កងទ័ពជនជាតិភាគតិច មីយ៉ាន់ម៉ា ប្រកាសដណ្ដើមបានទីក្រុងជាប់ព្រំដែន ចិន

អ្នកប្រយុទ្ធរបស់ក្រុមប្រដាប់អាវុធជនជាតិភាគតិចដែលកំពុងតតាំងនឹងកងកម្លាំងរដ្ឋាភិបាលយោធាមីយ៉ាន់ម៉ាកាលពីពេលថ្មីៗនេះបានប្រកាសដណ្តើមយកទីក្រុងមជ្ឈមណ្ឌលពាណិជ្ជកម្មដ៏សំខាន់មួយនៅក្នុងរដ្ឋ Shan ពោលប៉ុន្មានថ្ងៃប៉ុណ្ណោះ បន្ទាប់ពីចិនធ្វើការសម្របសម្រួលបទឈប់បាញ់បណ្តោះអាសន្ន ។

ការប្រយុទ្ធគ្នាបានផ្ទុះមានឡើងនៅទូទាំងរដ្ឋ Shan ភាគខាងជើងនៃប្រទេសមីយ៉ាន់ម៉ា ចាប់តាំងពីកងទ័ព Arakan (AA), កងទ័ពសម្ព័ន្ធភាពប្រជាធិបតេយ្យជាតិមីយ៉ាន់ម៉ា (MNDAA) និងកងទ័ពរំដោះជាតិ Ta’ang (TNLA) បានព្រួតដៃគ្នាបើកការវាយលុកកាលពីចុងខែតុលា ។

ក្រុមប្រដាប់អាវុធទាំងបី ដែលត្រូវបានគេស្គាល់ថាជា សម្ព័ន្ធបងប្អូន ៣ នាក់ បានប្រកាសដណ្តើមយកទីតាំងយោធា និងមជ្ឈមណ្ឌលសម្រាប់ធ្វើពាណិជ្ជកម្មនៅក្នុងទីក្រុង Namhsan តាមបណ្ដោយព្រំដែនជាមួយប្រទេសចិន បន្ទាប់ពីបើកការវាយប្រហារនៅតំបន់នោះជាង ២ សប្តាហ៍មុន បើទោះទីក្រុងប៉េកាំងសម្របសម្រួលបទឈប់បាញ់រវាងភាគីជម្លោះទាំងពីរក៏ដោយ ។

សរុបមក ចាប់តាំងពីថ្ងៃទី២៧ ខែតុលាមក ក្រុមទ័ពព្រៃទាំងបីនេះដណ្តើមយកមូលដ្ឋានយោធាចំនួន ៤២២ កន្លែង និងទីក្រុងចំនួន ៧ ពីកងទ័ពរដ្ឋាភិបាលយោធាមីយ៉ាន់ម៉ា ក្រោយពេលដែលការប្រយុទ្ធគ្នាបានរាលដាលដល់ភាគខាងកើត និងភាគខាងលិចនៃប្រទេស ខណៈយោងតាមអង្គការសហប្រជាជាតិ (UN) បានឲ្យដឹងថា ប្រជាជនជាងកន្លះលាននាក់ត្រូវបានបង្ខំឲ្យភៀសខ្លួនចេញពីផ្ទះសម្បែងរបស់ពួកគេ ។

គួរបញ្ជាក់ថា យោធាមីយ៉ាន់ម៉ាដែលបានដណ្ដើមអំណាចនៅក្នុងរដ្ឋប្រហារឆ្នាំ ២០២១ កំពុងបាត់បង់ការគ្រប់គ្រងទីក្រុង និងទីស្នាក់ការយោធាជាច្រើននៅជុំវិញប្រទេស ខណៈកាលពីពេលថ្មីៗនេះ សមាជិកជាច្រើននាក់របស់កងកម្លាំងសន្តិសុខមីយ៉ាន់ម៉ា បានទម្លាក់អាវុធសុំចុះចាញ់ ក៏ដូចជាត្រូវបានចាប់ខ្លួនផងដែរក្នុងការប្រយុទ្ធគ្នាតាមតំបន់ព្រំដែនជាមួយក្រុមកងកម្លាំងចម្រុះប្រឆាំងរដ្ឋាភិបាលយោធា ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ មិនខ្វល់ ចិន សម្របសម្រួលបទឈប់បាញ់ មីយ៉ាន់ម៉ា នៅតែផ្ទុះការប្រយុទ្ធគ្នា