WHO៖ អ្នករបួសជាង២២៥០០នាក់នៅហ្គាហ្សាប្រឈមការផ្លាស់ប្តូរជីវិត​

អង្គការសុខភាពពិភពលោក (WHO) បានរាយការណ៍ថា យ៉ាងហោចណាស់មនុស្ស២២៥០០នាក់ឬមួយភាគបួននៃអ្នករងរបួសនៅក្នុងជម្លោះនៅតំបន់ហ្គាហ្សា គិតត្រឹមថ្ងៃទី២៣ខែកក្កដា កំពុងទទួលរងនូវរបួសដែលផ្លាស់ប្តូរអាយុជីវិត និងត្រូវការការស្តារនីតិសម្បទារយៈពេលវែង។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Xinhua នៅថ្ងៃទី១៣ខែកញ្ញានេះ។

របាយការណ៍នេះបានគូសបញ្ជាក់ពីបន្ទុកដ៏ធំធេងលើប្រព័ន្ធថែទាំសុខភាពដែលពិការរួចហើយរបស់ហ្គាហ្សា ខណៈការរងរបួសអវយវៈធ្ងន់ធ្ងរគឺជាមូលហេតុនាំមុខគេនៃតម្រូវការស្តារនីតិសម្បទា។ ការរងរបួសអវយវៈទាំងនេះត្រូវបានប៉ាន់ប្រមាណថា ប៉ះពាល់ដល់មនុស្សពី១៣៤៥៥ ទៅ ១៧៥៥០នាក់។

ការរងរបួសទាំងនេះភាគច្រើនទាក់ទងនឹងការដាច់អវយវៈដែលមានប្រហែល ៤០០០​ករណី និងការកើនឡើងយ៉ាងខ្លាំងនៅក្នុងករណីរងរបួសឆ្អឹងខ្នង របួសខួរក្បាល និងការរលាកធ្ងន់ធ្ងរ ដែលភាគច្រើនជាស្ត្រី និងកុមារ។

បើយោងតាមតំណាងអង្គការសុខភាពពិភពលោកក្នុងទឹកដីប៉ាឡេស្ទីនបានព្រមានថាសេវាសុខភាពរបស់ហ្គាហ្សាមិនអាចបំពេញតាមតម្រូវការដែលកំពុងកើនឡើងនោះទេ ខណៈមានការកើនឡើងយ៉ាងខ្លាំងនៃតម្រូវការស្តារនីតិសម្បទាដែលកើតឡើងស្របគ្នាជាមួយនឹងការថយចុះនៃប្រព័ន្ធសុខភាព និងកង្វះខាតដ៏សំខាន់នៃសេវាស្តារនីតិសម្បទា និងការថែទាំឯកទេសសម្រាប់របួសធ្ងន់ធ្ងរ។

ទីភ្នាក់ងារសុខភាពដែលមានមូលដ្ឋាននៅទីក្រុងហ្សឺណែវបាននិយាយថាដែរ នៅពេលដែលជម្លោះនៅតែបន្ត ការធានាឱ្យមានលទ្ធភាពទទួលបានការថែទាំសុខភាពសំខាន់ៗ រួមទាំងសេវាស្តារនីតិសម្បទា នៅតែមានសារៈសំខាន់និងចាំបាច់ក្នុងការការពារជំងឺ និងការស្លាប់បន្ថែមទៀត

គួរបញ្ជាក់ថាជម្លោះនៅក្នុងតំបន់ហ្គាហ្សារវាងអ៊ីស្រាអែលនិងក្រុមហាម៉ាសនៅតែបន្តអូសបន្លាយ ខណៈការវាយប្រហារបានធ្វើឲ្យមនុស្សជាច្រើនស្លាប់ របួស និងជម្លៀសប្រជាជនរាប់ម៉ឺននាក់ពីមួយកន្លែងទៅមួយកន្លែងម្ដងហើយម្ដងទៀត៕

អត្ថបទ៖ ប៊ុន សុភាព