ធនាគារពិភពលោក ត្រៀមផ្ដាច់កម្ចីត្រឹមឆ្នាំ២០៣១ ចិនតបថា មិនអីទេ ខ្លួនមានបានហើយ

រដ្ឋាភិបាលចិន បានចេញមុខមកទទួលយកយ៉ាងពេញចិត្ត ចំពោះគម្រោងរបស់ធនាគារពិភពលោក ក្នុងការបញ្ឈប់ផ្តល់កម្ចីសម្រាប់អភិវឌ្ឍន៍មកឱ្យចិនត្រឹមឆ្នាំ២០៣១ខាងមុខ។

តាម​ការ​ចុះផ្សាយ​នា​ថ្ងៃទី​៣ ខែ​កក្កដា ឆ្នាំ​២០២៦ របស់​សារព័ត៌មាន Asai Today រដ្ឋាភិបាល​ចិន បាន​លើកឡើង​ថា វា​ជារឿងធម្មតា​បំផុត ព្រោះសេដ្ឋកិច្ចរបស់ខ្លួនពេលនេះ បានរីកចម្រើន និងរឹងមាំខ្លាំងណាស់ទៅហើយ។

ក្រសួងហិរញ្ញវត្ថុចិន បានបញ្ជាក់ថា រយៈពេលជាង ៤០ឆ្នាំមកនេះ ចិន និងធនាគារពិភពលោក បានសហការគ្នាបានយ៉ាងល្អ ដែលជួយឱ្យចិនអាចកាត់បន្ថយភាពក្រីក្រ និងបើកចំហសេដ្ឋកិច្ចបានជោគជ័យ។ ប៉ុន្តែក្នុងរយៈពេលប៉ុន្មានឆ្នាំចុងក្រោយនេះ លុយកម្ចីទាំងនោះបានកាត់បន្ថយជាលំដាប់ ពីព្រោះប្រទេសចិនផ្ទាល់មានសមត្ថភាព និងមានទ្រព្យសម្បត្តិជាតិកើនឡើងខ្ពស់។ ទោះបីជាត្រូវឈប់ខ្ចីលុយក៏ដោយ ក៏ចិននៅតែបន្តធ្វើការងារជាមួយធនាគារពិភពលោកដដែល ប៉ុន្តែដូរមកផ្តោតលើការចែករំលែកចំណេះដឹង និងជួយជ្រោមជ្រែងដល់ប្រទេសក្រីក្រដទៃទៀតវិញ។

ការសម្រេចចិត្តផ្ដាច់កម្ចីនេះ កើតឡើង បន្ទាប់ពីសហរដ្ឋអាមេរិក និងប្រទេសសមាជិកមួយចំនួនទៀត បានទាមទារឱ្យធនាគារពិភពលោកឈប់ឱ្យចិនខ្ចីលុយ ព្រោះមើលឃើញថា ចិនមានសេដ្ឋកិច្ចលូតលាស់លឿនពេក។ គម្រោងនេះ ត្រូវបានដាក់ជូនក្រុមប្រឹក្សាភិបាលហើយ និងរង់ចាំការអនុម័តផ្លូវការនៅក្នុងខែកក្កដានេះ។ សកម្មភាពនេះ បានបង្ហាញយ៉ាងច្បាស់ថា ប្រទេសចិនបានដើរចេញពីភាពជាប្រទេសសុំជំនួយ ហើយកំពុងឈានជើងចូលទៅក្នុងចំណោមប្រទេសអ្នកមាន និងជឿនលឿនបំផុតនៅលើលោកហើយ៕

ប្រែសម្រួល៖ ឈាង