ត្រាំ ថា នឹងសុំចិន ឲ្យជួយដោះស្រាយជម្លោះ រុស្ស៊ី-អ៊ុយក្រែន

កាលពីថ្ងៃព្រហស្បតិ៍ទី៨ខែឧសភាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បង្ហើបថា លោកអាចនឹងសុំឲ្យទីក្រុងប៉េកាំង មកជួយដោះស្រាយជម្លោះរុស្ស៊ី-អ៊ុយក្រែន ហើយនាំមកនូវកិច្ចព្រមព្រៀងសន្តិភាពឲ្យភាគីទាំងពីរ ខណៈគេមើលឃើញថា ប្រធានាធិបតីចិន លោក ស៊ី ជីនពីង គឺជាបុរសមានឥទ្ធិពលតែមួយរូបគត់ ដែលអាចនិយាយជាមួយមេដឹកនាំរុស្ស៊ី វ្ល៉ាឌីមៀរ ពូទីន បានព្រោះអ្នកទាំងពីរ ជាមិត្តជិតស្និទ្ធិនិងជាសម្ព័ន្ធមិត្ត ចាក់ទឹកមិនលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបសំណួរអ្នកសារព័ត៌មាននៅឯសេតវិមាន ថាតើលោកអាចនឹងស្វែងរកជំនួយពីចិន ដើម្បីនាំភាគីជម្លោះទាំង២មកកាន់តុចរចាដែរឬអត់នោះ? លោក ត្រាំ ឆ្លើយថា៖ «​ពិត​ណាស់ ខ្ញុំ​គិត​ថា វាជារឿងធម្មតាដែលត្រូវស្នើសុំ។ សហរដ្ឋអាមេរិកកំពុងធ្វើឲ្យមានវឌ្ឍនភាពដ៏ល្អ លើដំណោះស្រាយនេះ»។

តាំងពីចូលកាន់តំណែងអាណត្តិថ្មីមក លោកត្រាំ បានចុចឈ្មោះទីក្រុងប៉េកាំង ជាគោលដៅធំនៃការប្រកួតប្រជែងផ្នែកសេដ្ឋកិច្ច ជាពិសេសលោកបានដាក់ពន្ធដ៏ខ្លាំងក្លា រហូតដល់១៤៥%លើទំនិញរបស់ចិនថែមទៀតផង។

យ៉ាងណាក្តី ដោយមើលឃើញពីឧបសគ្គនៃដំណោះស្រាយជម្លោះរុស្ស៊ី-អ៊ុយក្រែន មេដឹកនាំសេតវិមាន ហាក់បន្ទន់ជំហរ ដើម្បីធ្វើយ៉ាងណាពន្លត់ភ្លើងសង្គ្រាមនេះឲ្យបាន ទោះមិនជោគជ័យដូចការអួតអាងកាលពីអំឡុងយុទ្ធនាឃោសនាបោះឆ្នោត ដែលថានឹងចាយពេលត្រឹម២៤ម៉ោងក៏ដោយ។

ការលើកឡើងរបស់ប្រធានាធិបតីអាមេរិកនេះ គឺបន្ទាប់ពីលោកក៏ងាកទៅរកមេដឹកនាំដ៏មានឥទ្ធិពលមួយរូប ដែលខ្លួនចង់ធ្វើការជាមួយដើម្បីដោះស្រាយបញ្ហានេះដែរ នោះគឺប្រធានាធិបតីតួកគី Recep Tayyip Erdogan។

លោកត្រាំបានបង្ហោះលើបណ្តាញសង្គម Truth Social កាលពីថ្ងៃចន្ទទី៥ខែឧសភាឆ្នាំ២០២៥​ ថា៖ «ខ្ញុំទន្ទឹងរង់ចាំធ្វើការជាមួយលោកប្រធានាធិបតី Erdogan ដើម្បីបញ្ចប់សង្រ្គាមដ៏គួរឲ្យអស់សំណើចប៉ុន្តែសាហាវ រវាងរុស្ស៊ីនិងអ៊ុយក្រែនឥឡូវនេះ!»។

សូមជម្រាបថា គិតត្រឹមពេលនេះ ប្រធានាធិបតីអាមេរិក ចូលកាន់តំណែងបានជាង១០០ថ្ងៃហើយ តែភ្លើងសង្គ្រាមនៅតែបន្តឆាបឆេះយ៉ាងសន្ធោសន្ធៅដដែល ដល់ថ្នាក់កាលពីខែមុន លោកត្រាំ ប្រកាសថាលោកនឹងដកខ្លួនឈប់ដើរតួនាទីជាអ្នកសម្របសម្រួល ស្វែងរកសន្តិភាពឲ្យរុស្ស៊ីនិងអ៊ុយក្រែន បើមើលទៅរឿងនេះពិបាកពេក ដោះស្រាយមិនចេញ៕

អត្ថបទ៖ សុខ សុវណ្ណ

ចុចអាន៖ ត្រាំ ងាកទៅរកមេដឹកនាំដ៏មានឥទ្ធិពលមួយរូប ឲ្យជួយបញ្ចប់សង្គ្រាម រុស្ស៊ី-អ៊ុយក្រែន