បាញ់ប្រហារអំឡុងក្បួនដង្ហែ Super Bowl នៅអាមេរិក ស្លាប់និងរបួសមនុស្សច្រើននាក់

តាមសេចក្តីរាយការណ៍របស់ Fox News, បុរសប្រដាប់អាវុធ៣នាក់ ត្រូវបានចាប់ខ្លួនក្រោយពេល បើកការបាញ់ប្រហារអំឡុងក្បួនដង្ហែជ័យជម្នះ Super Bowl របស់ក្លិប Kansas City Chiefs ក្នុងទីក្រុង Kansas ដោយសម្លាប់មនុស្សម្នាក់ និងរបួស២២នាក់ផ្សេងទៀត កាលពីថ្ងៃពុធទី១៤ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមមន្ត្រីបានឲ្យដឹងថា ក្នុងចំណោមជនរងគ្រោះទាំងអស់ មាន៣នាក់ស្ថិតក្នុងស្ថានភាពធ្ងន់ធ្ងរ ហើយ៥នាក់អាចឈានដល់បាត់បង់ជីវិត។

មិនមានការបញ្ចេញឲ្យដឹងឈ្មោះជនសង្ស័យឡើយ ​គិត​ត្រឹម​រសៀល​ថ្ងៃ​ពុធ ហើយ​​សមត្ថកិច្ច​ក៏មិនបង្ហាញ​ពី​មូលហេតុនៃការវាយប្រហារដែរ ប៉ុន្តែបានបញ្ជាក់ច្បាស់ៗថា ឧក្រិដ្ឋកម្ម​នេះ​មិន​ ​ពាក់ព័ន្ធ​នឹង​អំពើ​ភេរវកម្ម​ឡើយ។

FBI ក៏មានវត្តមាននៅឯក្បួនដង្ហែនោះដែរ ហើយបានផ្តល់ជំនួយដល់នាយកដ្ឋានប៉ូលិសទីក្រុង Kansas ទៀតផង។

សាក្សីឈ្មោះ Kade Collins ដែលចូលរួមក្នុងក្បួនដង្ហែជាមួយឪពុករបស់គាត់ បានប្រាប់ Fox News ថា “យើងឮស្នូរកាំភ្លើងពី១០ទៅ១២គ្រាប់ ប៉ុន្តែយើងគិតថាវាជាកាំជ្រួច ដូច្នេះដំបូង ឡើយ យើងមិនភ័យទេ ប៉ុន្តែបន្ទាប់មក មនុស្សគ្រប់គ្នាចាប់ផ្តើមស្រែក ហើយក៏រត់ចេញ។ ពេលរៀងស្បើយមនុស្ស ខ្ញុំក៏មើលឃើញមនុស្សបីនាក់ រងរបួសគ្រាប់កាំភ្លើងដេកនៅលើដី ពោរពេញដោយឈាម”។

បច្ចុប្បន្ន ប៉ូលិសចាប់ផ្តើមការស៊ើបអង្កេត និងធ្វើការលើហេតុការណ៍នេះហើយ។

សូមបញ្ជាក់ថា តាមការប៉ាន់ស្មាន មនុស្សមួយលាននាក់ទំនងចូលរួមក្នុងក្បួនដង្ហែជ័យជម្នះនេះ ដើម្បីអបអរការឈ្នះពានរង្វាន់ Super Bowl លើកទីពីររបស់ក្រុម Chiefs ក្នុងរយៈពេលពីរឆ្នាំ។ មន្ត្រីអនុវត្តច្បាប់ប្រហែល៦០០នាក់មកពី ៣៤ភ្នាក់ងារក្នុងស្រុក រដ្ឋ និងសហព័ន្ធ ត្រូវបានចាត់តាំងឲ្យឈរជើងការពារក្នុងព្រឹត្តិការណ៍នេះ៕

អត្ថបទ៖ សុខ សុវណ្ណ

ចុចអាន៖ ខ្មាន់កាំភ្លើងបាញ់ប្រហារក្នុងមន្ទីរពេទ្យនៅអាមេរិក បណ្តាលឲ្យមានជនរងគ្រោះច្រើននាក់