ត្រាំ ងាកទៅរកមេដឹកនាំដ៏មានឥទ្ធិពលមួយរូប ឲ្យជួយបញ្ចប់សង្គ្រាម រុស្ស៊ី-អ៊ុយក្រែន

ស្របពេលដំណើរការឈានឆ្ពោះទៅរកកិច្ចព្រមព្រៀងសន្តិភាពរុស្ស៊ី-អ៊ុយក្រែន ត្រូវជាប់គាំងគ្មានឃើញពន្លឺសោះនោះ ស្រាប់តែពេលនេះប្រធានាធិបតីអាមេរិក ដូណាល់ ត្រាំ បានងាកទៅរកមេដឹកនាំដ៏មានឥទ្ធិពលមួយរូប ដែលខ្លួនចង់ធ្វើការជាមួយដើម្បីដោះស្រាយបញ្ហានេះ នោះគឺប្រធានាធិបតីតួកគី Recep Tayyip Erdogan។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសារបង្ហោះលើបណ្តាញសង្គម Truth Social ក្រោយមេដឹកនាំទាំងពី២ពិភាក្សាគ្នាតាមទូរស័ព្ទ កាលពីថ្ងៃចន្ទទី៥ខែឧសភាឆ្នាំ២០២៥​ លោកត្រាំ សរសេរថា «ខ្ញុំទន្ទឹងរង់ចាំធ្វើការជាមួយលោកប្រធានាធិបតី Erdogan ដើម្បីបញ្ចប់សង្រ្គាមដ៏គួរឲ្យអស់សំណើចប៉ុន្តែសាហាវ រវាងរុស្ស៊ីនិងអ៊ុយក្រែនឥឡូវនេះ!»។

មិនស្រួលដូចការអួតអាងរបស់លោកត្រាំ ក្នុងអំឡុងយុទ្ធនាការឃោសនាបោះឆ្នោតឆ្នាំ២០២៤ ដែលថានឹងបញ្ចប់ជម្លោះរុស្ស៊ី-អ៊ុយក្រែន ត្រឹម២៤ម៉ោងឡើយ, គិតត្រឹមពេលនេះ ប្រធានាធិបតីអាមេរិក ចូលកាន់តំណែងបានជាង១០០ថ្ងៃហើយ តែភ្លើងសង្គ្រាមនៅតែបន្តឆាបឆេះយ៉ាងសន្ធោសន្ធៅដដែល។

សូម្បីកាលពីខែមុន លោកត្រាំ ក៏ប្រកាសថានឹងដកខ្លួនឈប់ដើរតួនាទីជាអ្នកសម្របសម្រួល ស្វែងរកសន្តិភាពឲ្យរុស្ស៊ីនិងអ៊ុយក្រែនផងដែរ បើមើលទៅរឿងនេះពិបាកពេក ដោះស្រាយមិនចេញ។

លោកប្រាប់ទៅអ្នកសារព័ត៌មានកាលពីថ្ងៃសុក្រទី១៨ខែមេសាថា ទីក្រុងវ៉ាស៊ីនតោន នឹងលែងប្រឹងស្វែងរកដំណោះស្រាយសន្តិភាពក្នុងសង្គ្រាមរុស្ស៊ី-អ៊ុយក្រែនទៀតហើយ បើភាគីទាំងពីរមិនព្រមចូលតុចរចាគ្នា។ បើភាគីណាមួយបន្តធ្វើរឿងដែលលំបាកខ្លាំង អាមេរិកនឹងដកខ្លួន។ សហរដ្ឋអាមេរិក នឹងមិនបន្តធ្វើជាអ្នកសម្របសម្រួលទៀតឡើយ។

ទោះបែបនេះ កាលពីសប្តាហ៍មុននេះ រដ្ឋាភិបាលទីក្រុងវ៉ាស៊ីនតោន បានប្រកាសសុំពេល១០០ថ្ងៃទៀត ដើម្បីសម្របសម្រួលនិងនាំយកសន្តិភាពមកជូនទីក្រុងកៀវនិងមូស្គូ។

យ៉ាងណាលោកត្រាំ បានគំរាមរួចហើយថា ប្រទេសអ៊ុយក្រែននឹងខ្ទេចក្នុងពេលឆាប់ៗ បើសិនជាមិនព្រមចូលតុចរចាជាមួយរុស្ស៊ីទេនោះ៕

អត្ថបទ៖ សុខ សុវណ្ណ

ចុចអាន៖ លោក ត្រាំ ប្រកាស​បង្កើត​បុណ្យ​ជាតិ​២ថ្ងៃ​ថែម​ទៀត តែ​មិន​ឲ្យ​ពលរដ្ឋ​ឈប់​សម្រាក