ព័ត៌មានអន្ដរជាតិ

តៃវ៉ាន់៖ ចិនដាក់យន្តហោះ២៦គ្រឿង នាវា៥គ្រឿងក្បែរៗដែនកោះរបស់ខ្លួន

បានផុស

២ years មុន

នៅ

ថ្ងៃសុក្រ ៣ ឧសភា ២០២៤

ដោយ

Chheang

ក្រសួងការពារជាតិតៃវ៉ាន់ បាននិយាយនៅថ្ងៃទី៣ ខែឧសភា នេះថា ខ្លួនបានអង្កេតរកឃើញយន្តហោះចិនចំនួន ២៦គ្រឿង ព្រមទាំងនាវាចម្បាំង ៥គ្រឿង នៅកៀកក្បែរដែនអធិបតេយ្យភាពរបស់ខ្លួន ក្នុងរយៈពេល២៤ម៉ោងចុងក្រោយ។ ការសង្កេតឃើញនេះ ធ្វើឡើងមុនការឡើងកាន់តំណែងប្រធានាធិបតីតៃវ៉ាន់ថ្មីគឺលោក Lai Ching-te នៅប៉ុន្មានសប្ដាហ៍ខាងមុខទៀត។

ចិនបានចាត់ទុកលោក Lai Ching-te គឺជាអ្នកប្រកាន់ភាពផ្ដាច់ខ្លួនប្រឆាំងចិនដ៏មានគ្រោះថ្នាក់មួយរូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីថ្លែងការណ៍របស់ក្រសួងការពារជាតិតៃវ៉ាន់ បានបញ្ជាក់ថា ក្នុងចំណោមការអង្កេតឃើញខាងលើ មានយន្តហោះចិនចំនួន ១៧គ្រឿង បានលួចឆ្លងចូលបន្ទាត់ព្រំដែន ហើយបានហោះទៅតំបន់ភាគខាងជើងតៃវ៉ាន់ និងតំបន់កំណត់អត្តសញ្ញាណការពារដែនអាកាស Adiz។

តៃវ៉ាន់ បានចាត់ទុកបន្ទាត់ព្រំដែនសមុទ្រចម្ងាយ១៨០គីឡូម៉ែត្រនេះគឺជាការបែងចែកទឹកដីរវាងតៃវ៉ាន់ និងចិន។ យ៉ាងណាមិញ មហាយក្សចិនមិនដែលទទួលស្គាល់បន្ទាត់ព្រំដែននេះទេ ហើយអះអាងថា តៃវ៉ាន់គឺជាផ្នែកមួយនៃទឹកដីរបស់ខ្លួន និងត្រូវប្រើកងកម្លាំងដើម្បីយកតៃវ៉ាន់ឲ្យមកនៅក្រោមការគ្រប់គ្រង់របស់ចិនវិញទាល់តែបាន។

សូមបញ្ជាក់ថា ក្រោមរដ្ឋបាលគ្រប់គ្រងដោយលោកស្រី Tsai Ing-wen នៅតៃវ៉ាន់ ភាពតានតឹងជាមួយចិនហាក់មិនថមថយសោះទេ ខណៈដែលលោកស្រី និងរដ្ឋាភិបាលលោកស្រីតែងតែបដិសេធនឹងការអះអាងរបស់ចិន ដែលចង់បានតៃវ៉ាន់ទៅគ្រប់គ្រង។ ក្រោយចប់អាណត្តិលោកស្រី Tsai Ing-wen, លោក Lai Ching-te ដែលជាអនុប្រធានាធិបតី នឹងឡើងកាន់តំណែងបន្តជាផ្លូវការនាថ្ងៃទី២០ ខែឧសភាខាងមុខ បន្ទាប់ពីឈ្នះការបោះឆ្នោតជាតិកាលពីខែមករាកន្លងទៅ បើទោះជាមានការគំរាមពីចិនថា លោក Lai Ching-te អាចនឹងក្លាយជាអ្នកនាំភ្លើងសង្គ្រាមចូលទៅក្នុងតៃវ៉ាន់៕

ដោយ៖ ឈាង

Related Topics:កោះតៃវ៉ាន់