មិនខ្វល់ ចិន សម្របសម្រួលបទឈប់បាញ់ មីយ៉ាន់ម៉ា នៅតែផ្ទុះការប្រយុទ្ធ​គ្នា

អង្គការសហប្រជាជាតិ (UN) បាននិយាយថា ការវាយប្រហារតាមអាកាសរវាងកម្លាំងរដ្ឋាភិបាលយោធាមីយ៉ាន់ម៉ា និងក្រុមប្រដាប់អាវុធជនជាតិភាគតិចចំនួន ៣ ក្រុមនៅតែបន្តផ្ទុះមានឡើង បើទោះជាប្រទេសចិនបានខំប្រឹងប្រែងសម្រុះសម្រួលបទឈប់បាញ់ក៏ដោយ ។

ក្រសួងការបរទេសចិនបាននិយាយកាលពីថ្ងៃព្រហស្បតិ៍ថា ភាគីទាំងពីរបានឈានដល់កិច្ចព្រមព្រៀងបទឈប់បាញ់ បន្ទាប់ពីទីក្រុងប៉េកាំងបានជួយសម្របសម្រួលកិច្ចចរចាសន្តិភាព ហើយភាគីជម្លោះទាំងពីរក៏បានឯកភាពគ្នាបន្តកិច្ចចរចារកសន្តិភាពបន្ថែមទៀតផងដែរ ។

ទោះយ៉ាងណា តំណាងរបស់ប្រទេសចិន​មិន​បាន​បង្ហាញ​ព័ត៌មាន​លម្អិត​នៃ​កិច្ចព្រមព្រៀង ក៏ដូចជា​រយៈពេល​ដែល​បទ​ឈប់​បាញ់នេះ​ត្រូវ​បន្ត ឬអស់សុពលភាពនៅពេលណានោះទេ ដោយគ្រាន់តែបញ្ជាក់ថា កិច្ចចរចាមួយផ្សេងទៀតនឹងត្រូវរៀបចំឡើងនៅចុងខែធ្នូនេះ ​។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយនៅក្នុងរបាយការណ៍មួយដែលបានចេញផ្សាយកាលពីថ្ងៃសុក្រថា ការប្រយុទ្ធនៅតែបន្តផ្ទុះឡើងនៅក្នុងផ្នែកខ្លះនៃភាគខាងកើតរដ្ឋ Shan ហើយយ៉ាងហោចណាស់ជនស៊ីវិល ៣៧៨ នាក់បានស្លាប់បាត់បង់ជីវិត និងជាង ៦៦ ម៉ឺននាក់បានផ្លាស់ទីលំនៅ ចាប់តាំងពីចុងខែតុលាមក ។

គួរបញ្ជាក់ថា យោធាមីយ៉ាន់ម៉ាដែលបានដណ្ដើមអំណាចនៅក្នុងរដ្ឋប្រហារឆ្នាំ ២០២១ កំពុងបាត់បង់ការគ្រប់គ្រងទីក្រុង និងទីស្នាក់ការយោធាជាច្រើននៅជុំវិញប្រទេស ខណៈកាលពីពេលថ្មីៗនេះ សមាជិកជាច្រើននាក់របស់កងកម្លាំងសន្តិសុខមីយ៉ាន់ម៉ា បានទម្លាក់អាវុធសុំចុះចាញ់ ក៏ដូចជាត្រូវបានចាប់ខ្លួនផងដែរក្នុងការប្រយុទ្ធគ្នាតាមតំបន់ព្រំដែនជាមួយក្រុមកងកម្លាំងចម្រុះប្រឆាំងរដ្ឋាភិបាលយោធា ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ នាយករដ្ឋមន្ត្រីថៃ សេដ្ឋា ថាវីស៊ីន នឹងឈប់សម្រាកពីការងាររយៈពេល ៤ ថ្ងៃ