វៀតណាម និងរុស្ស៊ី ព្រមព្រៀង​គ្នា​​ពន្លឿនកិច្ចសហប្រតិបត្តិការថាមពលនុយក្លេអ៊ែរ

ទីក្រុង​ហាណូយ នីង​ទីក្រុង​មូស្គូ បាន​យល់​ព្រម​គ្នាពន្លឿនការចរចា និងចុះហត្ថលេខាយ៉ាងឆាប់រហ័សលើកិច្ចព្រមព្រៀងសម្រាប់ការសាងសង់រោងចក្រថាមពលនុយក្លេអ៊ែរនៅ​ប្រទេស​វៀតណាម បន្ទាប់ពីកិច្ចប្រជុំកម្រិតខ្ពស់រវាងប្រជាជាតិទាំងពីរ កាល​ពី​ថ្ងៃ​​ទី​១១​ខែ​ឧសភា​ឆ្នាំ​២០២៥។

នេះ​គឺជាជំហានដ៏សំខាន់មួយក្នុងកិច្ចខិតខំប្រឹងប្រែងរបស់វៀតណាម ក្នុងការស្តារឡើងវិញនូវមហិច្ឆតាថាមពលនុយក្លេអ៊ែររបស់ខ្លួន ដែលពីមុនត្រូវបានបោះបង់ចោលក្នុងឆ្នាំ​២០១៦ ដោយសារបញ្ហាសេដ្ឋកិច្ច និងសុវត្ថិភាព។ លើក​មុន រដ្ឋាភិបាល​វៀតណាម ធ្លាប់​និយាយ​ថា ខ្លួនរំពឹងថា រោងចក្រថាមពលនុយក្លេអ៊ែរដំបូង​អាច​ផលិត​ថាមពល​រហូតដល់ ៦,៤​ជីហ្គាវ៉ាត់ នៅចន្លោះឆ្នាំ​២០៣០ និងឆ្នាំ​២០៣៥។

ការផ្តោតជាថ្មីលើថាមពលនុយក្លេអ៊ែរ ស្របតាមគោលដៅរបស់វៀតណាម ដើម្បីសម្រេចបាននូវ​ការ​ផ្គត់ផ្គង់​ថាមពល​ឲ្យ​​បាន​គ្រប់គ្រាន់​ដោយ​ខ្លួន​ឯង និងកាត់បន្ថយការបំភាយឧស្ម័នផ្ទះកញ្ចក់ត្រឹមឆ្នាំ​២០៥០។

វៀតណាម និង​រុស្ស៊ី បាននិយាយនៅក្នុងសេចក្តីថ្លែងការណ៍​រួម​ថា៖ «ការអភិវឌ្ឍ​រោងចក្រជាមួយនឹងបច្ចេកវិទ្យាទំនើប នឹងគោរពយ៉ាងតឹងរ៉ឹងជាមួយបទប្បញ្ញត្តិសុវត្ថិភាពនុយក្លេអ៊ែរ និងវិទ្យុសកម្ម និងសម្រាប់ជាប្រយោជន៍ដល់ការអភិវឌ្ឍ​សេដ្ឋកិច្ចសង្គម»។

កិច្ចសហប្រតិបត្តិការនេះ មាន​ការ​ចូលរួម​ពី​សាជីវកម្មថាមពលនុយក្លេអ៊ែររដ្ឋរុស្ស៊ី Rosatom និងក្រសួងវិទ្យាសាស្ត្រ និងបច្ចេកវិទ្យារបស់វៀតណាម។ កាលពីដើមឆ្នាំ​២០២៥ ភាគីទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការនុយក្លេអ៊ែរ ក្នុងអំឡុងពេលដំណើរទស្សនកិច្ចរបស់នាយករដ្ឋមន្ត្រីរុស្ស៊ីលោក Mikhail Mishustin ទៅកាន់ទីក្រុងហាណូយ ដែលជាសញ្ញាបង្ហាញពីការប្តេជ្ញាចិត្តក្នុងការពង្រឹងទំនាក់ទំនងទ្វេភាគីក្នុងវិស័យថាមពល។

បន្ថែមពីលើថាមពលនុយក្លេអ៊ែរ វៀតណាម និងរុស្ស៊ីបានពង្រីកកិច្ចសហប្រតិបត្តិការរបស់ខ្លួន​លើ​ការរុករកប្រេងនិងឧស្ម័ន គំនិតផ្តួចផ្តើមសេដ្ឋកិច្ចឌីជីថល និងការស្រាវជ្រាវដែនសមុទ្រ៕

ដោយ៖ ឈាង