ទីក្រុងបាងកកប្រទេសថៃរងការខូតខាតដោយសារ​គ្រោះ​រញ្ជួយដីជាង៧០០ករណី

រដ្ឋបាលក្រុងបាងកក (BMA) នឹងត្រួតពិនិត្យករណីខូចខាតជាង ៧០០ករណីក្នុងចំណោម២០០០ករណីនៅក្នុងរាជធានី​​ បន្ទាប់ទទួលរងឥទ្ធិពលគ្រោះរញ្ជួយដីកម្រិត ៧.៧ រ៉ិចទ័រ ពីប្រទេសជិតខាងមីយ៉ាន់ម៉ាកាលថ្ងៃសុក្រ។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃទី៣១ខែមីនានេះ។

អភិបាលក្រុងបាងកក លោក Chadchart Sittipunt បាននិយាយកាលពីថ្ងៃសៅរ៍ថា BMA បានទទួលរបាយការណ៍​ចំនួន ២០០០ករណីនៃការខូចខាតដែលបណ្តាលមកពីការរញ្ជួយដីនេះ។ ការត្រួតពិនិត្យដំបូងបានផ្តល់អាទិភាពដល់ករណីធ្ងន់ធ្ងរបំផុតត្រួតពិនិត្យជាមុនសិន ដោយបែងចែកមន្ទីរ​សាធារណការ​នឹង​ចុះ​ពិនិត្យ​អគារ​រដ្ឋាភិបាល ខណៈ BMA នឹង​ពិនិត្យ​លើ​របាយការណ៍​ដែល​ប្រជាពលរដ្ឋ​ដាក់​ជូន។

ករណីជាង ៧០០ ត្រូវបានកំណត់ឱ្យដោះស្រាយក្នុងរយៈពេលមួយថ្ងៃ ជាមួយនឹងការត្រួតពិនិត្យត្រូវបានធ្វើឡើងតាមលំដាប់លំដោយនៃភាពធ្ងន់ធ្ងរ។ សាលាក្រុងបាងកកក៏បានប្រកាសកាលពីថ្ងៃសុក្រថាទីក្រុងបាងកកត្រូវបានប្រកាសជាតំបន់គ្រោះមហន្តរាយបន្ទាប់ពីការរញ្ជួយដីនៅមីយ៉ាន់ម៉ាដោយមានអភិបាលក្រុងបាងកកទទួលបន្ទុកសម្របសម្រួលការឆ្លើយតបគ្រោះមហន្តរាយ។

គួរបញ្ជាក់ថា គ្រោះរញ្ជួយដីកម្រិត៧.៧រ៉ិចទ័រវាយប្រហារប្រទេសមីយ៉ាន់ម៉ាកាលពីថ្ងៃសុក្របំផ្លិចបំផ្លាញតំបន់ជាច្រើនរបស់​ប្រទេសនេះនិងជះឥទ្ធិពលទៅដល់ទីក្រុងបាងកកប្រទេសថៃ។ មកដល់ថ្ងៃទី៣១ខែមីនានេះអ្នកស្លាប់មានចំនួនដល់ទៅ២៩២៨នាក់ ខណៈអ្នកស្លាប់នៅនាក់ប្រទេសថៃដោយសាររលំបាក់អគារកំពុងសាកសង់កម្ពស់៣៣ជាន់នៅទីក្រុងបាងកកបានកើនដល់១៨នាក់។ ក្រុមជួយសង្គ្រោះទាំងពីរប្រទេសនេះកំពុងព្យាយាមជួយជនរងគ្រោះដែលនៅតែជាប់ក្រោមគំនរបាក់បែកនៅឡើយ ខណៈសង្ឈឹមរស់កាន់តែតិចទៅៗ៕

អត្ថបទ៖ ប៊ុន សុភាព