អ្នកស្លាប់កើន​ឡើង​ដល់​៦៨​នាក់នៅស៊ូដង់​ដោយសារទឹកជំនន់ខ្លាំង​

មនុស្សសរុបចំនួន៦៨នាក់បានស្លាប់ ដោយសារភ្លៀងធ្លាក់​ជាប់​គ្នា​មិនដាច់​និងទឹកជំនន់ខ្លាំង​ដែលបានវាយប្រហារផ្នែកជាច្រើននៃប្រទេសស៊ូដង់ចាប់តាំងពីខែមិថុនា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១៣ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងមហាផ្ទៃស៊ូដង់ បានឲ្យដឹងថា៖​«ចំនួនអ្នកស្លាប់ដោយសារទឹកជំនន់ និងភ្លៀងបានកើនឡើងដល់៦៨នាក់ក្នុងហេតុផលផ្សេងៗ រួមទាំងការបាក់រលំផ្ទះ និងការលង់ទឹក ខណៈដែលមនុស្ស១៣០នាក់បានរងរបួស»។

ជាមួយគ្នានេះ ផ្ទះជាង៤០០០ខ្នងបានបាក់រលំទាំងស្រុង ផ្ទះចំនួន ៨០០០បានបាក់រលំដោយផ្នែក អគារសាធារណៈ និងឯកជនចំនួន ៤០ ត្រូវបានខូចខាត ហើយផ្ទៃដីកសិកម្មប្រហែល ៨៣២ គីឡូម៉ែត្រការ៉េត្រូវបានខូចខាត ខណៈដែលសត្វមួយចំនួនបានងាប់។

គួរបញ្ជាក់ថា ទឹកជំនន់ដែលកើតឡើងជារៀងរាល់ឆ្នាំនៅក្នុងប្រទេសស៊ូដង់ ជាធម្មតាកើតឡើងនៅចន្លោះខែមិថុនាដល់ខែតុលា។ ក្នុងរយៈពេលបីឆ្នាំមកនេះ ភ្លៀងធ្លាក់ខ្លាំងបានឆក់យកជីវិតមនុស្សរាប់រយនាក់ និងបំផ្លាញផ្ទៃដីកសិកម្មយ៉ាងច្រើនសន្ធឹកសន្ធាប់។

សូមរំឭកថា ប្រទេសស៊ូដង់បាននិងកំពុងជួបប្រទះជម្លោះដ៏សាហាវរវាង​​ក្រុម​ប្រដាប់អាវុធ​ កម្លាំងប្រដាប់​អាវុធស៊ូដង់​ (SAF) និង និង​ក្រុម​តស៊ូ​ប្រដា់ប​អាវុធ (RSF) ចាប់តាំងពីថ្ងៃទី១៥ខែមេសាឆ្នាំ ២០២៣ ដែលបណ្តាលឱ្យមានការបាត់បង់ជីវិតយ៉ាងហោចណាស់ ១៦៦៥០។ យោងតាមទិន្នន័យរបស់អង្គការសហប្រជាជាតិដែលបានចេញផ្សាយបានឱ្យដឹងថាមនុស្សប្រមាណ ១០,៧លាននាក់ត្រូវបានផ្លាស់ទីលំនៅក្នុងស្រុកនៅក្នុងប្រទេសស៊ូដង់ ដោយមានប្រហែល ២,២លាននាក់ផ្សេងទៀតកំពុងស្វែងរកការជ្រកកោននៅក្នុងប្រទេសជិតខាង៕

អត្ថបទ៖ ប៊ុន សុភាព