ត្រាំ ឆេះដុំនឹងពូទីន រឿងបទឈប់បាញ់

ប្រធានាធិបតីអាមេរិក ដូណាល់ ត្រាំ បានខឹងច្រឡោតចំពោះប្រធានាធិបតីរុស្ស៊ី វ្ល៉ាឌីមៀរ ពូទីន ដែលធ្វើឲ្យកិច្ចចរចាបទឈប់បាញ់ជាមួយអ៊ុយក្រែនត្រូវជាប់គាំង ហើយនេះត្រូវបានគេមើលឃើញថា ជាប្រតិកម្មខ្លាំងៗរបស់ប្រមុខសេតវិមាន ដ្បិតតាំងពីចូលកាន់តំណែងអាណត្តិទី២មក លោកតែងព្យាយាមស្តារទំនាក់ទំនងនិងមានទំនោរទៅខាងវិមានក្រឹមឡាំងខ្លាំងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងកិច្ចសម្ភាសរយៈពេល១០នាទីជាមួយ NBC កាលពីថ្ងៃអាទិត្យទី៣០ខែមីនាឆ្នាំ២០២៥,លោក ត្រាំ និយាយថា លោកខឹងពូទីនខ្លាំងណាស់ ព្រោះតែការវិវឌ្ឍថ្មីៗនៅក្នុងកិច្ចចរចាបទឈប់បាញ់ កំពុងដើរខុសទិស។

ស្របពេលជាមួយគ្នានោះដែរ លោកត្រាំព្រមានថា បើពូទីន មិនព្រមឈប់បាញ់ទេនោះ លោកនឹងដាក់ទណ្ឌកម្មយកពន្ធ៥០% លើប្រទេសទាំងឡាយណា ដែលទិញប្រេងរុស្ស៊ី ព្រោះនោះគឺជាកំហុសទីក្រុងមូស្គូ។

ទន្ទឹមនោះ ត្រាំ ក៏រិះគន់សំណើលោកពូទីន ក្នុងការជំនួសប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ជាមួយនឹងរដ្ឋាភិបាលបណ្តោះអាសន្នផងដែរ ដោយហៅវាថា ជាការប្រឆាំងទៅនឹងការទទួលបានសន្តិភាព។

ទោះបីជាឆេះដុំខ្លាំងបែបនេះក៏ដោយ លោក ត្រាំ នៅតែអះអាងថា ខ្លួនមានទំនាក់ទំនងផ្ទាល់ខ្លួនដ៏រឹងមាំជាមួយលោក ពូទីន ហើយសង្ឃឹមថា ការចរចានឹងប្រសើរឡើងវិញ។ យ៉ាងណា សេតវិមាន មិនទាន់ចេញមុខនិយាយអ្វីទេ ពាក់ព័ន្ធនឹងសម្តីលោកត្រាំនេះ។

ការវិវឌ្ឍថ្មីៗ ត្រូវគេមើលឃើញថា ជាការផ្លាស់ប្តូរសឹងតែ១៨០ដឺក្រេរបស់លោក ត្រាំ ដែលតាំងពីដំបូងមក លោកតែងវាយប្រហារ ហ្សេលេនស្គី និងទាមទារសម្បទានជាច្រើនពីប្រធានាធិបតីអ៊ុយក្រែន។ ផ្ទុយទៅវិញ លោកបានសរសើរ ពូទីន ហើយតែងយល់ព្រមតាមការទាមទាររបស់ប្រធានាធិបតីរុស្ស៊ី។

សូមជម្រាបជាថ្មី រុស្សីបានបើកការវាយលុកពេញទំហឹងលើប្រទេសជិតខាងរបស់ខ្លួនគឺអ៊ុយក្រែន ក្នុងខែកុម្ភៈឆ្នាំ២០២២ខណៈបច្ចុប្បន្ន រុស្ស៊ីគ្រប់គ្រងបានប្រហែល ២០%ហើយនៃទឹកដីអ៊ុយក្រែន៕

អត្ថបទ៖ សុខ សុវណ្ណ

ចុចអាន៖ ត្រាំ ប្រកាសក្តែងៗថា អាមេរិក ​នឹងយកបាន Greenland ១០០%