កូរ៉េ​ខាង​ត្បូង ជះ​លុយ​២​ពាន់​លានដុល្លារ យក​អភិវឌ្ឍ​ខែល​ការពារ​ថ្មី

រដ្ឋាភិបាល​​ក្រុង​សេអ៊ូល បាន​​យក​ព្រម​លើ​គម្រោង​ទំនើប​កម្ម​​ប្រព័ន្ធ​​ខែ​ល​ការពារ​មីស៊ីល​ថ្មី​ ដែល​​នឹង​​ចំណាយ​ថវិកា​អស់​ប្រមាណ ២​ពាន់​លាន​ដុល្លារ ក្នុង​គោល​បំណង​បង្កើន​សមត្ថភាព​ការពារ​ដែន​អាកាស​ប្រឆាំង​នឹង​ការ​គំរាម​កំហែង​ពី​​កូរ៉េ​ខាង​ជើង។

គម្រោង​នេះ នឹង​​អភិវឌ្ឍ​​ប្រព័ន្ធ​ខែល​ការពារ​​មធ្យម ​ពី​ប្រភេទ M-SAM ​​Block-2 នា​ពេល​បច្ចុប្បន្ន​ឲ្យ​​ទៅ​ជា​ប្រភេទ M-SAM Block-3 ដែល​មាន​សមត្ថភាព​ស្ទាក់​ចាប់​​មីស៊ីល​នៅ​ចម្ងាយ​​១០០​​គីឡូ​ម៉ែត្រ ឬ​​ឆ្ងាយ​ជាង​នេះ ខណៈ​ដែល​ខែល​ការពារ​ឥលូវ​នេះ​មាន​សមត្ថភាព​ស្ទាក់​ចាប់​មីស៊ីល​ត្រឹម​​ចម្ងាយ​៦០​គីឡូម៉ែត្រ​ប៉ុណ្ណោះ។ រដ្ឋបាល​​​ទទួល​បន្ទុក​កម្មវិធី​ការពារ​ជាតិ​កូរ៉េ​ខាង​ត្បូង (DAPA) បាន​ប្រាប់​ថា ខែល​ការពារ Block-3 នឹង​ការពារ​ប្រឆាំង​ការ​វាយ​ប្រហារ​​​មីស៊ីល​ក្នុង​ពេល​ដំណាល​គ្នា​បាន​ល្អ​ ហើយ​មាន​សមត្ថភាព​​​​ខ្លាំង​ជាង​ខែល​ការពារ​បច្ចុប្បន្ន​ដល់​ទៅ​៤​ដង។

​​DAPA បាន​បន្ត​ថា ការ​អភិវឌ្ឍ​ថ្មី​នេះ នឹង​បង្ហាញ​ពី​​ការ​រីក​ចម្រើន​​គួរ​ឲ្យ​កត់​សម្គាល់​នៅ​ក្នុង​វិស័យ​ការពារ​ជាតិ​កូរ៉េ​ខាង​ត្បូង ហើយ​​ជា​ពិសេស​គឺ​សម្រាប់​ទប់ស្កាត់​​ការគំរាមកំហែង​​​​ពី​ការ​វាយ​ប្រហារ​​របស់​​​ប្រទេស​​ជិត​ខាង​​​​យ៉ាង​មាន​ប្រសិទ្ធភាព​ខ្ពស់។

សូម​បញ្ជាក់​ថា កាល​ពី​ចុង​ឆ្នាំ​២០២៣​កន្លង​ទៅ ក្រសួង​ការពារ​ជាតិ​កូរ៉េ​ខាង​ត្បូង បាន​​អនុម័ត​គម្រោង​ចំណាយ​ថវិកា​​ជាង ២៦២​ពាន់​លាន​​ដុល្លារ សម្រាប់​​វិស័យ​ការពារ​ជាតិ​របស់​​រដ្ឋាភិបាល​ក្រុង​សេអ៊ូល នា​រយៈពេល​៥​ឆ្នាំ​ខាង​មុខ ដោយ​ក្នុង​នោះ​សម្រាប់​ឆ្នាំ​២០២៤ មាន​ចំនួន​ប្រមាណ ៤៥,៧​ពាន់​លាន​ដុល្លារ៕

ដោយ៖ ឈាង