ព័ត៌មានអន្ដរជាតិ

អ៊ុយក្រែន កំពុងរៀបចំចំណងការទូតឡើងវិញជាមួយស៊ីរី

បានផុស

១ year មុន

នៅ

ថ្ងៃសុក្រ ៣ មករា ២០២៥

ដោយ

Chheang

ប្រធានាធិបតីអ៊ុយក្រែន លោក Volodymyr Zelensky កាលពីថ្ងៃព្រហស្បតិ៍ទី២ខែមករាឆ្នាំ២០២៥បាននិយាយថា ប្រទេសរបស់លោកកំពុងរៀបចំទំនាក់ទំនងការទូត និងកិច្ចសហប្រតិបត្តិការសាជាថ្មីម្ដងទៀតជាមួយប្រទេសស៊ីរី ខណៈដែលអ្នកការទូតកំពូលរបស់ខ្លួនបានធ្វើទស្សនកិច្ចនៅរដ្ឋធានីដាម៉ាសកាលពីចុងខែមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី៣០ធ្នូ គណៈប្រតិភូជាន់ខ្ពស់អ៊ុយក្រែនដឹកនាំដោយរដ្ឋមន្ត្រីការបរទេស លោក Andrii Sybiha បានទៅបំពេញទស្សនកិច្ចនៅទីក្រុងដាម៉ាស ជាកន្លែងដែលលោកបានជួបពិភាក្សាជាមួយលោក Ahmed al-Sharaa មេដឹកនាំរដ្ឋបាលថ្មីរបស់ស៊ីរី។

លោក Zelensky បានរៀបរាប់ថា៖ «នៅឆ្នាំនេះ យើងអាចបន្ថែមប្រទេសជាច្រើនទៀតជាដៃគូដែលអាចទុកចិត្តបានរបស់យើង ជាពិសេសស៊ីរី។ យើងកំពុងរៀបចំ ដើម្បីបន្តទំនាក់ទំនងការទូតរបស់យើងជាមួយស៊ីរី និងកិច្ចសហប្រតិបត្តិការរបស់យើងនៅក្នុងអង្គការអន្តរជាតិ»។

លើសពីនេះទៀត លោក Zelensky បានសង្កត់ធ្ងន់ថា អ៊ុយក្រែននឹងគាំទ្ររាល់កិច្ចខិតខំប្រឹងប្រែងដើម្បីធ្វើឲ្យស៊ីរីមានស្ថិរភាព។

មេដឹកនាំអ៊ុយក្រែន បាននិយាយថា៖ «យើងនឹងបង្កើតកម្មវិធី “គ្រាប់ធញ្ញជាតិពីអ៊ុយក្រែន” ដើម្បីសហការជាមួយរដ្ឋបាលស៊ីរី និងដៃគូដែលចាប់អារម្មណ៍ទាំងអស់។ យើងនឹងចូលរួមជាមួយអឺរ៉ុប និងអាមេរិក ដើម្បីធានាបាននូវការគាំទ្រអតិបរមា។ ស្ថិរភាពបន្ថែមទៀតនៅមជ្ឈិមបូព៌ាមានន័យថាសន្តិភាព និងពាណិជ្ជកម្មកាន់តែច្រើនសម្រាប់ដៃគូទាំងអស់»។

សូមបញ្ជាក់ថា ទីក្រុងកៀវ បានផ្តាច់ទំនាក់ទំនងរបស់ខ្លួនជាមួយទីក្រុងដាម៉ាស ក្នុងឆ្នាំ២០២២ នៅពេលដែលរដ្ឋាភិបាលពីមុនដែលដឹកនាំដោយលោក Bashar al-Assad បានទទួលស្គាល់ «ឯករាជ្យភាព» នៃតំបន់ Donetsk និង Luhansk របស់អ៊ុយក្រែន ដែលរុស្ស៊ីកំពុងកាន់កាប់៕

ដោយ៖ ឈាង

ចុចអាន៖ កងទ័ពស៊ីរីប្រកាសថា រជ្ជកាលរបស់លោក Assad បានបញ្ចប់ហើយ