ចិន​ ​បង្ហាញ​កង្វល់​​​ជុំវិញការរំខាននៅច្រកហ័រមូស ​ក្រោយ អាមេរិក-អ៊ីរ៉ង់ ចរចានៅកាតា

នៅថ្ងៃសុក្រទី៣ ខែកក្កដា ប្រទេសចិនបានអំពាវនាវឲ្យមានការដោះស្រាយដោយសមស្របមួយ ដើម្បីបញ្ចប់ការរំខានដល់ការធ្វើនាវាចរណ៍នៅក្នុងច្រកសមុទ្រ Hormuz ​ដែលគ្រប់គ្រង​ដោយ​អ៊ីរ៉ង់ ខណៈពេលដែលសហរដ្ឋអាមេរិក និងអ៊ីរ៉ង់ បានបន្តកិច្ចចរចាដោយប្រយោលនៅក្នុងប្រទេសកាតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យក្រសួងការបរទេសចិន លោក Guo Jiakun បានថ្លែងប្រាប់អ្នកយកព័ត៌មាននៅទីក្រុងប៉េកាំងថា «ច្រកសមុទ្រ Hormuz គឺជាច្រកសម្រាប់ការធ្វើនាវាចរណ៍អន្តរជាតិ។ ការស្តារឡើងវិញនូវការធ្វើដំណើរឆ្លងកាត់ដោយសុវត្ថិភាព និងសេរីនៅក្នុងច្រកសមុទ្រនេះឲ្យបានឆាប់ គឺបម្រើដល់ផលប្រយោជន៍របស់ភាគីទាំងអស់»។

លោក Guo បានបន្តថា ការដោះស្រាយដោយសមស្រប គឺជារឿងចាំបាច់ដើម្បីដោះស្រាយបញ្ហារំខាននៅក្នុងច្រកសមុទ្រ ក៏ដូចជាក្តីបារម្ភរួមរបស់សហគមន៍អន្តរជាតិ ដោយលោកបានបន្ថែមថា បញ្ហាទាំងនេះ ទាមទារឲ្យមានការឆ្លើយតបដ៏ត្រឹមត្រូវមួយ។ នៅក្នុងនោះផងដែរ ចិនត្រៀមខ្លួនជាស្រេចក្នុងការរក្សាទំនាក់ទំនងលើបញ្ហានេះ ជាមួយបណ្តាប្រទេសពាក់ព័ន្ធ និងសហគមន៍អន្តរជាតិ។

ការថ្លែងការណ៍ពីទីក្រុងប៉េកាំងនេះ បានធ្វើឡើងចំពេលដែលអាមេរិក និងអ៊ីរ៉ង់ បានបើកកិច្ចចរចាដោយប្រយោល ក្រោមការសម្របសម្រួលពីប្រទេសប៉ាគីស្ថាន និងកាតា នៅទីក្រុងដូហា នាសប្តាហ៍នេះ។

យ៉ាងណា កិច្ចចរចានៅទីក្រុងដូហានេះ គឺជាផ្នែកមួយនៃអនុស្សរណៈនៃការយោគយល់គ្នា (MoU) ទីក្រុងអ៊ីស្លាម៉ាបាដ កាលពីថ្ងៃទី១៧ ខែមិថុនា ដែលត្រូវបានចុះហត្ថលេខាដោយប្រធានាធិបតីសហរដ្ឋអាមេរិក និងអ៊ីរ៉ង់ ដើម្បីបញ្ចប់សង្គ្រាមជាអចិន្ត្រៃយ៍ ដែលផ្ទុះឡើងកាលពីថ្ងៃ ទី២៨ ខែកុម្ភៈ ខណៈដែលភាគីទាំងពីរបានកំណត់ឱសានវាទរយៈពេល ៦០ ថ្ងៃ សម្រាប់បញ្ចប់ការចរចា។

កិច្ចព្រមព្រៀងក្របខ័ណ្ឌនេះ រួមបញ្ចូលទាំងខចែងនានាដែលដោះស្រាយលើបញ្ហាផ្សេងៗ រួមទាំងការបើកច្រកសមុទ្រ Hormuz ឡើងវិញ ដែលជាផ្លូវដឹកជញ្ជូនប្រេងដ៏សំខាន់លំដាប់ពិភពលោក។

យោងតាមការចុះផ្សាយមុននេះ ដោយទីភ្នាក់ងារសារព័ត៌មាន Anadolu បានឲ្យដឹងថា កិច្ចចរចានៅទីក្រុងដូហា ត្រូវបានរំពឹងថា នឹងចាប់ផ្តើមឡើងវិញនៅសប្តាហ៍ទីបី នៃខែកក្កដា។

គួរបញ្ជាក់ថា ទីក្រុងតេហេរ៉ង់បានបិទច្រកសមុទ្រនេះ ក្រោយការវាយប្រហារពីសំណាក់អាមេរិក និងអ៊ីស្រាអែល ហើយកងទ័ពអាមេរិកក៏បានដាក់ទណ្ឌកម្មបិទខ្ទប់កំពង់ផែរបស់អ៊ីរ៉ង់ផងដែរ កាលពីថ្ងៃទី១៣ ខែមេសា។ ទោះជាយ៉ាងណា បន្ទាប់ពី MoU ទីក្រុងអ៊ីស្លាម៉ាបាដត្រូវបានចុះហត្ថលេខា អាមេរិកបានដកការបិទខ្ទប់នោះវិញ ខណៈដែលអ៊ីរ៉ង់បានបន្ធូរបន្ថយការរឹតបន្តឹងលើការធ្វើដំណើរឆ្លងកាត់ ប៉ុន្តែបានទទូចឲ្យនាវាទាំងឡាយធ្វើដំណើរតាមផ្លូវដែលខ្លួនបានកំណត់នៅក្នុងផ្លូវទឹកដ៏សំខាន់មួយនេះ។

អត្ថបទ ៖ សាង ស្រីល័ក្ខ

អ៊ីរ៉ង់ ទម្លាយថា ធ្លាប់ជាប់​គាំងការនាំចេញប្រេងដល់ «សូន្យបារ៉ែល» ព្រោះតែ អាមេរិក បិទខ្ទប់