អូស្រ្តាលី ជម្លៀសប្រជាជនរាប់ពាន់នាក់ទៀត ខណៈរងគ្រោះដោយទឹកជំនន់ធ្ងន់ធ្ងរបំផុតក្នុងរយៈពេល៦០ឆ្នាំ

នៅថ្ងៃចន្ទនេះ អាជ្ញាធរអូស្ត្រាលី​ គ្រោងនឹងជម្លៀសប្រជាជនរាប់ពាន់នាក់បន្ថែមទៀត ចេញពីតំបន់ជាយក្រុងស៊ីដនីភាគខាងលិច ដែលរងផលប៉ះពាល់ដោយសារទឹកជំនន់អាក្រក់បំផុត ក្នុងរយៈពេល៦០ឆ្នាំ ខណៈភ្លៀងធ្លាក់ឥតឈប់ឈរត្រូវបានគេព្យាករណ៍ថា នឹងបន្តធ្លាក់ក្នុងរយៈពេ់ប៉ុន្មានថ្ងៃខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លៀងធ្លាក់ខ្លាំងក្នុងរយៈពេលបីថ្ងៃកន្លងមកនេះ បានបណ្តាលឲ្យទឹកទន្លេនៅក្នុងរដ្ឋដែលមានប្រជាជនច្រើនបំផុត New South Wales ឡើងយ៉ាងគំហុក ដែលបង្កឲ្យមានការខូចខាតយ៉ាងធំធេង និងជំរុញឲ្យមានការអំពាវនាវជម្លៀសប្រជាជនទ្រង់ទ្រាយធំ។

សេវាគ្រាអាសន្នរដ្ឋ New South Wales បាននិយាយនៅក្នុង Twitter កាលពីថ្ងៃអាទិត្យថា “ទឹកជំនន់នេះ ទំនងជាខ្ពស់ជាងទឹកជំនន់ណាៗទាំងអស់គិតចាប់តាំងពីខែវិច្ឆិកាឆ្នាំ១៩៦១មក។ អាជ្ញាធររំពឹងថា អាកាសធាតុអាក្រក់នឹងបន្តរហូតដល់ថ្ងៃពុធ”។

ទឹកជំនន់ដែលហូរយ៉ាងលឿន បានបំផ្លាញផ្ទះសម្បែង បុកបំប៉ើងយានយន្តនិងសត្វចិញ្ចឹម ហើយជន់លិចផ្លូវ ស្ពាន ផ្ទះនិងកសិដ្ឋាន។

សេវាគ្រាអាសន្នរដ្ឋ New South Wales បាននិយាយថា មនុស្សជិត២,០០០នាក់ ត្រូវបានជម្លៀសចេញពីតំបន់វាលទំនាប។

ការិយាល័យអាកាសធាតុបាននិយាយថា ផ្នែកធំៗនៃឆ្នេរភាគខាងកើតរបស់ប្រទេស នឹងរងការវាយប្រហារដោយភ្លៀងធ្លាក់ខ្លាំង ចាប់ពីថ្ងៃចន្ទទៅ។

ការព្រមានអំពីទឹកជំនន់ធ្ងន់ធ្ងរ ត្រូវបានចេញសម្រាប់ផ្នែកធំៗនៃរដ្ឋ New South Wales ក៏ដូចជារដ្ឋ Queensland ផងដែរ៕

ប្រែសម្រួលដោយ៖ Vann Vann

ប្រភព៖ Reuters

ចុចអាន៖ ថ្ងៃ​​អាទិត្យ​​នេះ​ ទឹក​​ជំនន់​​វាយ​​ប្រហារ​​ក្រុង​​ស៊ីដនី ​ជម្លៀស​​ប្រជា​​ជន​​រាប់​​ពាន់​នាក់

ចុចអាន៖ ទឹកជំនន់កំពុងវាយប្រហារខ្លាំងនៅទូទាំងទីក្រុងហ្សាការតា