អាល្លឺម៉ង់និងដាណឺម៉ាក ចាប់ខ្លួនជនសង្ស័យក្រុម ISIS ១៤នាក់ រៀបផែនការវាយប្រហារភេរវកម្ម

ក្នុងអំឡុងការវាយឆ្មក់រួមគ្នា គ្រឿងផ្ទុះជាច្រើនត្រូវបានរឹបអូសរួមជាមួយនិមិត្តសញ្ញាក្រុម ISIS និងសម្ភារៈឃោសនាក៏ដូចជាច្បាប់ចម្លងនៃគម្ពីគូរ៉ានជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិទ្យុដាណឺម៉ាកបានផ្សាយថា បន្ទាប់ពីការវាយឆ្មក់រួមគ្នាជាបន្តបន្ទាប់នៅក្នុងប្រទេសទាំងពីរ ប៉ូលិសដាណឺម៉ាកនិងអាល្លឺម៉ង់ បានចាប់ខ្លួនជនសង្ស័យមួយក្រុមដែលមានកាន់កាប់គ្រឿងផ្ទុះនិងមានផែនការធ្វើភេរវកម្ម។

មនុស្សសរុបចំនួន១៤នាក់ត្រូវបានចាប់ខ្លួន ដែលក្នុងនោះមាន១៣នាក់ស្ថិតក្នុងតំបន់ Zealand របស់ប្រទេសដាណឺម៉ាក។ បងប្អូនជនជាតិស៊ីរី៣នាក់អាយុ៣៣ឆ្នាំ ៣៦ឆ្នាំនិង៤០ឆ្នាំត្រូវបានជ្រើសរើសជាមេដឹកនាំ។ ពីរនាក់ក្នុងចំណោមពួកគេត្រូវបានចាប់ខ្លួនអំឡុងការវាយឆ្មក់នៅដាណឺម៉ាក រួមជាមួយនឹងសារធាតុគីមីជាច្រើន។ អ្នកទីបីត្រូវបានចាប់ខ្លួននៅរដ្ឋ Hesse របស់អាល្លឺម៉ង់។

យោងតាមប៉ូលិសដាណឺម៉ាក PET បានឲ្យដឹងថា បុគ្គលដែលត្រូវបានចាប់ខ្លួនទាំងនេះបានប្រមូលអាវុធនិងគ្រឿងបន្លាស់ដើម្បីផលិតគ្រឿងផ្ទុះឬជួយក្នុងដំណើរការនេះ។

សារធាតុគីមីទាំងនោះរួមទាំងស្ពាន់ធ័រដែលប៉ូលិសសង្ស័យថាអាចត្រូវបានប្រើដើម្បីបង្កើតគ្រាប់បែកផងដែរនោះ ត្រូវបានរកឃើញនៅទីក្រុង Holbæk នៃប្រទេសដាណឺម៉ាក។

ក្នុងអំឡុងពេលនៃការវាយឆ្មក់ក្នុងផ្ទះមួយនៅទីប្រជុំជន Dessau នៃប្រទេសអាល្លឺម៉ង់ រំសេវចំនួន១០គីឡូក្រាមនិងទង់ដែលតុបតែងដោយនិមិត្តសញ្ញាក្រុម ISIS ត្រូវបានរកឃើញ។ រហូតមកដល់ពេលនេះ គេនៅមិនទាន់ដឹងច្បាស់ទេថាតើអាវុធនោះ មានបំណងវាយប្រហារតែមួយលើកឬច្រើនលើកនោះទេ។

សម្ភារៈឃោសនាទាក់ទងនឹងក្រុ​ម ISIS ដែលពីមុនមានជាប់ទាក់ទងនឹងការវាយប្រហារភេរវកម្មជាច្រើនលើកនៅអឺរ៉ុបរួមទាំងនៅប៉ារីសកាលពីខែវិច្ឆិកាឆ្នាំ២០១៥ដែលមានមនុស្ស១៣០នាក់ត្រូវបានសម្លាប់ត្រូវបានរកឃើញផងដែរ៕

ប្រែសម្រួលដោយ៖ Vann Vann

ប្រភព៖ Sputnik