ចិន កំពុងធ្វើការជាមួយ WHO តាមដានការឆ្លងជំងឺផ្លូវដង្ហើម ស្រដៀងកូវីដ-១៩

ប្រទេសចិនបានប្រកាសថា ខ្លួនកំពុងធ្វើការជាមួយអង្គការសុខភាពពិភពលោក (WHO) ដើម្បីតាមដានការឆ្លងរាលដាលនៃជំងឺផ្លូវដង្ហើម HMPV យ៉ាងយកចិត្តទុកដាក់ជាទីបំផុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសចិន លោក Guo Jiakun និយាយថា រដ្ឋាភិបាលទីក្រុងប៉េកាំង គិតគូរខ្លាំងណាស់ចំពោះសុខភាពប្រជាជនរបស់ខ្លួននិងជនបរទេស នៅក្នុងប្រទេសចិន ប៉ុន្តែ HMPV មិនមែនជាជំងឺថ្មីឡើយ វាឆ្លងដល់មនុស្សជាង៦០ឆ្នាំមកហើយ។

ទោះបីជាយ៉ាងណាក៏ដោយ មជ្ឈមណ្ឌលគ្រប់គ្រងនិងបង្ការជំងឺចិន (CDC)  នៅក្នុងរបាយការណ៍ចុងក្រោយរបស់ខ្លួន បានទទួលស្គាល់ថា ករណីឆ្លងជំងឺ HMPV នាពេលបច្ចុប្បន្ននេះ ពិតជាមានកម្រិតខ្ពស់មែន។

សូមបញ្ជាក់ថា HMPV គឺជាជំងឺស្រដៀងកូវីដ-១៩ ដោយចេញអាការដូចគ្នាបេះបិទ ដូចជាក្អក ក្តៅខ្លួន តឹងច្រមុះ ដង្ហក់និងឈឺសាច់ដុំ ជាដើម។

ត្បិតតែវាមិនមានអត្រាមរណភាពខ្ពស់ ប៉ុន្តែបើឆ្លងហើយ ផ្លូវដង្ហើមរបស់អ្នកជំងឺក៏រងផលប៉ះពាល់ខ្លាំងគួរសមដែរ ជាពិសេសអាចឈានដល់រលាកទងសួត ទៀតផង។

ចំពោះការឆ្លងវិញ HMPV ក៏ស្រដៀងកូវីដ១៩ដែរ ដោយវាឆ្លងតាមរយៈដំណក់ទឹក ការប៉ះដោយផ្ទាល់ឬដោយប្រយោលជាមួយអ្នកជំងឺ ការក្អក កណ្តាស់ ឬការប៉ះផ្ទៃដែលមានមេរោគ។

HMPV គ្មានវ៉ាក់សាំងចាក់ឬថ្នាំព្យាបាលជាក់លាក់ឡើយ តែយ៉ាងណា អាជ្ញាធរចិន ក៏ចេញសេចក្តីប្រកាសហើយថា ជំងឺនេះមិនចោទជាបញ្ហាធ្ងន់ទេ៕

អត្ថបទ៖ សុខ សុវណ្ណ

ចុចអាន៖​ ឥណ្ឌូណេស៊ី រកឃើញជំងឺ HMPV ដែលកំពុងផ្ទុះនៅចិន