មកដឹងចំនួនពលករ ថៃ ត្រៀមចំណាកស្រុកទៅធ្វើការនៅ កូរ៉េខាងត្បូង ឆ្នាំនេះ

ដើម្បីជួយបង្កើន ក៏ដូចជាជំរុញទៅដល់ទីផ្សារសេដ្ឋកិច្ចជាតិ ប្រទេសថៃក្នុងឆ្នាំ ២០២៤ នេះបានដាក់ទិញដៅបញ្ជូនពលករប្រមាណ ៥,៥០០ នាក់ឲ្យចំណាកស្រុកទៅធ្វើការនៅប្រទេសកូរ៉េខាងត្បូង ។ នេះបើយោងតាមការចេញផ្សាយដោយសារព័ត៌មាន The Nation Thailand កាលពីថ្ងៃទី១៩ ខែមីនាកន្លងទៅ ។

រដ្ឋមន្ត្រីក្រសួងការងារថៃលោក Phiphat Ratchakitprakarn បាននិយាយថា បន្ទាប់ពីការចរចាដោយជោគជ័យរវាងអាជ្ញាធរការងារនៃប្រទេសទាំងពីរ, កូរ៉េខាងត្បូងបានសម្រេចយល់ព្រមផ្តល់ការងារចំនួន ៥,៥០០ បន្ថែមទៀតសម្រាប់ជនជាតិថៃក្នុងកូតារបស់ខ្លួនសម្រាប់ពលករបរទេស ពោលគឺកើនឡើង ១៥ ភាគរយ បើប្រៀបធៀបនឹងឆ្នាំមុន ។

ចំណែកពាក់ព័ន្ធនឹងឫសគល់ដែលឈានទៅដល់សេចក្ដីសម្រេចនាំពលករថៃឲ្យចំណាកស្រុកទៅធ្វើការនៅកូរ៉េខាងត្បូង, លោករដ្ឋមន្ត្រីបញ្ជាក់ថា គឺដោយសារតែបច្ចុប្បន្នប្រទេសដែលជាខ្លាសេដ្ឋកិច្ចលំដាប់ទី ៤ នៅអាស៊ីមួយនេះកំពុងមានតម្រូវការ​ខ្ពស់​លើ​កម្លាំង​ពលកម្ម​ជំនាញ​ទាប ជា​ពិសេស​ក្នុង​ឧស្សាហកម្ម​ខ្នាត​តូច និង​មធ្យម ព្រម​ទាំងក្នុង​វិស័យ​កសិកម្ម ​សេវាកម្ម និងទេសចរណ៍ផងដែរ ជាពិសេសនៅក្នុងសណ្ឋាគារ រមណីយដ្ឋាន និងភោជនីយដ្ឋានរបស់កូរ៉េខាងត្បូង ។

ទាក់ទិននឹងការបញ្ជូនពលករឲ្យចំណាកស្រុកទៅធ្វើការក្រៅប្រទេសនេះទៀតសោត មិនមែនត្រឹមតែជាការបង្កើតការងារ និងជួយរកប្រាក់ចំណូលទៅដល់កម្មករ ក៏ដូចជាកាត់បន្ថយភាពក្រីក្រដល់ពលរដ្ឋថៃប៉ុណ្ណោះទេ ប៉ុន្តែនេះថែមទាំងជាផ្លូវបណ្តុះបណ្តាល និងអភិវឌ្ឍធនធានមនុស្សសម្រាប់ប្រទេសនាពេលអនាគតផងដែរ ។

គួរបញ្ជាក់ថា មានពលករថៃប្រមាណ ២០,០០០ នាក់ធ្វើចំណាកស្រុកទៅធ្វើការស្របច្បាប់នៅកូរ៉េខាងត្បូងដែលជាប្រទេសខ្លាសេដ្ឋកិច្ចមួយនៅអាស៊ី និងជាប្រទេសផ្ដល់ប្រាក់ខែដល់កម្មករច្រើនជាងប្រទេសថៃចំនួន ៥ ដង ខណៈក្រសួងការងារមានមុខព្រួញបញ្ជូនពលករថៃ ១០ ម៉ឺននាក់ឲ្យធ្វើចំណាក់ស្រុកទៅធ្វើការនៅបរទេសនាឆ្នាំ ២០២៤ នេះ ៕

ដោយ ៖ សុខ ជីវ័ន្ត

ចុចអាន ៖ ពលករខ្មែរ និងប្រទេសអាស៊ាន ២ ទៀតអាចរួចមិនបង់លុយ ពេលត្រឡប់ទៅធ្វើការនៅ ថៃ ក្រោយចប់ចូលឆ្នាំ