Connect with us

ព័ត៌មានអន្ដរជាតិ

យោធា មីយ៉ាន់ម៉ា ផ្ទេរលោកស្រី អ៊ុងសាន ស៊ូជី ចេញពីពន្ធនាគារយកទៅឃុំ​ខ្លួននៅក្នុងផ្ទះ

បានផុស

នៅ

អ្នកនាំពាក្យរដ្ឋាភិបាលយោធាមីយ៉ាន់ម៉ាបានប្រាប់ប្រព័ន្ធផ្សព្វផ្សាយថា អតីតមេដឹកនាំលោកស្រី អ៊ុងសាន ស៊ូជី ដែលត្រូវបណ្ដេញចេញពីអំណាចក្នុងរដ្ឋប្រហារយោធាឆ្នាំ ២០២១ បានផ្ទេរចេញពីពន្ធនាគារទៅដាក់ការឃុំខ្លួននៅក្នុងផ្ទះរបស់លោកស្រីវិញ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters កាលពីថ្ងៃទី១៦ ខែមេសាកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ Zaw Min Tun បានលើកឡើងថា “ចាប់តាំងពីអាកាសធាតុក្តៅខ្លាំងមក គោលការណ៍នេះមិនមែនធ្វើឡើងតែសម្រាប់លោកស្រី អ៊ុងសាន ស៊ូជី ប៉ុណ្ណោះទេ គឺសម្រាប់ទណ្ឌិតទាំងអស់ ជាពិសេសអ្នកទោសវ័យចំណាស់ ដើម្បីការពារពួកគេពីជំងឺដាច់សរសៃឈាមខួរក្បាល” ។

លោកស្រី អ៊ុងសាន ស៊ូជី វ័យ ៧៨ឆ្នាំ ត្រូវបានយោធាមីយ៉ាន់ម៉ាចាប់ឃុំខ្លួន ចាប់តាំងពីរដ្ឋាភិបាលរបស់លោកស្រីត្រូវបានផ្តួលរំលំក្នុងរដ្ឋប្រហារឆ្នាំ ២០២១ ហើយលោកស្រីប្រឈមមុខនឹងការជាប់ពន្ធនាគាររយៈពេល ២៧ ឆ្នាំពីបទឧក្រិដ្ឋកម្មរាប់ចាប់ពីការក្បត់ជាតិ និងស៊ីសំណូក រហូតដល់ការរំលោភច្បាប់ទូរគមនាគមន៍ ប៉ុន្តែលោកស្រីបានបដិសេធរាល់ការចោទប្រកាន់ទាំងអស់នោះ ។

ស្របពេលជាមួយគ្នានេះ អ្នកនាំពាក្យរបស់រដ្ឋាភិបាលស្រមោលលោក Kyaw Zaw ក៏បានចេញការអំពាវនាវឲ្យមានការដោះលែងលោកស្រី អ៊ុងសាន ស៊ូជី និងលោក U Win Myint អតីតប្រធានាធិបតីដែលត្រូវបានបណ្តេញចេញពីអំណាច ដែលក៏ត្រូវបានផ្ទេរទៅឃុំឃាំងនៅក្នុងផ្ទះផងដែរ ។

លោក Kyaw Zaw បានប្រាប់អ្នកសារព័ត៌មានថា “ការផ្ទេរអ្នកទាំងពីរចេញពីពន្ធនាគារទៅដាក់ការឃុំខ្លួននៅក្នុងផ្ទះគឺជារឿងល្អ ព្រោះផ្ទះប្រសើរជាងពន្ធនាគារ ។ ទោះយ៉ាងណាក៏ដោយ អ្នកទាំងពីរគួរតែត្រូវបានដោះលែងដោយគ្មានលក្ខខណ្ឌ ហើយរដ្ឋាភិបាលយោធាត្រូវតែទទួលខុសត្រូវទាំងស្រុងចំពោះសុខភាព និងសុខសុវត្ថិភាពរបស់លោកស្រី អ៊ុងសាន ស៊ូជី និងលោក U Win Myint” ។

គួរបញ្ជាក់ថា មីយ៉ាន់ម៉ាធ្លាក់ក្នុងភាពចលាចល ចាប់តាំងពីយោធាបានធ្វើរដ្ឋប្រហារដណ្ដើមអំណាចពីរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីខែកុម្ភៈ ឆ្នាំ២០២១ មកម្ល៉េះ ដោយប្រែក្លាយប្រទេសប្រកាន់លទ្ធិប្រជាធិបតេយ្យអស់រយៈពេលមួយទសវត្សរ៍មួយនេះ ទៅជាការគ្រប់គ្រងដោយរបបយោធា ហើយថែមទាំងប្រើកម្លាំងបង្រ្កាបលើប្រជាជនស្លូតត្រង់ឲ្យស្លាប់បាត់បង់ជីវិតប្រមាណ ៣,២០០ នាក់ផងដែរ ៕

ដោយ ៖ សុខ ជីវ័ន្ត

ចុចអាន ៖ តើប្រទេស អាស៊ាន ណាខ្លះរៀបចំពិធីបុណ្យចូលឆ្នាំថ្មីក្នុងខែមេសាដូច កម្ពុជា ដែរ?

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម