលោក Carlito Galvez បាននិយាយនៅក្នុងសន្និសីទសារព័ត៌មានមួយថា “ភាគីទាំងពីរបានយល់ព្រមចំពោះការដោះស្រាយជម្លោះប្រដាប់អាវុធដោយសន្តិវិធី និងជាគោលការណ៍ ហើយការដោះស្រាយឫសគល់នៃជម្លោះប្រដាប់អាវុធ និងការបញ្ចប់ការតស៊ូនៅពេលនេះ នឹងត្រួសត្រាយផ្លូវសម្រាប់ចលនាកងទ័ពប្រជាជនថ្មី (CPP-NPA) និងរណសិរ្សប្រជាធិបតេយ្យជាតិហ្វីលីពីន (NDFP)” ។

លោក Galvez បានចង្អុលបង្ហាញទៀតថា ការយល់ព្រមពីសំណាក់ភាគីទាំងពីរ គឺដោយសារតែពួកគេបានទទួលស្គាល់ពីបញ្ហាសេដ្ឋកិច្ចសង្គម និងនយោបាយដែលកំពុងចាក់ឫសគល់យ៉ាងជ្រៅ ហើយថែមទាំងបានយល់ព្រមបង្កើតក្របខ័ណ្ឌមួយដែលបង្ហាញពីអាទិភាពសម្រាប់កិច្ចចរចាសន្តិភាពផងដែរ ។

ពាក់ព័ន្ធនឹងបញ្ហានេះដែរ រដ្ឋមន្ត្រីការពារជាតិលោក Gilberto Teodoro បាននិយាយថា រដ្ឋាភិបាល និងរណសិរ្សទំនងជានឹងជួបប្រជុំគ្នានៅត្រីមាសទីមួយនៃឆ្នាំ ២០២៤ ប៉ុន្តែយើងមិនទាន់អាចកំណត់ពេលវេលាជាក់លាក់សម្រាប់រឿងនេះបាននៅឡើយនោះទេ ដោយសារតែវាមានគ្រោះថ្នាក់ក្នុងការបង្ហាញព័ត៌មានលម្អិត ហើយរាល់ការផ្លាស់ប្ដូរត្រូវតែមាននិរន្តភាព ។

គួរបញ្ជាក់ថា រដ្ឋាភិបាល និងកងទ័ពប្រជាជនថ្មី ដែលជាផ្នែកមួយរបស់យោធានៃបក្សកុម្មុយនីស្តហ្វីលីពីន បានចូលរួមក្នុងការប្រយុទ្ធគ្នា ចាប់តាំងពីទសវត្សរ៍ឆ្នាំ ១៩៦០ ហើយជម្លោះមួយនេះបានសម្លាប់មនុស្សជាង ៤ ម៉ឺននាក់ ខណៈកិច្ចចរចាកាលពីលើកមុនត្រូវបានបញ្ចប់ដោយអតីតប្រធានាធិបតីលោក Rodrigo Duterte កាលពី ៦ ឆ្នាំមុន ៕