អ្នកលោតឆ័ត្រយោងជនជាតិ អង់គ្លេស ម្នាក់ ធ្លាក់ពីផ្ទះល្វែង ២៩ ជាន់ស្លាប់នៅ ថៃ

អ្នក​លោត​ឆ័ត្រយោងជនជាតិ​អង់គ្លេសអាយុ​ ៣៣ ឆ្នាំ​ម្នាក់​បាន​ស្លាប់ បន្ទាប់ពីមិនអាចគន្លាស់បើកឆ័ត្រយោង ខណៈពេលគាត់លោតពីលើអគារមួយនៅក្នុងរមណីយដ្ឋានឆ្នេរភាគខាងកើតនៃទីក្រុង Pattaya ប្រទេស​ថៃ ។ នេះបើយោងតាមការចេញផ្សាយរបស់សារពត៌មាន​ BBC កាលពីថ្ងៃទី២៩​ ខែមករាកន្លងទៅ ។

ភ្លាមៗនោះ ប៉ូលិសថៃត្រូវបានគេខលហៅឲ្យទៅកាន់ប្លុកផ្ទះល្វែងកម្ពស់ ២៩ ជាន់កាលពីល្ងាចថ្ងៃសៅរ៍ បន្ទាប់ពីសាក្សីនៅកន្លែងកើតហេតុបានឃើញមនុស្សម្នាក់ធ្លាក់ពីលើដើមឈើដួលទៅលើដី ។

ប៉ូលីសបានរកឃើញឆ័ត្រយោងពណ៌ខៀវ ដែលមិនទាន់គន្លាស់បើកនៅលើបុរសនោះ ខណៈបុគ្គលិក​នៅ​អគារ​បាន​និយាយ​ថា បុរស​នោះ​បាន​ឡើង​ទៅ​ជាន់​លើ​ជាមួយ​មិត្តភ័ក្តិ ​ហើយពួកគេក៏បានថត​រូប​គាត់ពេលកំពុង​លោត​ចុះ​ក្រោមផងដែរ ។ បើយោងតាមទំព័រ​បណ្ដាញ​សង្គម​របស់​ជន​រង​គ្រោះ​បង្ហាញ​ថា ​គាត់​ជា​អ្នក​លោត​ឆ័ត្រយោង​ដែល​មាន​បទពិសោធន៍ ។

គួរបញ្ជាក់ថា ការលោតឆ័ត្រយោង ឬការលោតតោងពីកន្លែងខ្ពស់ៗ បានក្លាយជាការពេញនិយមកាន់តែខ្លាំងឡើងក្នុងចំណោមជនបរទេសដែលរស់នៅក្នុងប្រទេសអាស៊ីអាគ្នេយ៍មួយនេះ ខណៈអ្នកខ្លះថែមទាំងរកប្រាក់ចំណូលបានពីចំនួនអ្នកតាមដានប្រព័ន្ធផ្សព្វផ្សាយសង្គមដែលមើលវីដេអូរបស់ពួកគេផងដែរ ។ ទោះជាយ៉ាងណាក៏ដោយ ត្រឹមតែប៉ុន្មានវិនាទីវាក៏ជាសកម្មភាពដ៏គ្រោះថ្នាក់មួយផងដែរ ដោយសារតែការមានកំហុសតិចតួច ៕

អត្ថបទ ៖ ប៊ុន​ សុភាព